Ukunukula Ukukowesha Ukufuma mu Mutima na mu Muntontonkanya

YEHOVA tapeele abantunse ukufuluka kwa fiko nelyo icimfulumfulu. Umushi wabo planeti wapangilwe ku kuba paradise wa busaka, umuyano, no kuyemba. Lesa tafwaile ukuti ibotelele ukufika ku kuba icishala ca fisooso icabipa ukuloleshapo.—Ukutendeka 2:8, 9.

Nangu cibe fyo, pa numa lintu abantunse bakeene ubutungulushi bwa bulesa, batendeke ukukuula umusango wabo uwa muyano wa calo. Ukwabula ukumwenamo kwa mano ya bulesa no kubulisha ukubelesha, balipatikishiwe ukusambilila mu kweshaesha. Ilyashi lya kale ilya ku calo likosha icine ca Baibolo ica kuti abantunse tabengaiteka abene beka mu kutunguluka; pa makana ya myaka “abantu bacito lukambo ku bantu ku kubabifya.” (Lukala Milandu 8:9; Yeremia 10:23) Impika ya muno nshiku iya kukowesha, mu misango ya iko yonse, ca kufumamo ca kuteka bubi bubi kwa buntunse.

Ukupokelela Imimwene ya kwa Lesa

Abantu abafwaisha ukutemuna Lesa baleesha na maka ukwikalilila ku fipimo fya kwa Kabumba ifya busaka. Muli ifyo, Inte sha kwa Yehova balilolenkene ne mpika lintu Ibungano lya pa kati ka nko lyatantikwe ukubela mu Prague, Czechoslovakia, pa kati ka 1991.a Mupepi na bantu 75,000 baali no kusangwako, ibumba lintu icibansa ca Strahov cali na maka ya kwingisha bwino bwino fye. Lelo icibansa tacabomfiwepo pa myaka isano. Calibongolweke icabipisha, cali cinakabupalu ca misango ya micele icabipa ukuloleshapo. Inte sha kwa Yehova bamo 1,500 bapoosele ukucila pa maawala 65,000 mu kuwamya no kupenta cene cipya cipya. Ukufika pa nshita ye bungano iyi kampeini ya kuwamya yali naipanga icibansa icifulo cawamina umwa kupepela Lesa wa cine, Yehova.

Cinshi cikunta Inte sha kwa Yehova ukuba abapusanako, ilintu icalo mu cinkumbawile cilanga ukutesekesha kunono ku busaka no muyano? Ukutesekesha ukufunda kwa Baibolo ukwa kuti Abena Kristu balingile ukunukula imisango yabipa, pamo nga kaso, ukukanalangulukilako, ukufunuka, no kubulisha ukutemwa. “[Fuleni] ubuntu bwa kale pamo ne micitile ya buko,” e fisosa Baibolo. Pyanikenipo “ubuntu bupya, ubo mu kwishiba bulelengwa cipya cipya nge cipasho ca kwa Kalenga wa buko.” Ubuntu ubwaishibikilwa ku kutemwa kwa busaka, umuyano, no kuyemba tabwakwata incende ya kukongama kwa kukowesha.—Abena Kolose 3:9, 10; 2 Abena Korinti 7:1; Abena Filipi 4:8; Tito 2:14.

Ubuntu bupya bufwaya ukuti Abena Kristu babe abaibukila ku kukowesha, te kukowesha apabulo mulandu nelyo mu kubulwe cumfwila ukusuula amafunde ya kulesha ukukowesha yantu amakamfulumende yapanga. Cilabaafwa ukusengauka ukupokelela imibele ya mutima iya kuposaikaposaika, akaso, no bunaŋani iingatungulula ku kusafya. Pa kusumbulo mucinshi ku fikwatwa fya bambi, cilafumyapo ukulembaula nge nshila ya kuilumbulwilamo, ngo musamwe wa kaele, nelyo ngo musango wa kusengulwilamo. Cifwaya ukuti amayanda, bamotoka, ifya kufwala, ne mibili fisungwe ifya busaka.—Linganyako Yakobo 1:21.

Ukulosha ku bantu bashili abaitemenwa ukufwala ubu buntu bupya, bushe icilubo kuti casangwa na Lesa pa kubacilikila ukufuma ku bumi muli Paradise yakwe iileisa? Nakalya! Uuli onse uukaba acili nakwata ukukongama kwa kukowesha ukufyantikwa mu mutima wakwe atemwa mu muntontonkanya kuti atiinya ukuyemba kwabweshiwa ukwa Paradise ukwa planeti Isonde, ukulenga ubulanda bukalamba kuli abo abafwaya ukusungilila kwene. Ukupingulapo kwa kwa Lesa ukwa “konaula abaleonaule calo” kwaba ponse pabili ukwalungama kabili ukwabamo ukutemwa.—Ukusokolola 11:18; 21:8.

Ukwakanamo Kwacincila?

Bushe ici cilepilibula, nangu cibe fyo, ukuti Abena Kristu balafwaikwa ukutwala pa ntanshi incitilo sha kulesha ukukowesha nelyo isha kuwamya?

Ukukowesha mu kulengama kwaba kwa kucena ku butuntulu bwa bumi na ku kucingililwa kwa cintubwingi. Yehova alikwata ukwangwako kwalinga pa lwa milandu ya musango yo, nga fintu twingamona ukufuma ku mafunde yantu apeele Abena Israele. (Ukufuma 21:28-34; Amalango 22:8; 23:12-14) Lelo tabalile pa nshita iili yonse abakambisha ukwalula abantu bambi pa milandu ya kucingililwa kwa cintubwingi; nangu fye Bena Kristu ba mu mwanda wa myaka uwa kubalilapo tababalile abebwa ukucite fyo.

Ilelo, imilandu ya fyashingulukako kuti mu kwanguka yasanguka ifikansa fya bupolitiki. Na kuba, utubungwe tumo utwa bupolitiki twalipangwa mu kulungatika ku mifwaile ya kupikulule mpika sha fyashingulukako. Umwina Kristu uuisuminisha ukusongwa umwalola ukutontonkanya kwa bupolitiki tali na kabili uushibuulamo lubali mu mapolitiki. Yesu aimikile abasambi bakwe icishinte ca kuti: “Tabali ba pano isonde, ifyo na ine nshili wa pano isonde.” Umwina Kristu uwasuula ici cifwaikwa alaba mu busanso bwa kuba mu mutande umo wine na “bakateka ba bwikashi buno abalefubalila.”—Yohane 17:16; 1 Abena Korinti 2:6.

Yesu taeseshe ukupikulula impika shonse isha kwangalila capamo isha mu kasuba kakwe; nangu kweba abasambi bakwe ukucite fyo. Ikambisho lyakwe kuli bene lyali lya kuti: “E ico kabiyeni, kalengeni aba nko shonse ukuba abasambi, [mulebabatisha] . . . , mulebasambilisha ukubaka fyonse ifyo namwebele.” Tabakambishe pa lwa mafunde ya fyashingulukako.—Mateo 28:19, 20.

Ukulondolola icilingile ukwisa intanshi mu bumi bwa Mwina Kristu, Yesu asosele ukuti: “Lelo mubale mufwaye ubufumu bwa kwa Lesa no bulungami bwakwe.” (Mateo 6:33) Lintu Yehova, ukupitila mu Bufumu bwa buMesia, abika mu kubomba ifishinte fyakwe ifyalungama pa cipimo ca mu cibulungwa, impika sha fyashingulukako shikapikululwa mu kubelelela kabili ku kwikushiwa kwa bonse.

Muli ifyo, Inte sha kwa Yehova babuula ukwiminina kwashikatala. Mu cilolwa ca Abena Roma 13:1-7, caliba cipope ukuti mu kusakamanisha bomfwile amafunde ya kamfulumende ayalama ifyashingulukako. Mu kulundapo, ukutemwa kwa bukapepa ukwa mwina mupalamano kulabasesha ku kulanga umucinshi ku fikwatwa fya bambi—ifya cintubwingi nelyo ifya bantu fye—pa kukanaonaula imimonekele ya ciko na pa kukanaposaika fisooso iciposepose. Lelo mu kumfwika tabakambishiwa ukubuula ubutungulushi mu ncitilo sha kuwamya isha ku calo. Mu kulungika balabika ukushimikila ubukombe bwa Bufumu bwa kwa Lesa intanshi, ukwishiba ukuti iyi e nshila ya kucitilamo ubusuma bubelelela.

Ukuwamya kwa ku Mupashi

Abena Israele ba pa kale balisokelwe mu kubwekeshabwekeshapo ulwa fya kufumamo nga ca kuti bakoweshe isonde ukupitila mu kusuumya umulopa, pa kupokelela umusango wa bumi bwa bucisenene, nelyo pa kulangisha ukubulwo mucinshi ku fintu fyashila. (Impendwa 35:33; Yeremia 3:1, 2; Malaki 1:7, 8) Icacindamisha, balisenwikwe pa mulandu wa uku kukowesha kwa ku mupashi, te pa mulandu wa kukowesha ukuli konse ukwa ku mubili uko pambi bakwatileko mulandu.b

Cili, kanshi, kukowesha kwa ku mupashi nelyo ukukanasanguluka e kuntu Umwina Kristu ilelo atukusha maka maka ukusengauka. Ici acita pa kufwala “ubuntu bupya,” ubunukula ukukongama kwa kukowesha ukufuma mu mutima na mu muntontonkanya. Ukucila pa mamilioni yane aya Nte sha kwa Yehova balemwenamo ukufuma muli uku kuwamya kwa ku mupashi, ukupwishishisha mu kati ka mitande yabo ukusanguluka kwa butotelo no kwa mibele isuma, pamo pene no busaka bwa ku mubili ubwamonekesha.—Abena Efese 4:22-24.

Ilelo ili ni nshita ya kampeini wa kuwamya kwa ku mupashi. Kampeini wa kuwamya kwa ku mubili mu kusaalala kwe sonde akakonkapo mu nshita yalinga kabili akapususha umushi wesu ukufuma ku kuba icishala ca fisooso ica mu cibulungwa conse pa kucipeela ifyashingulukako fyalubukako ku kukowesha ifyo ifyaciwamina.—Lukala Milandu 3:1.

[Amafutunoti]