Ilyo Mwayumfwa Kwati Namutendwa no Bumi
CILA mwaka mu United States fye mweka abantu abengi nga nshi balafwaya ukuipaya. Baibolo ilatwafwa ukwishiba umulandu uukalamba uulenga abantu abengi ukupelelwa. Ilondolola ukuti tuleikala mu “nshita ishayafya nga nshi.” Abantu balititikishiwa nga nshi mu mikalile. (2 Timote 3:1; Lukala Milandu 7:7) Ilyo umuntu atitikishiwa na masakamika, kuti alatontonkanya pa kuipaya nge nshila ya kupwishishamo amafya. Kuti mwacita shani nga mulatontonkanya pa kuipaya?
Tamwaba Mweka!
Nangu ca kuti muleyumfwa abapelelwa pa mulandu ne fyo mulepitamo, muleibukisha ukuti tamwaba mweka kabili ica bulanda ca kuti mupepi fye na bonse tulakwata amafya. Baibolo itila: “Ifibumbwa fyonse fitetela capamo no kucululukila capamo.” (Abena Roma 8:22) Inshita shimo kuti mwayumfwa kwati amafya mwakwata tayakapwe, lelo ilingi ifintu filaluka mu kupita kwa nshita. Nomba finshi fingamwafwa ilyo mulelolela ukuti amafya yakapwe?
Ebeniko cibusa wenu uo mwacetekela ifyo muleyumfwa. Baibolo itila: “Ukutemwa kwa kwa cibusa wa cishinka takupwa, kabili uyu cibusa ni munyina uufyalwa ilyo kuli ubucushi.” (Amapinda 17:17) Yobo umulungami uo balandapo mu Baibolo, alyebeleko bambi ifyo aleyumfwa ilyo ali na mafya. Ilyo aumfwile ukuti napata icibi umweo wakwe, atile: “Ndepuuka mu bukali pa masakamika yandi. Ndesosa mu kucululuka kwa mweo wandi!” (Yobo 10:1) Ukwebako bambi ifyo muleyumfwa kuti kwacefyako ukubipilwa, kabili kuti mwayaluka mu fyo mulemona amafya mukwete.
Ebeni Lesa fyonse ifili ku mutima wenu. Bamo bamona kwati ipepo te kuti libafwe, lelo ifyo fyalipusana ne fyo Baibolo ilanda. Amalumbo 65:2 yeta Yehova Lesa ati ‘Uumfwa ipepo,’ na 1 Petro 5:7 itila: “Asakamana imwe.” Baibolo lyonse ilalanda umulandu cacindamina ukushintilila pali Lesa. Ku ca kumwenako, Baibolo itila:
“Tetekela Yehova no mutima obe onse kabili wishintilila pa mano yobe we mwine. Uko konse wenda umwishibe, na o akatambalika inshila shobe.”—AMAPINDA 3:5, 6.
“Akacitila ababa na katiina kuli [Yehova] ifyo balefwaya, akomfwa ne nkuuta yabo, kabili akabapususha.”—AMALUMBO 145:19.
“Uku e kucetekela uko twamucetekela, ukuti conse ico twalomba, cikulu fye nacilingana no kufwaya kwakwe, alatumfwa.” —1 YOHANE 5:14.
“Yehova aba ukutali na babifi, lelo alomfwa ipepo lya balungami.”—AMAPINDA 15:29.
Nga mule-eba Lesa amafya mukwete, akamwafwa. E mulandu wine Baibolo itukoselesesha ukuti “mutetekeleni inshita yonse . . . Mupongolweleni ifyaba mu mitima yenu.”—Amalumbo 62:8.
Ifya Kucita nga Mulekabila Ukwafwa na Kumbi
Abafwailikisha pa fintu basanga ukuti abantu abengi abaipaya ni balya abakwata ubwafya bwa kupopomenwa.a Kanshi calicindama ukumonana na badokota. Badokota kuti bamupeelako umuti nangu bamweba ifya kulya ifingawama ukulya. Ukulunda pa muti bamupeele, limo ukutukushako umubili na ko kuti kwamwafwa. Ukundapwa na badokota abaishiba bwino pa bulwele bwa kupopomenwa, kwalyafwa abengi sana.b
Muli Baibolo mwaliba ifyebo ifingi ifingamwafwa no kumusansamusha. Ku ca kumwenako, pa Ukusokolola 21:4, Baibolo ilanda pali Yehova Lesa ukuti: “Akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.” Ifi e fyo Lesa alaya, kabili ukutontonkanya pali ifi kuti kwalenga mwaumfwako bwino.
Inte sha kwa Yehova mwi sonde lyonse balashimikila ku bantu abengi nga nshi pali ili subilo lya mu Baibolo. Ici calilenga ukuti abengi babe ne subilo lya cine cine muli shino nshita ishayafya. Nga mulefwaya ukumfwilapo na fimbi, kuti mwaya ku Ng’anda ya Bufumu iya Nte sha kwa Yehova iyabela uko mwikala, nelyo balembeleni ukubomfya adresi ili pe bula 5 nangu moneni pa Intaneti pa www.watchtower.org.
[Amafutunoti]
a Nga mulefwaya ukumfwilapo na fimbi pa kupopomenwa, moneni Awake! ya July 2009 amabula 3-9.
b Loleni! tayeba abantu inshila balingile ukundapilwamo. Umuntu umo umo afwile ukutontonkanya bwino ilyo talasalapo ifya kucita.
[Akabokoshi pe bula 16]
IFYO BAIBOLO INGAMWAFWA
● “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.”—Abena Filipi 4:6, 7.
● “Naipwishe Yehova, na o alinjaswike, kabili ampokolwele kuli fyonse ifya kuntiinya.”—Amalumbo 34:4.
● “Yehova ali mupepi ku baba ne mitima ya bulanda; kabili apususha abasakamikwa imitima.”—Amalumbo 34:18.
● “Ondapa aba nkumbabulili, no kubakakila pa filonda fyabo.”—Amalumbo 147:3.
[Akabokoshi pe bula 17]
NGA MULETONTONKANYA PA KUIPAYA . . .
Ebeniko cibusa wenu uo mwacetekela ifyo muleyumfwa
Ebeni Lesa fyonse ifili ku mutima wenu
Moneni badokota
[Akabokoshi ne Cikope pe bula 18]
KULI BALUPWA NE FIBUSA
Balupwa ne fibusa ilingi line e beshiba bwangu ukuti uupopomenwe alefwaya ukuipaya. Ukucitapo fimo kuti kwalenga mwamupususha! Kutikeni ilyo alelondolola. Sumineni ukuti lupwa lwenu nelyo cibusa wenu nakwata ubwafya. Baibolo itila: “Sansamusheni abali no bulanda.” (1 Abena Tesalonika 5:14) Mukoselesheni ukuti aye ku bengamwafwa, kabili nga cingacitika imwe bene fwayeni inshila iyo engasangilamo ubwafwilisho.