Icacila Pa Kwalula Fye Ifintu

NGA ca kuti umuti tauletwala ifisabo fisuma, ubwafya te kuti bupwe pa kuputula fye imisambo imo imo. Mulingile ukutema uyu muti no kushuula imishila. Lyene kuti mwalimba umuti umbi, uwingatwala ifisabo fisuma.—Mateo 7:16-20.

E co, na baalula ifintu ukuti fiwame besha fye ukupwisha ifishibilo fya bubi bwaba mu bwikashi—pamo nga amafisakanwa, ulufyengo, ukubulwa ifikabilwa mu bumi, no bupuupu. Lelo bafwile ukucita ifyacila pa kupwisha fye amafya. Icilekabila ukwalulwa bwikashi fye bonse. Ifi e fyo Baibolo yalaya.

Ubufumu bwa kwa Lesa buteko bwa ku muulu ubukacita ifyacila pa kuteyanya fye cipya cipya ubwikashi bwa bantunse nelyo ukubwalula. Ubu buteko bukaletako inshila ipya iya kutekelamo abantu, kabili bukekatanya abantu bonse mu buteko bwa buko. Ubu buteko bukabombela pa fintu pamo nga masambililo, imilimo, amayanda, imiliile, ubumi, ne sonde.

Ilembo lya Amalumbo 72:12-14 lilondolola ifyo Mesia Imfumu akacitila abantunse, litila: “Pantu ipokololo mubusu uwakuuta, no mulanda, no ushikwete wa kumwafwa; ilililo bulanda umulanda no mubusu, ne myeo ya babusu ilapususha: ilubule myeo yabo mu kunyanyantilwa na mu kufyengwa.”

Lelo pa kuti mu calo mwiba amafisakanwa, ulufyengo, no kubulisha ifikabilwa mu bumi, te buteko bufwile fye ukwaluka, lelo na bantu bene bafwile ukwaluka. E co, Ubufumu bukasambilisha umuntu umo umo ifya kuba ne nsansa, imikalile isuma kabili iya kwikusha. Baibolo ilaya ukuti Ubufumu bwa kwa Lesa bukaafwa abekashi ba pe sonde ukwalula imibele yabo abene. Mu nshila nshi?

Ubufumu bukasambilisha abekashi ba buko inshila sha kwa Yehova Lesa, ne co cikabaafwa ukuba ne citetekelo no kutemwa. (Esaya 11:9) Ukutemwa Lesa kulenga umuntu ukwaluka. Ku ca kumwenako, mu nshita ya kutendeka kwa buKristu, Yesu akumene na Sakeo, umukalamba wa basangushi, uwalenonkela mu kuninika imisonko abantu balesonkela. Yesu tapatikishe uyu mulashi ashakwete bufumacumi ukuti aalule imibele yakwe no kumulenge nsoni pali ci. Lelo, Yesu a-afwile Sakeo ukumona icilubo cakwe no kulapila. Ukwishiba bwino bwino ifishinte fya mafunde ya bukapepa no kutemwa atemenwe Lesa fyalengele Sakeo ukwaluka apakalamba.—Luka 19:1-10.

Bushe iyi te nshila yacilapo ukuwama iya kupwishishamo amafya yaba mu bwikashi? Ubuteko bwapwililika kabili ubwalungama, bukasakamana abantunse kabili abantu umo umo bakafwaya ukwalula imibele yabo. Bushe pali ilya nshita tukakabila akabungwe ka kwalula ifintu? Iyo, pantu Lesa pali ilya nshita akaba nalenga fyonse ifipya. Ifintu fya kale fikaba nafiya.—Ukusokolola 21:4, 5.

[Icikope pe bula 30]

Ubufumu bwa kwa Lesa bwena bukaalula ifintu umupwilapo

[Icikope pe bula 31]

Ilyo ali pe sonde Yesu a-afwile abantu ukwalula imibele yabo