Mulandu Nshi Amacushi Yafulile?

BASHIMAPEPO abamona kwati balishiba icasuko kuli ici cipusho, ilingi line basambilisha ukuti abantu nga balecula, ninshi Lesa e ulebakanda. Ku ca kumwenako, ilyo papitile fye inshiku ishinono ukutula apo icinkukuma cacitikile mu Haiti, shimapepo wa mu musumba uukalamba aebele aba mu cilonganino cakwe ukuti ni Lesa e uletukanda. Bambi balapita mu mbali ilyo balelanda pali ili lyashi. Umwina America uwasambilila sana pa fya mapepo alandile ukuti abantu abengi batontonkanya ukuti: “Umulandu ifinkukuma fya musango uyu ficitikila ni nkama ya kwa Lesa. Ico ifwe tufwile fye ukucita kumutetekela.”

Bushe ca cine Lesa e ulenga ukuti abantu balecula? Baibolo yasuka ukuti iyo! Yehova Lesa talefwaya ukuti abantu balecula. Lelo abantu babili aba kubalilapo balipondokele Lesa, balefwaya ukulaisalila icalungama ne calubana, kabili ici calengele batendeke ukucula. Ifyo basalilepo ukucita e fyatuletelela. Kanshi te Lesa walengele ukuti abantu balecula. Baibolo itila: “Ilyo umuntu atunkwa, etila: ‘Ni Lesa e ulentunka.’ Pantu takuli uwingatunka Lesa ukucita ifyabipa, kabili umwine tatunka umuntu iyo.” (Yakobo 1:13) Amacushi kuti yaponena abantu bonse, ukubikako fye na bantu abo Lesa atemwa. Moneni ifi ifya kumwenako:

● Kasesema Elisha alilwele ubulwele ubwali no kumufisha ku mfwa.—2 Ishamfumu 13:14.

● Umutumwa Paulo alembele ukuti atwalilile ukucula ku ‘nsala ne cilaka no kusapula no kupumwa no kubulwa ing’anda.’—1 Abena Korinti 4:11.

● Umwina Kristu Epafroditi alilwele kabili ‘alikungumene.’—Abena Filipi 2:25, 26.

Takwaba apo calembwa ukuti ni Lesa e walekanda aba bantu batatu pa membu shabo. Baibolo na kuba, taipelela fye pa kutweba ukuti Lesa te ulenga ukuti tulecula. Lelo yalitulondolwela ne fintu fitatu ifilenga sana ukuti abantu balecula.

Ifyo Umuntu Asalapo Ukucita

“Ico umuntu alebyala, e co akalobolola.” (Abena Galatia 6:7) Ukwabula no kutwishika umuntu kuti ailetelela nga asalapo ukulapeepa fwaka, ukulaensha motoka bubi bubi, nangu nga aonawila indalama ku fya cabe cabe.

Na kabili nalimo kuti twacula pa mulandu wa bukaitemwe bwa bantu bambi. Ku ca kumwenako, abantu balacita ifyabipa nga nshi ifiletelela bambi, pamo nga inkondo ne fyabipa fimbi. Ukukanapingulapo bwino kulalenga abantu ukucita ifilenga bambi ukulacula.

Ificitika Ukwabula Ukwenekela

Mu nshiku sha kwa Yesu, icikuulwa icikalamba icali mu Yerusalemu caliwile no kwipaya abantu 18. Ilyo Yesu alelanda pa bafwile ilyo ico cikuulwa cawile, atile: “Bushe muletila bali ababi nga nshi ukucila abantu bonse bambi abaikala mu Yerusalemu? Awe iyo.” (Luka 13:4, 5) Yesu alishibe ukuti Lesa te wakandile abafwile ilyo icikuulwa cawile. Alishibe ifyo Icebo ca kwa Lesa calanda ukuti: “Inshita ya macushi ne nshita ya fintu fyabula ukwenekela ifikila fye umuntu uuli onse.” (Lukala Milandu 9:11) Amasanso ayengi yacitika fye ukwabula no kwenekela nangu pa mulandu wa filubo abantu bamo bacita. Ku ca kumwenako, casangwa ukuti abantu balacula sana nga tabaleumfwa ukusoka e lyo na lintu bakuula ifikuulwa ifishakosa bwino bwino kabili ifibongoloka nga kwacitika ilyeshi nelyo icinkukuma. Kanshi ificitika ukwabula ukwenekela, filakuma abantu abengi nga nshi kabili filalenga ukuti balecula.

“Kateka wa Pano Calo”

Baibolo yalanda ukuti: “Icalo conse calaala mu maka ya mubifi.” (Yohane 12:31; 1 Yohane 5:19) Uyu “mubifi” ni Satana Kaseebanya, malaika wapondweke uwakwata sana amaka uo balondolola ukuti “kateka wa bufumu bwa mu lwelele.” Satana afwaya abantu ukuba no “mupashi uyo nomba ubomba mu bana bacintomfwa.” (Abena Efese 2:2) Fimo ificitika pamo nga ukwipayaulula abantu no kulungana na bana, fyalibipa sana ica kuti abengi basumina ukuti Satana e utunka abantu ukucita ifya musango uyo.

Lelo bushe ici cipilibula ukuti Lesa tamona amacushi tupitamo? Bushe alikwata amaka ya kupwisha amacushi? Nga alikwata, bushe akayapwisha?