“Lembeleni Kuli Anton!”
● Anton ni Nte ya kwa Yehova uwikala mu mushi wa Schelkan mu Stavropol’ Kray, ku Russia. Ilyo ali umwaice, bamusangile no bulwele bwa Duchenne muscular dystrophy, ubulwele bushipola ubulenga umuntu ukuba no bulebe kabili ilingi line abalwala balafwa ilyo bashilafisha imyaka 20. Ilyo Anton ali ne myaka 9, alilekele ukwenda nelyo fye ukwima.
Ilyo ba Yevgeny, na bena mwabo ba Diana, baletandalila icilonganino ca Nte sha kwa Yehova, bailesanga Anton. Ba Diana balondolwele ukuti: “Ubulwele bwalimunashishe sana, lelo ali uwakosa mu fya kwa Lesa. Apo umukalamba wakwe umwaume afwile ku bulwele bumo bwine ilyo ali ne myaka 19, Anton alishibe ukuti tapali na kukokola ali no kufwa. Na lyo line, ali ne nsansa kabili alesuubila mu malayo ya kwa Yehova.”
Ba Diana na bena mwabo bakoseleshe Anton ukulashimikila ukupitila mu kulalembela abantu amakalata abaleikala mu mishi imbi iyo bashaleshimikilamo sana. Mu 2005, alembele amakalata 500 no kuyatuma ku bantu abaleikala mu mishi yali mu bwinamupalamano, lelo takwali nangu umo uwamubweseshe. Nangu cingati alifuupwike, Anton alitwalilile ukulemba amakalata, kabili ali no mute wa kupepa kuli Lesa ukuti amwafwe ukulashimikila sana nangu ca kuti alelwalilila.
Bushiku bumo Anton alebelenga inyunshipepala umwali kalata iyalembele umwanakashi walelwalilila kabili uwalefwaya uwa kumusansamusha. Anton alimulembele kalata kabili amashiwi yamo ayo alembele muli kalata, baliyalembele na mu ilya nyunshipepala. Alembele ukuti: “Nangu cingati ubulwele bwandi tabupola, ukubelenga Baibolo kwalinenga ukuba ne subilo lya kuti ku ntanshi ifintu fikawama.” Kabili atile: “Ndatemwa nga nshi ukupokelela bakalata.”
Apo ifyo abelengele fyalimufikile pa mutima, ulya mwanakashi alembele kalata iyo bafumishe mu nyunshipepala imo ine. Amashiwi alembele muli kalata yali pa kamutwe kaleti, “Lembeleni Kuli Anton!” Uyu mwanakashi alitashishe pa mashiwi ya kwa Lesa ayali muli kalata iyo Anton alembele kabili alembele no kuti: “Natwafwilishe Anton! Mulemubwesesha nga amulembela kalata. Uyu mulumendo alekabila amashiwi ya kumukoselesha!” Alibikilepo na adresi ya kwa Anton.
Awe Anton atendeke ukulapokelela amakalata ukufika kuli 30 mu bushiku bumo! Yalefuma ku bantu abaleikala mu ncende shalekanalekana isha mu Russia, ukubikako na mu Lithuania, Latvia, Estonia, Germany, na France. Abalebelenga ilya nyunshipepala balembele amakalata ayengi. Ba Diana batile: “Anton alitemenwe nga nshi pantu nomba alikwete abantu abengi sana abo engalembela amakalata no kubashimikilako ifyo asuminemo.”
Ukucila pa mwaka uutuntulu, Anton alelemba amakalata ukubwesesha kuli balya bamutumine, kabili alebashimikilako icine caba mu Baibolo. Mu kuya kwa nshita ilyo amaka ya kulemba yapwile, Anton atampile ukulalanda fye e lyo bambi balemulembela. Mu September mu 2008, e lyo Anton alifwile ninshi ali ne myaka 20. Nangu ca kuti ubulwele bwalimunashishe, icitetekelo cakwe catwalilile fye ukuba icakosa kabili ukutemwa umulimo wa kushimikila kwalengele ukuti amashiwi alembele yafike pa mitima ya bantu abengi nga nshi.