Ifyo Ifinyelele Ifimoneka ngo Munang’u Fiwamya Amasengo

Ifishishi filakabila ukuba ifya busaka pa kuti filepupuka, filenina no kwishiba apo fili. Ku ca kumwenako, amasengo ya cinyelele nga nayalamba icinyelele cilafilwa ukwishiba uko cileya, ukulanshanya ne finyelele fimbi no kununsha bwino. Ba Alexander Hackmann abasambilila pa nama batile: “Tamwakabale amusanga akashishi akalamba. Utushishi twalishiba ifya kucita pa kuti tatulambile.”

Tontonkanyeni pali ici: Ba Hackmann na banabo basambilile pa fyo utunyelele utumoneka ngo munang’u (Camponotus rufifemur) tuwamya amasengo. Basangile ukuti utunyelele tulafumya ifiko ifyapusanapusana ubukulu ku masengo, tulongamika amolu e lyo twatendeka ukutinta amasengo no kuyapisha mu molu. Apo amolu ya ici cinyelele yalikalabana yalafumya ifiko ifikalamba. Pa kufumya utufiko utunono cibomfya utwaba nga akasakulo akanono sana akalingana ubukulu no tumishishi utwaba ku masengo ya ici cinyelele. Lyena utufiko utunono sana ukucila na pa mushishi wa muntu tulafuma pantu icinyelele calikwata utwakalabana utunono sana utwaba kwati kasakulo.

Mukamone ifyo icinyelele icimoneka ngo Munang’u cilewamya amasengo

Ba Hackmann na bo babomba nabo balimona ukuti inshila ici cinyelele bomfya pa kuwamya amasengo kuti yawama ukuibomfya mu makampani yapanga ifintu. Ku ca kumwenako, kuti bapanga ifingalawamya utuntu utunono sana utuba kuli bamashini bapange fintu utwayafya sana ukusakamana, pantu twena nangu kwaya fye utufiko utunono sana mashini kuti yaonaika.

Muletipo shani: Bushe ici cinyelele casangwike fye icine, nangu kwali uwacipangile?