Alikata ku Kuboko Ukwa ku Kulyo Ukwa kwa Lesa
◼ Ba Jezreel aba ku Mexico bafyalwa no bulwele ubonaula inkanda ubushaseeka. Ubu bulwele bwalenga inkanda yabo ukulaubuka no mubili onse ukuba fibala fibala. Ba Jezreel balondolwele ukuti: “Ubu bulwele bwalenga nalamoneka fye cimbi cimbi lelo tabwambukila.”
Ukutula ku bwaice, ba Jezreel baliya ku fipatala fyalekanalekana ku kundapwa. Ilyo bali ne myaka ibili, balibabikilepo beka mu muputule umo uwa busaka mu cipatala pa kuti beambula amalwele yambi. Na lyo line, inkanda yabo yali fye cimo cine. Babatwele na ku bakubafwa ukukanasakamikwa sana pa bulwele bwabo.
Abantu abamona kwati ubulwele bwa ba Jezreel bulambukila, balabataluka. Ici calebabipila sana maka maka ku bwaice ilyo balefwaya sana ukwangala na baice bambi. Bebukisha ukuti: “Balenseka no kulanjita amashina ayabi. Bamo balenjita ati icitumbi baumika nangu ati umutulatula.”
Lelo ubu bwine bulwele bulapeela ba Jezreel ishuko lya kulanda pe subilo lyabo ilyaba mu Baibolo. Ilingi line abantu balabepusha nga ca kuti bapile fye ku mulilo. Nga balanda ati awe, balabepusha icalenga inkanda yabo ukuba ifi. Babalondolwela ukuti balifyalwa no bulwele ubonaula inkanda ubushakwata muti pali nomba.
Lyena bakonkanyapo ukusosa ati: “Lelo nalikwata isubilo ilisuma sana pantu Yehova Lesa alilaya ukutila abakonka amafunde yakwe bakekala mu calo cipya umushakabe ukulwala no kukalipwa.” (Ukusokolola 21:3, 4) Ukulanda pa bulwele bwabo nge fi, kwalenga ba Jezreel batendeka ukusambilisha abantu Baibolo, kabili balomfwa bwino ukumona abengi abo basambilisha batendeka ukupepa Lesa.
Ba Jezreel batile, “Ndatasha ukuti nafyalilwe mu lupwa lwa Bena Kristu, kabili ifi ndi Nte ya kwa Yehova, nalikwata abanandi abo tumfwana na bo sana. Tapaba nangu umo pali bena uunsengauka pa mulandu wa fyo moneka. Nabatishiwe ilyo nali ne myaka 17, kabili pa myaka 14 ukutule lyo, nalikwata ishuko lya kubombela Kabumba wesu imilimo yalekanalekana.”
Ba Jezreel tabalaba amashiwi ya kukoselesha aya kwa Yehova ayaba pali Esaya 41:10, 13 apatila: “Witiina, pantu ndi na iwe. . . . Nkakutungilila no kuboko kwandi ukwa ku kulyo ukwa bulungami. Pantu ine, ne Yehova Lesa obe, ndeikata ukuboko kobe ukwa ku kulyo, ndekweba ati, ‘Witiina. Ine nkakwafwa.’”
Ukwikata ku kuboko ukwa ku kulyo ukwa kwa Yehova kwalyafwa ba Jezreel ukukanasakamikwa sana pa fyo bambi babamona, kabili kwalenga baleshipikisha amafya ayo ubulwele bwabo bubaletela. Ba Jezreel pamo na bantu bambi abengi balolela ukuti Lesa akafikilishe amalayo yakwe ayashaikulila.