ICIPANDE ICIKALAMBA | BUSHE KUTI MWATEMWA UKUSAMBILILA BAIBOLO?

Abantu Bonse Kuti Basambilila Baibolo

Inte sha kwa Yehova baishibikwa ukuti balashimikila imbila nsuma ku bantu bonse. Lelo bushe mwalishiba ukuti ba Nte balasambilisha abantu Baibolo mu calo conse?

Mu 2014, ba Nte ukucila pali 8,000,000 aba mu fyalo 240, balisambilishe Baibolo abantu mupepi na 9,500,000 cila mweshi.a Twamona ukuti abantu abalesambilila Baibolo na ba Nte balicila pa mpendwa ya bantu ababa mu fyalo 140!

Pa kuti ba Nte balebomba bwino uyu mulimo, cila mwaka balasabankanya ama Baibolo, ifitabo, magazini, ne fitabo fimbi ifilanda pali Baibolo ukucila pali 1 bilioni, mu ndimi 700. Uyu umulimo walilenga abantu ukulasambilila Baibolo mu ndimi shabo.

“Nshatemenwe ukusambilila ku sukulu, lelo nalitemenwe sana ilyo natendeke ukusambilila Baibolo. Ifyo nalesambilila fyalelenga ndeba ne nsansa!”—Katlego, South Africa.

“Ukusambilila Baibolo kwalingafwile ukusanga amasuko ku mepusho yonse ayo nakwete.”—Ba Bertha, Mexico.

“Nalesambilila Baibolo pa ng’anda pa mwandi kabili pa nshita iyo ne mwine nalefwaya. Fyonse fyale-enda fye bwino!”—Ba Eziquiel, Brazil.

“Nalesambilila Baibolo ukulingana ne nshita nalekwata, inshita shimo pa mamineti 15 nelyo 30 nangu fye ukucilapo.”—Ba Viniana, Australia.

“Nalitemenwe pantu tabalendipilisha pa kusambilila Baibolo!”—Ba Aimé, Benin.

“Abalensambilisha Baibolo balentekanishisha kabili bali ne cikuuku. Twalitemwanene sana.”—Ba Karen, Northern Ireland.

“Abantu abengi balasambilila Baibolo, lelo tababa ba Nte.”—Ba Denton, England.

AMASUKO KU MEPUSHO ABANTU BEPUSHA SANA PA FICITIKA PE SAMBILILO LYA BAIBOLO

Finshi tucita pa kusambilisha abantu Baibolo?

Tulalanda pa malyashi yalekanalekana aya mu Baibolo, kabili tulabelenga na Malembo ayalelanda pa fyo tulesambililapo. Ku ca kumwenako, tulalanshanya pa fyo Baibolo yasuka amepusho yamo pamo nga: Bushe Lesa nani? Bushe Lesa aba shani? Bushe alikwata ishina? Bushe ekala kwi? Bushe kuti twapalama kuli ena? Ubwafya ubo abantu bakwata bwa kwishiba uko bengasanga amasuko.

Pa kwafwa abantu ukusanga amasuko, tulasambilila na bo mu citabo icakwata amabula 224 icitila: Bushe Cinshi Baibolo Isambilisha?b Ici icitabo balicilemba pa kuti tulesambilishamo abantu amasambililo ya kutendekelapo aya mu Baibolo. Mwaba amasambililo ayalanda pali Lesa, pali Yesu Kristu, pa calenga abantu ukulacula, pa kubuuka, ipepo, e lyo na masambililo yambi.

Ni lilali kabili ni kwi musambilishisha abantu Baibolo?

Kuti mwasambilila Baibolo pa cifulo icili conse na pa nshita iyo mulefwaya.

Ma-awala yanga musambilila Baibolo na bantu?

Abantu abengi balasambilila Baibolo pe awala limo cila mulungu, lelo umuntu umwine kuti asala ukulingana ne fyo alefwaya. Bamo basambilila pa mamineti 10 nelyo 15 cila mulungu.

Ni shinga mfwile ukulipila pa kusambilila Baibolo?

Tatulipilisha abantu kabili tatushitisha ne fitabo fya kusambililamo. Tukonka ifyo Yesu aebele abasambi bakwe ati: “Mwapeelwe fye ubupe, na imwe mulepeela fye.”—Mateo 10:8.

Ni lilali nkapwisha ukusambilila Baibolo?

Kuti mulesambilila Baibolo ukulingana ne fyo mwe bene mulefwaya. Icitabo icitila Bushe Cinshi Baibolo Isambilisha? cakwata ifipandwa 19. Kuti mwasalapo ukusambilila ifipandwa fimo fimo nelyo kuti mwapwisha fye fyonse.

Bushe mfwile ukuba Inte ya kwa Yehova nga napwisha ukusambilila?

Awe. Twalishiba ukuti cila muntu alikwata insambu sha kuisalila ifyo umwine alefwaya ukusuminamo. Na lyo line, abantu abasambilila ifyaba mu Baibolo no kufyumfwikisha, balasalapo ukulacita ifyo balesambilila.

Ni kwi ningasanga ifyebo na fimbi?

Pa Webu saiti yesu iya jw.org/bem paliba ifyebo ifilanda pa fyo Inte sha kwa Yehova basuminamo e lyo ne milimo babomba.

Kuti nacita shani nga ndefwaya ukusambilila Baibolo?

Kuti mwalembela ku Webu saiti yesu iya www.jw.org/bem ukuti mulefwaya ukusambilila Baibolo.
Kuti mwalembela kuli adresi ya mupepi no ko mwikala. Ama adresi yali pe bula 2 iya ino magazini.
Kuti mwaeba Inte sha kwa Yehova ababa ku cifulo mwikala.

a Ilingi line tulasambilisha Baibolo ku muntu umo nelyo ibumba.

b Abalemba ici icitabo ni Nte sha kwa Yehova. Impendwa bapulinta ici citabo yalicila pali 230 milioni, mu ndimi ukucila pali 260.

IFINGAAFWA ULUPWA

“Ilyo umukashi wandi atampile ukusambilila Baibolo, nalimwene ukuti alitendeke ukuba ne mibele iisuma. Twalitampile ukwikala bwino pa ng’anda. Apo nalefwaisha ukwishiba ifyo alesambilila, na ine nalitendeke ukusambilila Baibolo. Ifyo nasambilile fyalengele naba umuntu umusuma. Ukusambilila Baibolo kwalengele twalaumfwana mu lupwa.”—Ba Eziquiel.

“Lintu natendeke ukusambilila Baibolo, nalilekele ukupeepa fwaka, ukunwesha ubwalwa no kukalipa sana. Mu ng’anda yandi mulamoneka bwino kabili mwa busaka. Nalitemwa sana aba mu ng’anda yandi kabili ndomfwa bwino nga ndecita ifilenga baleba ne nsansa. Naliba sana ne nsansa.”—Ba Karen.

“Abantu bamo balenseka pantu nalesambilila Baibolo. Lelo abalume bandi balensuminisha kabili balenjeba abati: ‘Nshisakamana nangu abantu balekuseka. Nalitemwa ifi wayalula imibele yobe. Twalilila ukusambilila Baibolo.’ Twaliba sana ne nsansa mu lupwa lwesu!”—Ba Viniana.