Abacaice Bepusha Ukuti

Kuti Nacita Shani pa Kuti Ntemwe Ukubelenga Baibolo?

Mulandu nshi uwa kubelengela Baibolo? Tontonkanya pali ifi:

Baibolo kuti yakwafwa ukwishiba ifingi. Ici citabo ico abantu abengi bakwata kuti cakwafwa

● Ukuba ne mikalile isuma

● Ukwishiba ifya ku ntanshi e lyo ne fyacitika kale ifyo ushingabelenga kumbi

● Ukwishiba bwino ifyo waba no kuba umuntu umusumaa

PA KUSAMBILILA Baibolo, ufwile wabombesha pa kuti mufume ifisuma! Bushe kuti watemwa ukwishiba ifyo abacaice bamo bacita pa kubelenga Baibolo? Putula ibula lyakonkapo no kulipeta. Walakwata amabula 4 apali ifyo abaice banobe bacita pa kupwisha ubwafya ubwa kukanatemwa ukubelenga Baibolo ne fyo banonkelamo mu kubelenga Baibolo.

“Muli Baibolo mwaliba ifyebo ifingi ifingafwa abantu fye bonse. Te kuti tupwishe ukusambilila Baibolo!”—E fyalandile Valerie.b

Nga mulefwaya amalyashi na yambi aya “Abacaice Bepusha Ukuti” kuti mwayasanga pa adresi ya pa Intaneti iya www.watchtower.org/ype

[Amafutunoti]

[Akabokoshi ne Fikope pe bula 13, 14]

IFYO WINGABELENGA BAIBOLO

Ubwafya: UBUNANG’ANI

“Ukwikala fye ndebelenga pe awaala limo kulankosela ica kuti nshifwaya no kutontonkanyapo.”—E fyalandile Lena.

Ifyo wingacita: UFWILE UKWISHIBA UBUSUMA UBWABAMO

Nga ulefwaya ukutemwa ukubelenga Baibolo, ufwile ukuipusha ukuti, Busuma nshi ningasangamo? Bushe kuti watemwa ukuba cibusa wa kwa Lesa, nelyo ukwishiba umulolele ifilecitika mu calo, nelyo ukuba umuntu umusuma? Baibolo kuti yakwafwa muli ifi, e lyo na mu fintu fimbi ifingi!

Bethany atile: “Wilamona kwati ukubelenga Baibolo ni ncito nelyo kwati fya ku sukulu. Lelo ulemona ukubelenga Baibolo nge nshila ya kupangilamo bucibusa ubwacindamisha sana na Yehova Lesa.”

Bianca atile: “Inshita ubomfya ukubelenga Baibolo ciba kwati muli fye babili na Yehova Lesa. Nga ca kuti uba no muntu ilyo fye abafyashi bobe balipo, bushe kuti watile uyo muntu ni cibusa obe nelyo wa bafyashi bobe? Nga ulesambilila Baibolo weka, ninshi Yehova kuti aba ni cibusa obe.”

Uleibukisha Ukuti: ‘Amalembo yonse aya mushilo yafuma kuli Lesa kabili ya mulimo ku kusambilisha, ku kukalipila, no kulungika ifintu.’ (2 Timote 3:16) Baibolo kuti yakwafwa muli fyonse ifi balandapo mwi lembo!

Max atile: “Nga ndebelenga ntontonkanya sana pa fyo isambililo lyalangafwa. Nga pali ifyo nfwile ukubombelapo, inshita ya kubelenga e lyo nsambilila ifyo ningacita pa bwafya nkwete.”

Ifya Kutontonkanyapo:

Finshi fingakukoselesha ukulabelenga Baibolo?

Ubwafya: ICITENDWE

Allison atile: “Nga nabelengako fye pa mamineti 10, ninshi natendeka ukumfwa ukunaka; nga nafisha amamineti 20 ninshi ndefwaya ukucitako fimbi; amamineti nga yafika 30, ninshi nintendwa icabipisha!”

Ifyo wingacita: ULEITENDEKELAKO

Ule-elenganya ilyo ulebelenga, uletontonkanya pa fintu ulesambilila, ne nshila walabomfya pa kuisambilisha, e lyo ne cifulo walasala ukulasambililapo.

Richard atile: “Ulekwata inshita ya kufwaya ifyasuko ku fipusho wakwata. Ilyo ulesambilila pa fintu uletontonkanyapo, nga wasambilila waishiba, ukatemwa icine cine.”

Steven atile: “Ilyo ulebelenga pa fintu ifyacitike ule-elenganya kwati eko wali ilyo fyalecitika. Uleba kwati ni we ulecita ifyo fintu nangu kwati uletambako fye. Ule-esha ukwelenganya ifilecitika.”

Alexandra atile: “Ulecita ifingalenga isambililo ukuwama. Kuti waikalako ku lukungu ya ng’anda ulenwako no twalowa. Nalitemwa ukulyako tumo ilyo ndesambilila. Nani uushingatemwa ifyo?”

Uleibukisha ukuti: Icitendwe cisako pa mulandu wa fyo we mwine uletontonkanya. Kanshi ukucila ukulanda ati “ukusambilila kulatendusha” kuti watila fye “nintendwa.” Ufwile ukwishiba ukuti ni we ulingile ukucitapo cimo pa fyo umona ukubelenga. Nga wacita ifi ninshi ukeshiba ne fya kubombelapo.—Amapinda 2:10, 11.

Vanessa atile: “Isambililo lya pa lobe talifwile ukukutendusha. Kuti walilenga ukuba ifyo we mwine ulefwaya libe.”

Ifya kutontonkanyapo:

Kuti waitendekelako shani pa kuti uleumfwa bwino ilyo ulesambilila?

Ubwafya: NSHIKWATA INSHITA

Maria atile: “Kuti natemwa ukulabelenga Baibolo sana, nomba ifi nalikwata ifya kucita ifingi, ubwafya insanga ni nshita ya kwikala pa nshi no kubelenga!”

Ifyo Wingacita: ISHIBA IFYACINDAMA

Fimo ifilanga ati naukula “kwishibe bwino bwino ifyacilapo ukucindama.”—Abena Filipi 1:10.

Natanya atile: “Bamayo balingafwile ukwishiba ukuti takwaba abakwata inshita iikalamba ukucila bambi. Nalingile ukulashako inshita ya kusambilila. Ilyo natendeke ukutemwa ukusambilila, nalitampile ukulashako inshita.”

Yolanda atile: “Ili nakula, nalisambilila ukuti mfwile ukukwata inshita ya kusambilila, kabili pali iyo ine inshita natantika epo nsambilila nangu nikwata fimbi ifyo mfwile ukucita.”

Diana atile: “Nga watampilapo ukusambilila ilyo taulaya mu kwangala, ukatemwa ukusambilila ica kuti nelyo waya mu kwangala tawakomfwe ububi.”

Uleibukisha ukuti: Nga tautantike ifyo ufwile ukubalilapo ukucita, tawakasange inshita ya kucitamo fyonse ifyo ufwaya ukucita. Kuti cawama nga waifwaila inshita ya kusambilila.—Abena Efese 5:15, 16.

Jordan atile: “Apo ndi mwana we sukulu uwa ku sekondari, nga nshicenjele, kuti nabika amano yonse ku fintu fimbi! Na lyo line, nangu nalikwata ifya kucita ifingi nshilaba ukubelenga Baibolo.”

Ifya kutontonkanyapo:

Kuti watantika shani inshita ya kusambilila?

[Akabokoshi ne Fikope pe bula 19]

IFYO ABANOBE BALANDAPO

Zachary atile: Te kubelenga fye ifyo abafyashi na bambi batemenwe. Nga ulefwaya ukuisambilisha we mwine ufwile ukubelenga ifyo ulefwaya ukusambililapo.

Kaley atile: Kutampa fye panono panono. Nga ulefwaya kuti ulebelengako fye pa mamineti 5 cila bushiku, lyena pa numa kuti walundako yaba amaminet 10, nangu 15, . . . Mu kupita kwa nshita ukasuka ukatemwe ukubelenga Baibolo.

Daniela atile: Ukucitako utuntu utunono na ko kuti kwayafwa. Kuti wabomfya amapeni yamakaala yapusanapusana kabili wasenda na pa kulemba apasuma, e lyo kuti wabomfwa kompyuta nga walikwata.

Jordan atile: Nga nasala ilyashi natemwa, ndabelenga inshita iikalamba. Kabili ndafwaya ukushili icongo. Ndafilwa ukubelenga nga kuli icongo.

[Icikope pe bula 12]

(Nga mulefwaya ukumona icikope moneni muli magazini)

putula

peta