Abacaice Bepusha Ukuti . . .

Mulandu Nshi Cawamina Ukulakonka Amafunde ya mu Baibolo?

TUTILE uli na banobe babili abakashana ku sukulu mulelya ifyakulya. Umo pali aba bakashana alelolekesha umulumendo uwishile nomba line pa sukulu.

Umukashana umo akweba ukuti, “Nawishiba uyu mulumendo na kutemwa sana. Ifyo alekulolesha fye e filelanga ukuti na kutemwa. Awe talefumyako na menso pa ku kulolesha!”

Umukashana umbi na o akutotosha ati, “Ale mune, uyu mulumendo takwete umukashana wa kwenda nankwe!”

E lyo umukashana wa cibalilapo atila, “Cabipa ine nalikwata kale umwaume nyenda nankwe. Ala nga nine te kuti njikate na ku cani, kuti nasumina fye bwangu bwangu!”

Lyena umukashana wa cibalilapo alanda ifyo lyonse ushifwaya ukumfwa.

Atila, “Mulandu nshi na iwe ushingakwatila uwa kwenda nankwe?”

Ifi e fyo wacilaenekela ukuti e fyo alasosa. Ukuba kwena kuti watemwa umulumendo uwa kwenda nankwe. Lelo walisambilila kale ukuti cisuma ukulolela, ukufika lintu waipekanya ukupwa e lintu wingatendeka ukwishishanya na umo. Lelo nga te ifyo . . .

E lyo umukashana wa cibili atila, “Bushe ico ushilefwaila ni ku calici uya e ko bakulesha?”

E lyo waisosha auti, ‘Bushe acishiba ifyo ndetontonkanya?’

E lyo akupumya ati, “Iwe lyonse fye fya Baibolo, uli mwaice, ufwile uleisansamushako?”

Bushe balikupumyapo nge fi pa mulandu wa kukonka amafunde ya mu Baibolo? Nomba ilyo cacitike, wacitile shani?

◼ Walilondolwele bwino bwino ifyo wasambilila mu Baibolo.

◼ Walyumfwile ububi, lelo walyeseshe sana na maka ukulondolola ifyo wasuminamo.

◼ Ilyo abo usambilila nabo ku sukulu bakwebele ukuti waleipusula, waumfwile kwati balelanda icishinka.

Bushe waliipushapo ukuti, ‘Bushe ukukonka ifyo Baibolo ilanda kuicusha fye?’ Umukashana umo uwe shina lya Deborah na o alitontonkenyepo pali ici cipusho.a Atila: “Abanandi balecita fye fyonse ifyo balefwaya. Camoneke kwati takwali uo baletiina. Ukukonka ifyo Baibolo ilanda kwalemoneka kwati kwalyafya. Nasukile nalakonka ifyo abanandi ku sukulu balecita.”

Bushe Calilubana Ukutwishika Ifyo Lesa Afwaya?

Kalemba wa Baibolo Asafi inshita imo alitwishike nampo nga caliweme ukukonka ifyo Lesa alefwaya. Atile: “Pantu nafinwike abatakisha, ilyo namono mutende wa babifi.” Na kabili asosele ukuti: “Awe natile, Kanshi nasangulwilo mutima wandi ibusha, no kusambile minwe yandi ibusha mu kaele.”—Amalumbo 73:3, 13.

Kanshi, Yehova Lesa alishiba ukuti inshita shimo abantu kuti batwishik nga ca kuti caliwama ukukonka amafunde yakwe. E calengele Yehova ukusuminisha ifyaletontonkanya Asafi ukuba mu Baibolo. Pa numa, Asafi asalilepo ukukonka amafunde ya kwa Lesa no kuyamona nga yacilapo kuwama. (Amalumbo 73:28) Cinshi calengele ukuti Asafi asalepo ukukonka amafunde ya kwa Lesa? Icalengele, alikwete amano. Tasalile ukukonka amafunde ya kwa Lesa pa mulandu wa kuti aliculile, lelo ni co asambilile ku filubo fya bambi. (Amalumbo 73:16-19) Bushe na iwe kuti wacita cimo cine?

Ukusambilila ku Fyacitile Bambi

Ukupusanako na Asafi, Imfumu Davidi aliculile pa mulandu wa kukanakonka amafunde ya kwa Lesa. Davidi acitile ubucende no mukashi wa mubomfi wakwe, kabili alefwaya ukufisa ifyo acitile. Ifyo acitile fyalikalifye bambi kumo na Lesa, kabili aliculile nga nshi. (2 Samwele 11:1–12:23) Ilyo Davidi alapiile, Yehova alengele Davidi ukulembe inyimbo ishalangilile ukulapila kwakwe kabili shalilembwa na muli Baibolo pa kuti twingasambililako. (Amalumbo 51:1-19; Abena Roma 15:4) Kanshi caliwama ukusambililako ku fyo bambi balufyenye pantu e fyo na Malembo na yo yatweba.

Kanshi pa kuti ulepashanya Asafi e lyo no kukanakonka ifilubo Davidi acitile, umfwa ifyasosele abaice bamo ukufuma ku fyalo fyalekanalekana abo pa nshita imo balekele ukukonka amafunde ya mu Baibolo. Aba baice bacitile ubulalelale. Nga filya Davidi alapiile, na bo bene balilapile kabili nomba baliba na bucibusa busuma na Lesa. (Esaya 1:18; 55:7) Umfwa ifyo bashimika.

Loleni!: Bushe cinshi calengele ukuti utendeke ukucita ifyalubana?

Deborah: “Pa sukulu nalemona abanandi bonse balikwata abalumendo abo benda na bo, kabili balemoneka aba nsansa. Nga ndi na bo nalemona baleitomona no kukumbatana, kabili ici calengele ndekumbwa pantu nshakwete uwa kwenda nankwe. Ilingi line naikalile fye ukutontonkanya pa mulumendo natemenwe. Kanshi ici calengele ndefwaisha ukulaba nankwe no kulacita ifintu ukwabula ukusakamana ifingafumamo.”

Mike: “Nalebelenga bamagazini ne fitabo no kutamba amaprogramu ayalelanda pa bulalelale. Nga tulelanda na banandi pali ili lyashi nalefwaisha ukwishiba ifyo bacita. Nga ndi no mukashana, naletontonkanya ukuti calapelela fye pa kulanga icintemwa, tatwacite icili conse icabipa.”

Andrew: “Lyonse naletamba ifye shiku pa Intaneti. Natampile ukunwa sana ubwalwa. Kabili naleya ku kwangala ku maparte na banandi abashatemenwe ukukonka amafunde ya mu Baibolo.” Tracy: “Ilyo nali ne myaka 16, ico natemenwe sana, kulaba fye no mulumendo wandi epela. Kwena nalishibe ukuti ukulaala no mulumendo uo uushili mulume wandi cibi, lelo ifyo fine e fyo natemenwe ukucita. Nshalefwaya ukulaala no mwaume ilyo nshilaupwa, lelo nalifililwe, pantu pa nshita imo kampingu wandi alikunkwime.”

Loleni!: Bushe ilyo walecite fi wali ne nsansa?

Deborah: “Pa kubalilapo, nalefwaisha ukuba no buntungwa kabili nalitemenwe pantu nomba nalecita ifyo abanandi balecita. Lelo tapakokwele, natendeke ukuyumfwa uwakowela, naleumfwa kwati nali no mulandu kabili naleumfwa kwati nshacindama. Nali no bulanda sana kabili nalelila icankolele pantu nshali nacisungu na kabili. Ukufuma palya pene, ilingi line ndaipusha ukuti, ‘Bushe nine nacitile filya?’ Na kabili ndaipusha ukutila, ‘Cinshi, kanshi cinshi nasuulile amafunde ayasuma aya kwa Yehova?’”

Mike: “Natampile ukumfwa kwati ulubali lumo ulwa mubili wandi lwa lifwile. Nalishibe ukuti ifyo nalecita fyalekalifya bambi, lelo nalifililwe ukuleka. Calenkalipa sana nga naibukisha ukutila ifyo nalecita pa kuti nsansamuke, nalelenga na bantu bambi ukumfwa ububi. Nshalelala. Ukufwaisha kwa kulala no mukashana kwaile kulepwa panono panono, kabili nalelunguluka sana mu mutima no kumfwa insoni pa fyo nalecita.”

Andrew: “Mu kupita kwa nshita calyangwike ukucita ifyalubana. Lelo pa nshita imo ine, naleyumfwa uwa mulandu kabili nshali ne nsansa.”

Tracy: “Tapakokwele natendeke ukumona ububi ubwali mu fyo nalecita. Imyaka yandi iya mu bukashana yalyonaike pa mulandu wa bulalelale. Naletontonkanya kwati ine no mulumendo twaleenda nankwe twaleangala fye. Lelo tatwaleangala fye iyo. Twasukile twailetelela. Nalelila ubushiku bonse, naleti kanshi nga nalikonkele amafunde ya kwa Yehova.”

Awake!: Finshi wingeba abaice abatontonkanya ukuti amafunde ya mu Baibolo yalikosa ukuyakonka?

Deborah: “Ubumi bobe tabwakabe bwino nga taulekonka amafunde ya mu Baibolo. Uleibukisha ifyo Yehova akayumfwa nga ulekonka ukufunda kwakwe. Na kabili tontonkanya pa bubi bwingafumamo nga taulekonka ukufunda kwakwe. Ibukisha ukuti, te iwe weka wingacula. Na bantu bambi kuti baculilamo. Na kabili nga ca kuti wasuula ukufunda kwa kwa Lesa, ukailetelela.”

Mike: “Ca cine, abanobe kuti balemoneka kwati baliba ne nsansa. Lelo ulingile ukutontonkanyapo sana ilyo taulacita fimo. Yehova afwaya waba uwacindama kabili uwa kaele. Ifi fyaba pa fintu ifyo akupeela. Ukupoosa ifyo fya bupe pa mulandu wa kuti wafilwa ukutekanya cimo no kuishitisha pa mutengo uwanaka nga nshi. Landa na bafyashi bobe na bantu bambi abengakupanda amano yasuma pa mafya ukwete. Nga ca kuti walufyanya, wipoosa inshita ukulandapo no kupwisha ubu bwafya. Nga ca kuti ulekonka amafunde ya kwa Yehova, ukaba no mutende wine wine.”

Andrew: “Mu bwaice, kuba fye ukutontonkanya ukuti abanobe bena balaba ne nsansa. Kuti watampa ukucita ifyo bacita. E co caliwama wasala bwino abanobe. Cetekela Yehova, kabili ukaipususha ku macushi ayengi.”

Tracy: “Wilatontonkanya ukutila, ‘Teti cincitikile.’ Bamayo banjebele ukutila ifyo nalecita fyali no kundetelela. Nalikalipe! Naletontonkanya ukuti nalishibe ne mwine ifyo nalecita. Kanshi nalelola fye mumbi. Ulekonka amafunde ya kwa Yehova, kabili uleangala na bantu bambi abacita cimo cine. Ukaba ne nsansa nga ulecita ifyo.”

Bushe Amafunde ya mu Baibolo Yalikosa, Nangu Bushe Yalatucingilila?

Nga ca kuti abanobe balekupumya pa mulandu wa kuti ulakonka amafunde ya mu Baibolo, ipushe we mwine ukuti: ‘Cinshi bakaanina ukukonka amafunde ya mu Baibolo ayalanda pa mibele isuma? Bushe balitala ababelenga Baibolo no kusanga ubusuma bwaba mu kukonka amafunde ya kwa Lesa? Bushe balitontonkanyapo pa bubi bwaba mu kukanakonka ayo mafunde? Nangu bushe, bakonka fye ifyo bonse balecita?’

Ufwile walishibako abantu bamo ‘abakonka fye cinabwingi.’ (Ukufuma 23:2) Bushe iwe taufwaya ukuti ulepingula bwino? Kuti wacita shani ifyo? Kuti ulepingula bwino nga uleumfwila ukufunda kwa mu Baibolo ukwa ‘kushininkisha we mwine icabo kufwaya kwa kwa Lesa icisuma kabili icapokelelwa kabili icapwililika.’ (Abena Roma 12:2) Yehova ni “Lesa wa nsansa,” kabili afwaya na iwe wine waba ne nsansa. (1 Timote 1:11; Lukala Milandu 11:9) Amafunde ayaba mu Baibolo kuti yalenga wanonkelamo. Ca cine, kuti ulemona kwati yalikosa ukuyakonka kabili kuti ulemona kwati tayalenga ube no buntungwa. Lelo, ukulanda fye icishinka, amafunde ya mu Baibolo yalatucingilila.

Cine fye, kuti wacetekela Baibolo. Nga wasalapo ukulakonka amafunde yabamo, kuti walenga Yehova ukuba ne nsansa kabili kuti wainonsha na we mwine.—Esaya 48:17.

Ifipande na fimbi ifitila “Abacaice Bepusha Ukuti . . .” filasangwa pa intaneti pa www.watchtower.org/ype

[Futunoti]

IFYA KUTONTONKANYAPO

◼ Cinshi limbi icingalenga wafilwa ukulakonka amafunde ya mu Baibolo?

◼ Mulandu nshi ulingile ukushininkisha we mwine ukuti ukukonka amafunde ya kwa Lesa kwaliwama nga nshi?