Ukulingana na Baibolo

Cinshi Tulingile Ukusungila Bwino Isonde?

IFYO abantu bacita pali ino nshita kuti fyaonaula isonde lyesu ukucila fye ne fyo cali kale. Ukukaba sana ukwa lwelele, ukwa fibemba, e lyo no kukaba kwa mushili kuletiinya abantu abengi nga nshi. Kanshi basayantisti, aba mu buteko, e lyo na bapanga ifyakupangapanga, balebombesha sana ukucitapo fimo.

Bushe ifwe pa lwesu tulecitapo fimo ukusunga bwino isonde? Bushe tulabikako sana amano? Baibolo ilatweba imilandu isuma iyo tufwile ukusungila bwino isonde. Na kabili ilatweba napo tulingile ukupelela.

Ukukonka Ifyo Uwatubumbile Afwaya Tulecita

Yehova Lesa apangile isonde ilyayemba umo abantu bali no kulaikala. Atile imilimo yakwe yonse yaali ‘iyawamisha’ kabili apeele abantu umulimo wa “kulima [isonde] no kulilinda.” (Ukutendeka 1:28, 31; 2:15) Bushe Lesa omfwa shani pali fi isonde lyaba pali ino nshita? Ukwabula no kutwishika alomfwa ububi nga amona ifyo abantu bashasunga bwino isonde, pantu pa Ukusokolola 11:18 patila Lesa “akonaula abaleonaule calo.” Kanshi tufwile ukubika amano ukulasunga bwino isonde.

Baibolo itweba ukuti fyonse ifyo abantu baleonaula, Lesa akafiwamya ilyo ‘akalenga ifintu fyonse ifipya.’ (Ukusokolola 21:5) Kanshi tatufwile ukutontonkanya ukutila ifi Lesa akawamya isonde tatulingile ukubikako amano ku kulalisunga bwino. Tukalubulwilapo pa fyo tucita! Lesa afwaya isonde ukuba paradaise, eco bushe kuti twacita shani pa kulanga ukuti tulafwaya likabe ifyo afwaya?

Ifyo Twingacita pa Kulenga Isonde Ukuba Ilya Busaka

Ificita abantu cila bushiku filakowesha isonde. E co ku mano yakwe Yehova abikileko imiceele yalekanalekana pa kuti ilesangulula umwela, amenshi, no mushili. (Amapinda 3:19) Ifyo tulecita fifwile ukulanga ukuti tulatasha ifyo ateyanya ifintu pe sonde. Kanshi tatulingile ukukowesha isonde ku mufulo. Nga twacite fyo tukalanga fye ukuti twalitemwa abanensu nge fyo twaitemwa. (Marko 12:31) Tontonkanyeni pali cimo ico abantu kale babebele ukucita. Ili lyashi lyaba mu Baibolo.

Lesa aebele abena Israele ukushiika ubusali ubwalefuma mu bantu “ku nse ya nkambi.” (Amalango 23:12, 13) Ukucite fyo kwalelenga inkambi ukuba iya busaka, kabili ukushiika ubusali kwalelenga filebola bwangu. Abena Kristu ba cine nabo bene e fyo bacita, balabikako amano ukupoosa ifisoso ne fiko fimbi bwangu bwangu kabili tabafipoosa icipoosepose. Mufwile ukupoosa bwino ifintu ifingaleta ubusanso.

Ifintu fimo ifyo abantu bapoosa kuti bafibomfya na kabili nelyo ukupangako ifintu fimbi. Nga ca kuti mu calo cenu lifunde ukutwala ifisoso ku bapangilamo ifintu fimbi, ukucite fyo ninshi kupeela “ifya kwa Kaisare kuli Kaisare.” (Mateo 22:21) Ni ncito ukulakolonganya ifintu fimo ifyo mulefwaya ukupoosa no kutwala ku balefwaya ukufibomfya na kabili, lelo nga mwacite fyo ninshi mufwaya isonde ukuba ilya busaka.

Ukusunga Bwino Ifyaba pe Sonde

Pa kuti tube abatuntulu tulekabila ukukwate ifya kulya, umwa kwikala, no mulilo, nomba fyonse ifi fifuma ku fintu Lesa apanga. Ifyo tulebomfya ifyo fintu e filanga nga ca kuti tulatasha kabili twalishiba ukuti Lesa e watupeela. Ilyo abena Israele bali mu matololo, baali ne nkasha. Yehova abapeele inkwale ishingi nga nshi. Lelo abantu baali na kaso ica kuti batoolele inkwale shingi nga nshi ukucila ne sho balingile ukutoola. Ifi bacitile fyalengele Yehova Lesa ukufulwa. (Impendwa 11:31-33) Lesa tayaluka ukushinta na lelo. Abena Kristu ababika amano ku fyo Lesa atupeela tabafibomfya bubi bubi, pantu nga tabalefibomfya bwino ninshi kuti baba no bufunushi.

Bambi kuti bamona kwati bafwile fye ukubomfya amalaiti, inkuni, nelyo amalasha apo balefwaila fye. Nangu ca kutila kuti twakumanisha ukushita ifi fintu nelyo fyalifula sana ica kuti no kushita tatushita, tatufwile ukufibomfya bubi bubi. Ilyo Yesu alishishe abantu abengi mu cipesha amano, abebele ukulonganika isabi no mukate ifyasheleko. (Yohane 6:12) Talefwaya ukonaula ifyo Wishi abapeele.

Tulingile Ukwishiba Apa Kupelela

Ifyo tucita cila bushiku, kuti fyalenga isonde ukuba ilya busaka nangu iyo. Bushe tufwile ukulafwaya ukuba no busaka ica kuti twalafwaya no kutaluka abantu banensu abo tulemona kwati bekala mu cifulo umwaba ifiko? Takwaba muli Baibolo apo Lesa asuminisha ukucite fyo. Ibukisheni ifyo Yesu alecita. Ilyo ali pa calo aleikala fye nge fyo abantu bonse bekala, kabili ici calengele ukuti apwishishishe umulimo Lesa amupeele uwa kushimikila. (Luka 4:43) Na kabili, Yesu talebombela pamo na ba mu mapolitiki pa kuti afwilisheko ukupwisha amafya ayakumine abantu. Alandile ukuti: “Ubufumu bwandi te bwa pano calo.”—Yohane 18:36.

Kanshi caliba bwino pa kushita ifya pa ng’anda twasala bwino, tulesala bwino ifya kwendelamo, ne fyangalo tusalapo ukwangala pa kuti twilasafya nelyo ukukowesha apo tuleikala. Ku ca kumwenako fye, bamo basalapo ukushita ifintu ifishisafya sana apo baleikala. Bambi nabo balesha na maka ukuleka ukubomba sana imilimo iikowesha nelyo iyonaula ifyo Lesa apanga.

Takuli abafwile ukupatikisha abanabo ukucita ifyo bena balefwaya pa kusunga isonde ilya busaka. Ifyo abantu bacita filapusanapusana, kabili na kuntu bekala nako kwalipusanapusana. Lelo ico tufwile ukwishiba ca kuti conse ico cila muntu apingulapo ukucita akalubulula kuli Lesa. Baibolo yena itila, “umo umo ali no kusenda icipe cakwe umwine.”—Abena Galatia 6:5.

Lesa apeele abantunse umulimo wa kusakamana isonde. Ukutasha Lesa pali uyu mulimo atupeela, no kumucindika, e lyo no kucindika ifyo apanga kuti fyalenga twalabikako sana amano ku kusunga bwino isonde lyesu.

BUSHE MWALITALA AMUTONTONKANYAPO?

◼ Bushe Lesa akacitapo cimo ifi isonde lyaba muno nshiku?—Ukusokolola 11:18.

◼ Mulimo nshi Lesa apeela abantu?—Ukutendeka 1:28; 2:15.

◼ Cinshi ico Yesu Kristu acitile, ico na ifwe tulingile ukupashanya, icilanga ukuti talefwaya ukulaonaula ifintu?—Yohane 6:12.