Ifipusho Ukufuma Ku Babelenga

Cishingamo nshi cintu Abena Kristu bakwata mu kunashako ukukowesha kwa fyatushinguluka—impanga, bemba, no mwela?

Nge Nte sha kwa Yehova, twaliba abayangwako mu kushika ku mpika ishingi isha kwampana kwa fyashingulukako isho nomba shileambukila umushi wesu uwe sonde. Ukucila pa bantu abengi, tulatesekesha ukuti isonde lyabumbilwe ukuba umushi wasanguluka, uwa butuntulu busuma ku lupwa lwa buntunse ulwapwililika. (Ukutendeka 1:31; 2:15-17; Esaya 45:18) Twalikwata na kabili ukwebekesha kwa kwa Lesa ukwa kuti “akonaula abaleonaule calo.” (Ukusokolola 11:18) Cili kanshi icalungama ukucita ukubombesha kwashikatala, ukwabamo ukupelulula ukusengauka ukulunda mu kukanakabilwa ku konaula kwa muntu ukulecitika ukwa cibulungwa cesu. Mona, nangu cibe fyo, inumbwilo ‘ukubamo ukupelulula.’ Cili na kabili icalinga mu Malembo ukuibaka ku kusuminishe fikansa fya kwampana kwa fyashingulukako ne fibelesho ukuba ifya kwangwako fyesu fyacishamo.

Nelyo fye mikalile ya lyonse iya buntunse ilaletako ubusali. Ku ca kumwenako, ukukula, ukupekanya, no kulye fisabo fya fya kulya ilingi line kuletako busali, nangu cingati ubwingi ubwa fyene fisungulukila mu mushili. (Ilumbo 1:4; Luka 3:17) Ica kulya ce sabi ilyakangwa cintu Yesu wabuushiwe acitile abasambi bakwe mu kupalako cafuminemo icushi cimo, imito, ne fisooso fya mafupa ye sabi. (Yohane 21:9-13) Lelo imibombele ya fipeema ne fishipeema nelyo ukushinguluka kwe sonde fyapekanishiwa ukupokelela ifya musango yo.

Abantu ba kwa Lesa tabalingile ukukanaba abashaibukila ulwa milandu ya kwampana kwa fyashingulukako. Yehova afwaile abantu bakwe aba pa kale ukubuule ntampulo sha kushiko busali, intampulo isho shakwete ubupilibulo bwa kwampana kwa fyashingulukako no bwa fya busaka. (Amalango 23:9-14) Kabili apantu twalishibe mimwene yakwe iya abo abaleonaule sonde, tatulingile mu cishinka ukusuulako ifintu ifyo twingacita ku kusunga ifyashingulukako ifya busaka. Kuti twabelebesha ici mu kupoosa kwalinga ukwa fisooso nelyo busali, ukucilisha ifintu fya busungu. Mu kusakamanishisha tubombela pamo ne mibombele ya kubomfya cipya cipya ku mifwaile imbi ifyabomfiwapo kale, ukukwato mulandu walundwapo ku kucite fyo nga ca kuti fyapeelwe nsambu na Kaisare. (Abena Roma 13:1, 5) Kabili abantu bamo bamo bafumya ukwikushiwa ukufuma ku kubuula intampulo shalundwako, pamo ngo kusala ukubomfya ifya kufumamo fya kusungulukila mu mushili ukucila ifyo ifingalunda ku miina ya fisooso pa mushili na pe samba lya babemba.

Icipimo kuntu Umwina Kristu akafika muli iyi ntunga, nangu cibe fyo, uli mulandu wa pa lwakwe kano nga ca kuti cafwaikwa ne funde. Calibe caumfwika ukufuma mu fya kusabankanishishamo amalyashi ukuti abantunse abashapwililika mu kwanguka balawila mu citeyo ca kuba abacishamo. Ukupanda mano kwa kwa Yesu mu cishinka kuli ukwaampanako: “Mwipingula, ukuti mwipingulwa . . . Nga cinshi ulolesesha aka kutobola akali mu linso lya kwa munonko, lelo icipampa icili mu linso lyobe taucimona?” (Mateo 7:1, 3) Ukusunge ci mu muntontonkanya kuti pambi kwatwafwa ukukanalufya imimwene ya fya kusangwilako fimbi ifyakatama.

Kasesema Yeremia alembele ukuti: “Mwe Yehova, ninjishibo kuti te kwa muntunse ukwenda kwakwe; te kwa muntu uuleya ukushikimika amatampulo yakwe.” (Yeremia 10:23) Ukusuulako ici cishinte kwalileta umutundu wa muntu mu kulolenkana ne “nshita ishayafya,” nga fintu camonwa pali 2 Timote 3:1-5. Kabili cintu Lesa alembele pa Ukusokolola 11:18 cishininkisho kuti ukubombesha kwa buntunse ku kufumya pe sonde impika shikalamba ishaliko isha kwampana kwa fyashingulukako, ukusanshako ukukowesha, takwakatunguluke mu kukumanina. Kuti pambi kwabako ukulunduluka kumo, lelo ukupikulula kubelelela kweka fye kufwaya ukucilima kwa kwa Lesa.

Pali uyu mulandu tutontomesha ukubombesha kwesu no bukumu pa kupikulula kwa bulesa, ukucila ukulaesha ukunashako ifishibilo fya pa mulu. Muli ici tukonka ica kumwenako ca kwa Yesu, uwabomfeshe iciputulwa cikalamba ica butumikishi bwakwe ‘ukushimikile cine ubunte.’ (Yohane 18:37) Mu cifulo ca kuliisha icalo nelyo ukundapa amalwele ya pa cipimo casaalala—ukusanshako ukukowesha—Yesu asontele ku kupikulula kwapwililila ku mpika shilecululusha umutundu wa buntunse.—Yohane 6:10-15; 18:36.

Ilintu ukutemwa kwa ku bantu banensu kutusesha ku kusengauko kukowesha mu kukanakabilwa impanga, ulwelele, nelyo ukupayanya kwa menshi, tutwalililo kucitilo bunte ku cine. Ici cibimbamo ukusambilisha abantu ukubomfya icine ca Baibolo na muli ifyo ukusengauka ukonaule mibili yabo ku cushi, ifya kunwa fikola ifyacishamo, nelyo imiti ikola iya konaula. Apo amamilioni abapya balisanguka abasambi, balisambilile fibelesho fya busaka no kulangulukilako bambi. E co umulimo wa kushimikila walicita ukusangwilako kwa cine cine ku kucefyako impika ya cinkumbawile iya kukowesha ilelo. Lelo icacilapo kucindama, abasambi ba Bwina Kristu balaibikilishako ukwalula ubuntu bwabo ne fibelesho nomba pa kuti bakalinge mwi sonde lyasanguluka ilya Paradise lintu Lesa mu kwangufyanya akapayanishisha bakapepa bakwe aba cine.