Sekeleleni mwi Sonde Lyasanguluka Ilili ku Ntanshi!
FINTU twingaba aba nsansa ukuti Yehova, Lesa wa muyano no busaka, akafikilisha imifwaile yakwe iya kutendekelapo ukwalwile sonde muli paradise ya cibulungwa! (Esaya 11:6-9) Alayo kuti: “Icebo candi icifuma mu kanwa kandi: tacakabwelele ibusha kuli ine, kano cacite co natemwa, no kushuka muli ico nacitumina.” “Lesa te kuti abepe,” (NW) e co aya tayali mashiwi yabulwamo akantu.—Esaya 55:11; AbaHebere 6:18.
Kuti twailululwa pa kuti Yehova mu kutemwa akanyantukilamo ilyo abantunse tabalafika pa cipimo ca kukanabwela, apo ukubongoloka konse ukwa kwampana kwa fyashingulukako kuti kwaba ukushingasengaukwa!—Ukusokolola 11:18.
Yehova akafumyapo abakowesha bashilapila, abakowesha apabulo mulandu na bantu abasuulako mu bupondoshi ifishinte fyakwe ifya muyano no busaka. Takuli nangu umo uukasuminishiwa ukubika mu busanso Paradise yabweshiwa.—Amapinda 2:20-22.
Mu kati ka kuteka kwa Bufumu bwa kwa Lesa, pe samba lya kutungulula kwa kwa Kristu Yesu, abantunse bakasambilishiwa ifya kunukula ifilenga ukukowesha kwa ku mubili fyonse ifyashala. Lilya—te nomba—e lintu cikaba ice pamfya ukuti ababomfi ba kwa Lesa bonse babimbwamo mu kucincila mu ncitilo sha muntu pa lwakwe ne sha kubomba nge bumba isho ishikasangwila ku kuwamya kwa mu cibulungwa conse ukushabala akucitika.—Linganyako Esekiele 39:8-16.
Bakapusunsuka ba mpela ya micitile ya fintu iibifi iilipo bakatungilila iyi programu ya kuwamya iya ku mubili mu kuba no kuipeela kumo kwine no kucincimuka nga fintu bacita muli kampeini ya kuwamya kwa ku mupashi iya lelo.—Ilumbo 110:3.
Isonde lyasangululwa lili ilyashininkishiwa ukwisa, ukuluminishiwa na kampeini ya kuwamya iyakulisha iya nshita shonse, iilepwishishiwa no Bufumu bwa kwa Lesa. Imilondo yonse iya kukowesha ikafumishiwapo. Takuli fya kulembaula. Takuli na kabili imisukupala yaposaikwa, ifikopo, imifuko ya plastiki, ifya kupombamo switi ya bulimbo ne ya kumoŋona, amanyunshipepala, na bamagazini ukusafya ululamba ululi lonse ulwa bemba nelyo icifulo capala paradise.
Sekeleleni mwi sonde lya busaka ilili ku ntanshi!
[Icikope pe bula 7]
Bushe ukalayakanamo mu kuwamya kwa mu cibulungwa conse ukuleisa?