Ubuci—Muti Uusuma

BAKASAPIKA ba fya miti bamo nabatemwa nga nshi ukwishiba pa lwa maka ya buci aya kulwisha utushishi tutandanya amalwele mu mubili no kukanafimba. Inyunshipepala ya ku Canada iya The Globe and Mail yatile: “Ukupusana ne miti ya kupanga iishaba na maka ya kwipaya tushishi utuletako amalwele, ubuci bulacimfya utushishi tumo tumo utuba pa filonda.”

Finshi fyaba mu buci ifipeela aya maka ya kundapa? Icasuko cishintilila pa kwishiba ulushimu ulubombesha mu kufwaya uluto lwa mu muluba. Mu mate ya lushimu mwaliba shuga ya glucose-oxidase, ulusandesande ululekanya shuga iyaba mu luto lwa mu muluba. Uku kulekanya kupanga hydrogen peroxide, iibomfiwa ku kuwamya no kuposha ifilonda. Ilingi, nga mwabika hydrogen peroxide pa cilonda, amaka ya iko tayatwalilila; lelo ubuci bwalipusanako. Lipoti wa Globe atile: “Ngo buci buli pa cilonda, bulasundulwa na menshi ya mu mubili, kabili asidi ya mu buci ilacepa.” Ulusandesande lutendeka ukubomba nga asidi yacepa. Ukulekanya shuga mu buci kucitwa panono panono kabili kulatwalilila. Uku kulekanya panono panono kulafumya hydrogen peroxide uwingi uwa kwipaya utushishi utulipo ukwabula ukonaula insandesande shimbi ishituntulu.

Ukulingana na lipoti wa Globe, ubuci bulacita ifingi ifyafwilisha icilonda ukupola. “Uluto lwa buci talukusha icilonda ne ci cilacingilila no kulesha inkanda ya pa cilonda ukukosa. Ubuci bulakusha no kupanga imishipashipa iipya kabili bulafwe insandesande ukupanga inkanda cipya cipya. Kabili, ificilikila oxygen ukufumya hydrogen, ifyaba mu buci “filanasha ukufimba kabili filenga umulopa ukwenda bwino ne cilonda ukukanafumya amenshi.’”

Lelo uyu lipoti asokele ukuti: “Ubuci tabundapa abantu bonse.” Catunganishiwa ukuti mu buci mwaliba umusango wa tushishi ukufika ku mapesenti 5 utwingalwalika. Ifyafwilisha mu fya bumi pamo nga ulupapulo lwa Health Canada ulwasabankanishiwe na ba Botulism Reference Service pamo no tubungwe tubombela pa malwele ya bana banono twafundile ukuti ukupeela ubuci ku bana banono abashikumenye umwaka umo tacaba bwino pantu “amala ya tunya yaba tayalakosa sana ica kutila kuti yatucingilila ku tushishi tutandanya amalwele.”