Lesa Alitemwa Abantu Aba Busaka

“Abafyashi abengi balasambilisha abana babo ukulasamba ku minwe, ukusuka imbale, ukupyanga ulubansa no kupoosa ifisoso.” Na lyo line uwatweba ukuba aba busaka ni Lesa wesu uwa mushilo. (Ukufu. 30:18-20; Amala. 23:14; 2 Kor. 7:1) Nga tulesunga imibili yesu ne fya kufwala fyesu ifya busaka ninshi tulecindika Yehova. (1 Pet. 1:14-16) Finshi fimbi ifyo tulingile ukucita pa kuti tulelanga ukuti tuli ba busaka? Tatulingile ukulapoosa icipoosepoose ifisoso mu misebo na mu ncende shimbi nge fyo abantu bambi bacita, Abena Kristu balabombesha ukulasunga isonde ilya busaka. (Amalu. 115:16; Ukus. 11:18) Tulingile ukuba aba busaka na mu tuntu fye utunono. Ku ca kumwenako tatulingile ukulapoosa utupepela twa switi, aisi buloko, ifikopo, amabotolo nangu cungamu apali fye ponse. Muli fyonse ifyo tucita tulingile ‘ukulalanga ukuti tuli babomfi ba kwa Lesa.’—2 Kor. 6:3, 4.

TAMBENI VIDIO ITILA LESA ALITEMWA ABANTU ABA BUSAKA, LYENA ASUKENI AMEPUSHO YAKONKAPO:

• Finshi bamo balanda ukuti e filenga belasunga ifipe fyabo ifya busaka?

• Bushe Amafunde ya kwa Mose yalanga shani ifyo Yehova amona ubusaka?

• Bushe ukuba aba busaka kuti kwalenga shani twabila imbila nsuma ku bantu ukwabula ukulanda nabo?