Tandabube Uuifungushanya ngo Bubenshi
KWALIBA tandabube umunono uusokelela mu cuulu no kwikala pamo ne filwani fyakwe ukwabula ukuti eshibikwe. Pa kukanaishibikwa, alalula imimonekele yakwe ne misango pa kuti eishibikwa. Cilaba bwino ukucite fi pantu nga ca kutila ububenshi bwapumfyanishiwa bulakalipa icine cine. Apo tandabube alipusana ku bubenshi, cilafya ukufisama.
Ububenshi bwakwata amolu 6 no twakumfwilako (antennae) tubili, kumfwa tandabube ena akwata amolu 8 ukwabula utwakumfwilako. Nomba kanshi tandabube acita shani pa kuti amoneke ngo bubenshi? Ifyo acita ni fi, akalafuka pa cuulu ku molu 6, e lyo alemya amolu yabili no kuyalenga yalamoneka kwati twakumfwilako.
Kabili, tandabube alaseshanya bwino bwino amolu pa kwenda yabili ayamoneka kwati twa kumfwilako. Alayalosha ku ntanshi na ku numa ica kuti yalamoneka kwati ni tulya ububenshi bumfwilako. Iyi ncenshi mu kuifungushanya kuti yaenda nga filya fine ububenshi bwenda, ukuya uku no ku!
Tandabube alesha sana muli fyonse pa kuti amoneke ngo bubenshi, apo afwile ukwishibikwa ukuti na o ekala pa cuulu nga ali no kucingililwa. Mu cuulu mwine mulya, tandabube alaicingilila ku filwani fyakwe, na ku malonda yalunga batandabube. Ifyuni fimbe nyimbo, ifyaishiba tandabube ukuti cilyo canona, na fyo tafimulya. Nangu fye ni balya batandabube bambi abalya abanabo balabepwa kuli yalya molu yabili ayamoneka kwati twakumfwilako.
Lelo nga ca kutila icuni, mulinso, nelyo icili conse casansa umushi wa bubenshi, tandabube bwangu bwangu alaifisulula no kubutuka. Batandabube balamwensekesha ukucila ububenshi, kabili kuti batoloka, lelo ububenshi bwena te kuti bucite ifyo—fyonse fi filenga batandabube ukubutuka ukwabula ubwafya.
Mu nshita ya kasuba, tandabube abelama mulya mwine mu cuulu ukwabula ukumumona. Nga bwaila, alasalapuka no kwikata ububenshi bwa mulya mwine mu cuulu ekala! Nga ca kutila imibombele ya kwa tandabube yaishibikwa, e po nomba amolu yakwe yonse 8 yabomba no kufulumuka mu kwangufyanya.
Tandabube umukota kuti aya mu cuulu umuli umulume. Alalanga bucishinka ku mulume wakwe no kuitendekelako. Alapika isumbu lya kumucingilila mu cuulu, ili line sumbu lilacingilila no mulume wakwe na mani yakwe yene.
Ukwabula ukutwishika kuli ifingi ifyo twingasambilila pa lwa uyu tandabube. Nangu fye misango ya nama imbi iyaba pano isonde tabaishiba bwino. Mwandi cikawama ku ntanshi ukusambilila ifingi pa lwa fibumbwa fya kwa Lesa ifya kupapusha!
[Icikope pe bula 16]
Tandabube pa kati ka bubenshi bubili
[Abatusuminishe]
Bill Beatty