Ababelenga Ino Magazini Balepusha Ukuti

Bushe Nga Tulecula Ninshi Ni Lesa Uuletukanda?

Bushe kwaliba icabipa icamucitikila icalenga mulemona kwati ni Lesa walenga ukuti mulecula? Ubulwele bwa kupumikisha, ukulemana pa mulandu wa busanso, nelyo lupwa nga afwa imfwa yabula ukwenekela, kuti fyalenga twalatontonkanya ukuti Lesa e uletukanda.

Tamufwile ukutontonkanya ukuti Lesa e ulenga ukuti tulecula, lelo ukwishiba ukuti Lesa afwaya abantu ukuba ne nsansa no kukanacula kufwile ukumusansamusha. Kuti twalanda ifi pantu ilyo Lesa apangile abantunse ba kubalilapo, ababikile mwi “bala lya Edeni,” paradaise iyali iyayemba nga nshi, umo bashali no kulacula nangu panono.—Ukutendeka 2:15.

Ica bulanda ca kuti abantunse ba kubalilapo basalilepo ukukana ifi ifintu ifisuma nga nshi kabili ku mufulo fye bakeene ukumfwila Lesa. Ifyafuminemo fyalibabipile nga nshi no kubipila abana babo, ukubikako na ifwe bene. Mulandu nshi? Icacitike kuti twacipashanya kuli filya ciba nga ca kuti umutwe wa lupwa akaana ukusonkela ing’anda, ulupwa lonse balalutamfya mu ng’anda kabili lonse fye lulacula. E fyo caba na ku bantunse, bonse balacula ukutula apo abantunse ba kubalilapo bapondokele. (Abena Roma 5:12) Ilyo papitile imyaka iingi, umuntu umulungami Yobo atile nga ca kuti ubukali no bucushi alepitamo fyalibikilwe pa “fya kupiminako ukufina,” fyali no kufina “ukucila umucanga wa pali bemba.”—Yobo 6:2, 3.

Cimbi icilenga tulecula ca kuti tatwishiba bwino ifikacitika ku ntanshi. Tutile umuntu umo akuula amayanda ya kushitisha mu ncende ya kuti mulapya sana umulilo. Nomba imwe ukwabula ukwishiba ifyo iyi ncende yaba, mwashitako ing’anda no kutampa ukwikalamo. Nga mwacita ifi, bushe ninshi tamulebika ulupwa lwenu mu busanso? Bushe nga kwacitika ubusanso, kuti mwatila Lesa e ulemukanda? Baibolo yalitweba icishinka ukuti: “Uushaishiba atetekela fye fyonse ifyo aumfwa, lelo uwacenjela alalolekesha apo alenyanta.”—Amapinda 14:15.

Lelo tulasansamuka ukwishiba ukuti nangu ca kutila tulacula, Lesa alipekanya ukuti nomba line abantunse bakalubuke ku kucula. Iyo nshita nga yafika tamwakatale amuculapo nakalya nangu kumfwa ukuti abantu balecula. Ubulanda, ukukalipwa, imfwa, no kuloosha fikapwa. (Ukusokolola 21:4) Cimbi icitusansamusha ca kuti abantu tabakakuule amayanda no kulima amabala e lyo fyaonaika pa mulandu wa nkondo nelyo mulamba nangu icilala. Lelo mu milimo abantu bakalabomba “bakasekelamo nga nshi.”—Esaya 65:21-25.

Ilyo mulelolela inshita ilyo Lesa akafumyapo amacushi yonse, cinshi mwingacita nomba pa kuti mucefyeko amacushi? Ica ntanshi, Baibolo itila ‘mwilashintilila pa mano yenu mwe bene,’ lelo ‘muletetekela Yehova no mutima wenu onse.’ (Amapinda 3:5) Muleshintilila pali Lesa ukuti alemutungulula no kumusansamusha. Mulekonka amano ya kwa Lesa ayaba mu Baibolo. Aya mano yakulamwafwa ukupingula bwino no kumucingilila ku macushi yamo.—Amapinda 22:3.