Bushe Inkondo ya Calo ili no Kubako Nomba Line?—Finshi Baibo Yalandapo?

Mu myaka 30 iyapita, abantu abengi balemona kwati ifyalo ifingi fyaleumfwana bwino sana. Na lyo line, ifintu ifingi ifyacitika filangilila ukuti ifyo abantu balemona nalimo te fyo ifintu fyaba.

• “Abantu balitendeka ukusakamana ukuti inkondo yaba mu Gaza ikalenga ifyalo na fimbi ukuculilamo nga ca kuti icalo ca Israel catendeka ukulwishanya na kabungwe ka Hezbollah, pa mupaka wa Lebanon.”—Reuters, January 6, 2024.

• “Amabumba ayatungululwa ne calo ca Iran nayo yalesansa mu ncende ishalekanalekana, e lyo kabili icalo ca Iran calitendeka no kupanga ifyanso ifya maka sana na kabili. Cimbi ca kuti, ifyalo pamo nga Russia e lyo na China filebombela pamo ne calo ca Iran. Ici nacilenga ifyalo fyabela ku Western ukuba sana no mwenso.”—E fyalandile The New York Times, iya pa January 7, 2024.

• “Icalo ca Russia calitwalilila ukonaula ifintu ifingi nga nshi mu calo ca Ukraine.”—E fyalandile UN News, iya pa January 11, 2024.

• “Icalo ca China cilekwatilako fye icuma e lyo na maka, lyena icalo ca Taiwan naco calitwalilila ukulumbuka, e lyo kabili apo icalo ca China ne calo ca U.S. tafyumfwana, ifi fyalo kuti fyatendeka ukulwishanya.”—E fyalandile The Japan Times, iya pa January 9, 2024.

Bushe paliba ifyo Baibo yalandapo pali ifi ifilecitika mu calo pali ino nshita? Bushe fili no kulenga inkondo ya calo ukutendeka?

Baibo Yalisobele Ifintu Ifilecitika Pali Ino Nshita

Baibo tayalandile mu kulungatika pa nkondo isho tulemona pali ino nshita. Na lyo line, yalilandilepo pa nkondo ishilecitika pali ino nshita ukuti shili no “kufumya umutende pe sonde.”—Ukusokolola 6:4.

Ibuuku lya kwa Daniele lyasobele ukuti “mu nshita ya mpela,” ifyalo ifyakwatisha amaka ifikalacimfyanya, fikatendeka ‘ukupunkana’ nelyo ukulwishanya. Uku kucimfyanya mwaba no kulanga amaka ifi fyalo fyakwata e lyo kabili no kubomfya indalama ishingi.—Daniele 11:40, 42, 43.

Inkondo iili ku nshita ya ku ntanshi

Baibo ilangilila ukuti ifintu mu calo fikabalilapo ukubipa ilyo fishilawama. Yesu asobele ukuti “kukaba ubucushi ubukalamba ubushatala abubako ukutula pa ntendekelo ya ba pano calo.” (Mateo 24:21) Ubu “ubucushi ubukalamba” bukalenga ukuti kukabe inkondo iitwa ukuti Armagedone, iyo balondolola ukuti ni “nkondo ya bushiku bukalamba ubwa kwa Lesa Wa Maka Yonse”—Ukusokolola 16:14, 16.

Na lyo line, inkondo ya Armagedone tayakalenge abantu ukonaulwa lelo ikapususha abantu abengi nga nshi. Lesa akabomfya iyi nkondo ku kupwisha imiteekele ya bantunse iyalenga inkondo ukufula pali ino nshita. Nga mulefwaya ukwishiba ifyo inkondo ya Armagedone ikalenga kukabe umutende, belengeni ifipande fitila:

• “Bushe Inkondo ya Armagedone Cinshi?”

• “Tulafwaisha Ukuti Armagedone Ikese!”