Ukulanshanya Ukutungulula ku Bumi
PA BUBUMBO bonse ubwa pe sonde, bantunse fye e bashikushiwa no kulanshanya fye na bantunse banabo. Te mulandu ne calo bekalamo, icifulo cabo mu bwikashi, babe banakashi atemwa abaume, kabili te mulandu na masomo bafikapo, mu cifyalilwa fye abantunse balafwaisha ukulanshanya no wapulamo, e kutila, Lesa.
Bushe ukufwaisha ukulanshanya na Lesa kutiina fye imipashi ukwa buwelewele? Iyo! Lesa abumbile umuntu mu cata cakwe. Alibika muli ifwe ukukabila kwa fya ku mupashi. Ici cisanshamo ukufwaisha ukulanshanya na wene pamo nga Shifwe wa ku muulu. (Ukutendeka 1:27; Mateo 5:3) Na kuba, Lesa alikatamika ukulanshanya nankwe ica kuti etwa ati ‘Uumfwa ukupepa.’—Amalumbo 65:2.
Ifyo lyaba lishuko ukupepa ku Wa maka yonse! Ukulanshanya kwa pa mbali na shimucindikwa, pamo nga kateeka, kuti kwamonwa nge shuko ku bantu abengi. Nomba, Yehova Lesa e wapulamo mu bubumbo bonse! Kabili tatukabila ukupangana pa kulanda na wene. Kuti twapepa kuli wene inshita iili yonse kabili pa cifulo icili conse. Na kabili kuti twapepa kuli Lesa na mu mutalalila. (1 Samwele 1:12-15) Na lyo line, Yehova afwaya ukuti tube abafumaluka ilyo tulepepa kabili abacumfwila kuli wene. (Mika 6:8; Mateo 6:5-13) Na kuba, ukulanshanya kusuma kusanshamo ukulanda no kukutika, bushe te ifyo?
Bushe Mulakutika Kuli Lesa?
Bushe umuntu kuti akutika shani kuli Lesa? Ica kubalilapo kulabelenga Icebo cakwe, Baibolo wa Mushilo no kulabomfya ifyalembwa muli yene. (2 Timote 3:16; 2 Petro 1:20, 21) Yesu atile: ‘Umuntu abela umumi . . . ku cebo conse icifuma mu kanwa ka kwa Yehova.’ (Mateo 4:4) Bushe mulakutika kuli Lesa ukupitila mu kubelenga no kubomfya ifyalembwa mu Cebo cakwe?
Abo abalanshanya na Yehova lyonse alabasenamina kabili balaipakisha “no mutende wa kwa Lesa uwacila amatontonkanyo yonse.” (Abena Filipi 4:6, 7; Amapinda 1:33) Na kabili bakwata isubilo lya bumi bwa muyayaya muli paradise wa pe sonde umo bakalubuka ukufuma ku masakamika no kucula ifyo tupitamo ilelo. (Amalumbo 37:29; Yohane 17:3) Mwandini mwaliba icilambu cawamisha mu kubomfya amaka ya cipesha amano aya kulanshanya!
[Icikope pe bula 30]
Ukulanshanya na Lesa kusanshamo ukubelenga Baibolo no kupepa