Ukulingana Na Baibolo

Bushe Nga Mwaponenwa na Macushi Ninshi Ni Lesa Alemukanda?

Umwanakashi umo uuli ne myaka napamo 55 ilyo asangile ukuti alikwata ubulwele bwa kansa atile: “Ndemona kwati ni Lesa alenkanda.” Ilyo atontonkenye pa cilubo apangile imyaka ya ku numa atile, “muli ubu bulwele e mo Lesa alenjebela ukuti nalibembwike.”

ABANTU abengi nga bakwata amacushi, bamona kwati ni Lesa alebakanda pa fibi fimo ifyo bacitile kale. Nga baponenwa na macushi ayakalamba, abengi balailishanya abati: “Cinshi nashamina? Cinshi ncitile pa kuti icabipa cimponene?” Bushe amacushi nga yatuponena ninshi ni Lesa ashitemenwe pa fyo twacita? Bushe cine cine nga twaponenwa na macushi ninshi ni Lesa aletukanda?

Bakapepa Bacishinka Aba ku Kale Baleponenwa na Macushi

Moneni ifyo Baibolo yalanda pali Yobo. Apulikilwe fye ifyuma fyakwe fyaloba. Ne cakonkelepo, abana bakwe bonse 10 balifwile ku mwela uukalamba. Kashitakashita, na o aishilelwala ubulwele ubwabipisha. (Yobo 1:13-19; 2:7, 8) Aya macushi yalengele Yobo ukulila ukuti: “Iminwe ya kwa Lesa yalinguma.” (Yobo 19:21, Baibolo ya ba Diocese of Mbala) Nga filya fine abengi batontonkanya, na Yobo wine aleti ni Lesa walemukanda.

Lelo Baibolo itila, ilyo Yobo talakwata aya macushi yashaibipila, Lesa umwine atile Yobo aali “muntu uwa kaele kabili umulungami, uutiina Lesa kabili uutaluka ku fyabipa.” (Yobo 1:8) Apo Lesa atile Yobo aali muntu umusuma, kanshi te kuti tulande ukuti ico akwatile amacushi, ni co Lesa alemukanda.

Icishinka ca kutila, mu Baibolo mwaliba amalyashi ya bantunse abali abalungami abaleponenwa na macushi. Nangu ca kutila Yosefe aali mubomfi wa kwa Lesa uwa cishinka, balimupeele imilandu ya bufi no kumukaka pa myaka iingi. (Ukutendeka 39:10-20; 40:15) Timote, Umwina Kristu wa busumino, ‘alelwalilila.’ (1 Timote 5:23) Na Yesu Kristu uushabalile acite cabipa, balimucushishe bunkalwe bunkalwe ilyo ashilafwa imfwa yabipisha. (1 Petro 2:21-24) Kanshi cilubo ukumona ukuti amacushi ayaponena abantu ninshi ni Lesa akalipe pa fyo balufyanya. Lelo Lesa nga te uleta aya macushi, ninshi ni nani uuyaleta?

Icilenga Tuleponenwa na Macushi

Baibolo itila, Satana Kaseebanya, e waletele amalanda pali Yobo. (Yobo 1:7-12; 2:3-8) Baibolo na kabili ilatulanga ukuti Satana e uleta amafya tukwata pali lelo ilyo itila: “Cabipila imwe mwe sonde na bemba, pantu Satana Kaseebanya naikila pali imwe, ali ne cipyu icikalamba, pa kwishiba ukuti ali fye ne nshita inono.” (Ukusokolola 12:12) Apo e “kateka wa pano calo,” Satana alalenga abantu abengi ukulacita ifyabipa ifilenga bakwata amacushi yashaifulila na masakamika.—Yohane 12:31; Amalumbo 37:12, 14.a

Lelo tatufwile ukumona conse fye icibi icatucitikila ukuti ni Satana walenga. Pa mulandu wa lubembu twapyana, ilingi line tulapingulapo ukucita ifintu ifingatuletela amacushi. (Amalumbo 51:5; Abena Roma 5:12) Elenganyeni umuntu uushilya ifya kulya ifyalinga kabili uushikwata inshita yalinga iya kutuusha. Nga ca kutila ici calenga alwala, bushe alingile ukupeela Satana umulandu? Iyo, ninshi mwine aikolomwena ubucushi. (Abena Galatia 6:7) Nga cabe fyo, e cimo na filya ipinda lya mu Baibolo lisosa ukuti: “Ubuwelewele bwa muntu e bonaula inshila yakwe.”—Amapinda 19:3.

Ne ca kulekelesha, tatufwile ukulaba ukuti “inshita ya macushi ne nshita ya fintu fyabula ukwenekela” na yo ilalenga twakwata amacushi. (Lukala Milandu 9:11) Elenganyeni ukuti umuntu ale-enda e lyo imfula ikalamba yatendeka ukuloka. Icingalenga abombe sana nelyo abombe fye panono, ni pantu imfula yamusanga. Na muli shino “nshiku shayafya nga nshi,” kuti kwacitika ifintu fimo ifingatuletela amacushi mu nshita fye iinono. (2 Timote 3:1-5) Inshita icintu cacitikilapo e lyo ne fyo tuli iyo nshita, ilingi line e filenga ubucushi bwatuponena ukukula nelyo ukucepa. Na pali ifi fintu tatukwatapo maka. Bushe ici cilolele mu kuti ifyabipa fyakulatucitikila lyonse?

Amacushi Yonse Yakapwa

Ica kusansamusha ca kutila, Yehova Lesa ali no kupwisha amacushi yonse. (Esaya 25:8; Ukusokolola 1:3; 21:3, 4) Pali ino nshita Lesa alatulanga ukuti alitusakamana pantu ‘alatufunda’ no kutupeela “icisansamushi ca mu Malembo” pa kuti twingashipikisha amesho pali nomba no kulalolela inshita ya ku ntanshi iisuma. (Abena Roma 15:4; 1 Petro 5:7) Pali iyo nshita, abalungama mu menso ya kwa Lesa bakaba no bumi bwa muyayaya kabili bakekala mu calo cipya umushakabe amacushi ayali yonse.—Amalumbo 37:29, 37.

[Futunoti]

BUSHE MWALITONTONKANYAPO?

◼ Bushe abacita ifyabipa e baponenwa na macushi?—Yobo 1:8.

◼ Bushe Satana e uleta amacushi yonse ayo tukwata?—Abena Galatia 6:7.

◼ Bushe amacushi yakatwalilila ukubako?—Ukusokolola 21:3, 4.

[Amashiwi pe bula 30]

“Inshita ya macushi ne nshita ya fintu fyabula ukwenekela ifikila fye umuntu uuli onse.”—Lukala Milandu 9:11