Nomba Line Fye Ulukaakala ‘Talwakabeko’

“Pashala panono, e lyo umubifi takabepo.”—AMALUMBO 37:10.

YEHOVA LESA uwatubumbile, alibikako sana amano ku bantunse, taitalusha kuli bene nge fyo bamo batontonkanya. (Amalumbo 11:4, 5) Na kabili alamona ulukaakala lonse no lufyengo ifyo abantu bacita, ukubikapo ne fyo fwe bantunse tushimona. “Amenso ya kwa Yehova yali mu ncende shonse, yalacefya ababi na basuma.” (Amapinda 15:3) Kanshi te kuti mutwishike no kutwishika ukuti ababifi baba ‘umwatelela.’—Amalumbo 73:12, 18.

Lelo abalungama na bakwata imibele iisuma, nangu ca kuti bapiina kabili balabatitikisha, kuti basubila ukwisaikala bwino ku ntanshi. Kemba wa malumbo Davidi atile, “Lolesho wa bumpomfu, kabili mono watambalala; pantu kuli inkonkani ku muntu wa mutende.” (Amalumbo 37:37) Ayo mashiwi ya kukoselesha icine cine kuli ifwe, pantu twalikwata isubilo lya kumonako uko ifi fikacitika nomba line fye.

Tuleikala mu Nshiku sha Kulekelesha

Napapita imyaka 2,000 nomba apo abasambi ba kwa Yesu Kristu bamwipwishe icipusho icakuma na ifwe bene. Batile: “Twebeni, . . . cinshi cikaba iciishibilo ca kubapo kwenu ne ca mpela ya bwikashi?” (Mateo 24:3) Ifyo Yesu ayaswike kuti twafisanga muli Baibolo muli Mateo icipandwa 24, na Marko icipandwa 13 e lyo na Luka icipandwa 21. Aya Malandwe yalanda fimo fine ukuti mu nshiku sha kulekelesha isha buno bwikashi mukaba inkondo, ifipowe, amalwele, ifinkukuma, no kufulisha kwa bumpulamafunde.

Inshiku shayafya isho Yesu asobele shatendeke mu 1914. Uwalembele icitabo ca kuti Age of Extremes, Eric Hobsbawm atile, imyaka ya ba1900 “yali myaka iyo kwali ukwipayaulula abantu sana ukucila imyaka yonse.”

Baibolo yalilandapo ukuti ububifi bukafula mu nshiku shesu ilyo itila: “Nangu ababifi bamena nge cani, no kubalula incitatubi shonse, e kuleka bakafitwe pe na pe.” (Amalumbo 92:7) Ifi ilembo lyalanda fya cine: Abantu abashikonke funde bengi, bafula kwati cani ca ku mutenge. Ici cilelanga fye ukuti inshita ya konaula ababifi ili mupepi. Ili ilyashi ilisuma!—2 Petro 3:7.

“Abalungama Bakapyaninine Calo”

Pa Amalumbo 37:29 patila: “Abalungama bakapyaninine calo, no kwikalamo inshiku pe.” Takwakabe ulukaakala no lufyengo ululi lonse. Kanshi takwakabe ama-alamu ya kutiinya abapuupu, amaloko, ifilye, baloya, bakapokola ne fifungo. Ifi fyonse twalandapo ico fyabelako ni pa mulandu wa kuti kwaliba ulukaakala. Baibolo yalaya ukuti, “Ifya ntanshi tafyakebukishiwe, tafyakabukuluke mu mutima.”—Esaya 65:17.

Ca cine kukaba ukwaluka ukushabala akucitikapo kale, ica kuti abantu tabakalecita ulukaakala e lyo ne calo na co cikawama nga nshi. (Esaya 11:9; 2 Petro 3:13) Inte sha kwa Yehova balishininwa ukuti ifyo fintu fikacitika, kabili balemwita ukuti mukeseyumfwila ifyo basambilisha ukuti fya cine. Mwilaba ukuti uwapuutilemo Amalembo ya Mushilo ‘te kuti abepe.’—Tito 1:2.

[Akabokoshi ne Cikope pe bula 17]

UKWAAFWA ABAFUNGWA UKWISHIBA LESA

Pa myaka iingi nomba, Inte sha kwa Yehova mu United States balipokelela bakalata ukufuma ku bafungwa mu fifungo 4,169, na mu fipatala fya bafungwa e lyo ne fifulo uko basambilisha abakunkuma ku miti ikola ukuleka ukuibomfya. Abafungwa bamo balafwaya ukubatuminako impapulo ishilanda pali Baibolo; bambi na bo balafwaya ukubasambilisha Baibolo. Ba Nte abafikapo balaya kuli aba bafungwa abafwaya ukusambilila. Na kuba, isonde fye lyonse Inte sha kwa Yehova balatandalila abafungwa abaume na banakashi abafwaya ukusambilila Icebo ca kwa Lesa. Pali aba abafungwa, abengi balyaluka icine cine, kabili Bena Kristu ababatishiwa abo nomba bakonka amafunde ya calo.