Abacaice Bepusha Ukuti
Kuti Nacita Shani pa Kuti Bambi Balentemwa pa Muku wa Kubalilapo?
“Nangu cibe shani balanjingisha incito! Abakalamba ba ncito bafwile nabamona fye ukuti nshileumfwa umwenso; apo njishile ndebeta fye ishina lyabo ilya kubalilapo. Ninjishiba balanjingisha incito!”
“Bushe uyu e mulumendo watumine amapepala aya kufwailapo incito ayawama filya? Te kuti mwingishe incito! Nga alecita ifi ilyo ashilaingila incito, cikaba shani ilyo akatendeka?”
Lolesha pa cikope, kabili belenga na mashiwi yali pa muulu. Fintu nshi fitatu ifyo umulumendo uulefwaya ukwingila incito alelufyanya?
1 ․․․․․
2 ․․․․․
3 ․․․․․
● Amasuko pe samba
1. Ifyo uyu mulumendo afwele, te fyo uuleya mu kufwaya incito alingile ukufwala. 2. Imilandile yakwe, ilelangilila ukuti aliba ne cibeleshi (aleita abaleingisha incito ishina lya kubalilapo.) 3. Ifyo alecita filelangilila fye ukuti taba no mucinshi.
ELENGANYA ukuti e muku wa kubalilapo ukulya ifyakulya fimo. Bushe kuti casenda ne nshita ukwishiba nga naufitemwa? Kuti wa lyamo fye umuku umo waishiba no kuti tawafipwishe, kabili tawakafilyepo libili.
E ficitika na lintu wamonana no muntu umuku wa kubalilapo. Pa kashita fye akanono kuti waishiba ifyo aba, e lyo na o aleshiba ifyo waba.
Bushe ulefwaya ukwingila incito? Bushe ulefwaya ukukwata umunobe? Bushe ulefwaya uwakuupana nankwe? Ifyo wingacita ilyo mwamonana no muntu umuku wa kubalilapo fye kuti fyalenga watunguluka nelyo iyo. Natulande pa fintu fitatu ifyo ulekabila ukwishiba pa kuti abantu bengakutemwa ilyo wamonana nabo pa muku wa kubalilapo fye.
1. Ifyo Ulemoneka
Nangu ca kuti e lyo wamonanapo no muntu, kuti aishiba ifyo waba pa mulandu wa fyo ulemoneka. Lelo nangu cibe ifyo abengi tababikako sana amano ku fyo bambi bakabamona. Clarissaa umukashana uli ne myaka 20 atile: “Shino nshiku cimoneka kwati nga waya ku fikulwa fya kulilamo takuba ukwishiba abantu nga balaisa na bafwala bwino sana nelyo iyo!”
Kwena, inshita yonse ulingile ukufwala ukulingana ne fyo ulecita. Ku ca kumwenako, ifyo wingafwala ilyo uleya mu kwangala te fyo wingafwala ilyo uleya mu kufwaya incito! Tutile tawishibe ifyo ulingile ukufwala kuti wacita shani? Kuti cawama ukufwala ifyo abengi bafwalako ukucila ukufwala ifyacilamo.
ULEIBUKISHA ICI! Ifyo ufwala filanga fye abantu ifyo waba.
Diane atile: “Nga ndi ku parte kabili namona abantu abafwele ifya mataki, nshifwaya no kubapalama. Ifyo bafwala filanga fye ifyo baba.
Baibolo itukoselesha ‘ukufwala bwino’ no kuti tufwile ukufwala “ifyalinga kabili ifya mucinshi.”—1 Timote 2:9.
Ipushe: ‘Bushe ndafwala bwino nelyo bushe mfwala busanku busanku? Bushe abalefwaya ukunjingisha incito, uo ndefwaya ukuti abe umunandi, nangu uo ndefwaya ukuupana nankwe kuti bamona kwati nshifwala “ifya mucinshi”?’
Cita ifi: Landa nabafwala ifya mucinshi pa kuti bakupandeko amano.
2. Ifyo Ulanda
Imilandile yobe ilalanga nampo nga wali-icefya nelyo uli wa cilumba kabili nga walyafya nelyo tawayafya. Kanshi ufwile ukulatontonkanyapo pali ifi twalandapo nga ulefwaya ukuti umwanakashi nelyo umwaume akutemwe ilyo mwamonanapo fye. Valerie atile: “Nshumfwa bwino nga ca kuti ndelanda no mulumendo e lyo ekalile fye ukuilumbilisha.” Kabili alandile no kuti: “Abalumendo bamo balacilamo, kuti alefwaya fye eshibe fyonse pali iwe umuku wa kubalilapo fye. Tacawama, cilomfwisha sana insoni.”
ULEIBUKISHA ICI! Apo imilandile yobe e ilanga abantu ifyo waba, ulingile ukuba ne milandile iisuma pa kuti abantu bakutemwe!
Selena atile: “Ifyo umuntu acita umuku wa kubalilapo mwamonana fyalicindama sana, nga namonana no mulumendo, ndatemwa nga ali fye ifyo aba. Nga alefwailisha fye ifya kulanda, nshumfwa bwino.”
Baibolo itila: “Kuti walanda ifyalubana nga ulelanda sana—e co uleba na mano kabili ishiba ne ifya kusosa.”—Amapinda 10:19, Baibolo ya Contemporary English Version.
Ipushe: ‘Kuti nacita shani pa kuti nshileikala sana tondolo kabili nshilecilamo ukulanda? Bushe kwalibako fimo ifyo nanda ifingapapusha bambi nelyo ukubakalifya?’
Cita ifi: Mona ifyo abaishiba ukulanda bwino bacita. Bacita shani pa kuti batwalilile ukulanshanya bwino na bambi? Bushe na iwe kuti wacitako cimo cine?
3. Ifyo Ucita
Ifyo umuntu acita e filanga ifyo aba. Ku ca kumwenako nga walikwata umucinshi, ifyo ucita e filanga ukuti ulacindika bambi. Ufwile ukulatontonkanyapo na pali ici ilyo ulefwaya uwakuupana nankwe. Carrie atile: “Umulumendo nga alencitila utuntu utunono pamo nga ukunjiswilako icibi, cilanga fye ukuti aliba ne mibele iisuma kabili alikwata umucinshi. Umulumendo waba ifi e o ningatemwa.
ULEIBUKISHA ICI! Ifyo ucita filanga fye ifyo waba. (Amapinda 20:11) Bushe ifyo ucita filanga ukuti waba shani?
Natalia atile: “Ukulakutika ilyo bambi balelanda kwalicindama. Na kabili cilanga fye ukuti waliba ne mibele iisuma nga taulecilima bambi ilyo balelanda, kuti wacita fye ifyo nga cakabilwa.”
Baibolo itila: “Ulecitila bambi ifyo ufwaya kuti bakucitile.”—Luka 6:31, Baibolo ya CEV.
Ipushe: ‘Bushe nalikwata imibele iisuma? Bushe ndabikako amano ku bantu bambi? Bushe abantu balincetekela? Bushe ndasunga inshita?’
Cita ifi: Nga kuli uko ufwile ukuya, panga ukufika kulya ilyo kucili amaminiti 10 pa kuti nangu kucitike fimo taucelelwe. Wileka bambi bamone kwati walitemwa ukucelwa!
Ico ufwile ukwishiba: Taufwile ukufisa ifyo waba pantu fye ulefwaya ukuti bambi bakutemwe. (Amalumbo 26:4) Mu nshita ya kulabepa bambi, kuti cawama walacita ifisuma ifingalenga bambi baishiba ukuti waliba ne mibele iisuma. (Abena Kolose 3:9, 10) Nampo nga abantu bakakwishiba ukuti waba ne mibele isuma nelyo iyo, cili kuli iwe. Nga wabikako amano ku fyo umoneka, ifyo ulanda e lyo ne fyo ucita, ukalenga abantu bakalekutemwa kabili bakakwishiba no kuti uli muntu musuma!
Amalyashi na yambi aya kuti “Ifipusho Abacaice Bepusha,” yalasangwa na pa Intaneti pa www.watchtower.org/ype
[Futunoti]
a Amashina yamo te yabo.
[Akabokoshi ne Fikope pe bula 31]
IFYO ABAICE BANOBE BALANDAPO
“Calicindama ukusala ifibusa fisuma. Nalimona ifyo ifibusa fingalenga wakwata imibele iisuma nelyo iibi, e ico nsala ifibusa ifingalenga naba ne mibele iisuma.”
“Ukukwata ifibusa fisuma takwashintilila pa kukwata indalama nelyo ukumoneka bwino, lelo kwashintilila pa kukwata imibele isuma!”
[Ifikope]
Sier
Ashley
[Akabokoshi ne Cikope pe bula 31]
IFINGAKWAFWA . . .
● Ulemwentula
● Uleposha bwino (wilaikatisha ica kuti wabakalifya ne minwe)
● Uleba no busaka
● Wilalolekesha
[Akabokoshi ne Cikope pe bula 32]
WILACISHAMO!
Ulelanda LELO wilalanda sana ica kuti bambi balefilwa no kulandapo
Uleipusha amepusho LELO wilafwaya ukwishiba fye fyonse
Uleba uwa bucibusa LELO wilaaba ne cibeleshi
Uleicetekela LELO wilaaba ne cilumba
[Akabokoshi pe bula 32]
IPUSHA ABAFYASHI BOBE
Ilyo mwali abaice, finshi mwasambilile ukuti e fyo mwalekabila ukucita pa kuti bambi balemutemwa umuku wa kubalilapo fye ukumonana nabo?
․․․․․