IFINGAFWA ULUPWA
Ifya Kucita pa Kuti Mwilakansana
UBWAFYA
Bushe mulafilwa ukulanshanya na bena mwenu mu mutende? Bushe lyonse nga mulelanshanya mumfwa kwati mule-enda apaba utupata utwingapuulika inshita iili yonse, e kutila mulaba no mwenso wa kuti ico mwalalanda kuti calenga mutampe ukukansana?
Nga e fyo caba, ishibeni ukuti ifintu kuti fyawama. Nomba intanshi mufwile ukwishiba icilenga mulekansana.
UMULANDU KUBELA UBU BWAFYA
Ukanaumfwana. Umwanakashi uwaupwa uwe shina lya Jilliana atile: “Limo kuti nafwaya ukulanda fimo ku balume bandi nomba pa kulanda nanda fye fimbi fye, e lyo limo kuti ndemona kwati nalibebele fimo nishininkisha no kuti cine cine nalibebele, kanshi nalotele fye ati nimbeba. Ici calincitikilapo!”
Ukupusana mu fyo mumona ifintu. Nangu mwalipalana na bena mwenu mu fintu ifingi, limo limo mukalapusana mu fyo mumona ifintu. Mulandu nshi? Pantu takwaba abantu abapalana muli fyonse fye—kabili ubu bupusano kuti bwalenga icupo ukuwama e lyo limbi kuti bwaleta amafya. Nomba ku baupana abengi, ubu bupusano bulalenga balekansana.
Abafyashi benu nga baalekansana. “Umwanakashi uwaupwa uwe shina lya Rachel, atile abafyashi bandi balekansana sana kabili baleisaalula, e ico ilyo naupilwe na ine nalekansana na balume bandi filya fine bamayo balecita kuli batata. Nshaishibe ifya kulanda mu mucinshi.”
Ishibeni icilengele. Ilingi line icilenga abantu ukukansana fintu fye fimbi ifishikumine ne fyo balekansaninapo. Ku ca kumwenako ukupusana kuti kwatampila na mashiwi ya kuti “Imwe lyonse kucelwa!” nomba ukulanda fye icishinka, ukucelwa limbi te kuti kube e bwafya bulipo, lelo ubwafya kuti bwaba bwa kuti umo pa baupana alemona kwati umunankwe tamubikako amano.
Icishinka mufwile ukwibukisha ca kuti, te mulandu ne filenga mulekansana, ukukansana cila nshita kuti kwalenga mwalwala, kabili kuti kwalenga ne cupo cenu ukupwa. Nomba kuti mwacita shani pa kuti muleke ukukansana?
IFYO MWINGACITA
Icingamwafwa sana ukukanakansana kwishiba ifilenga mulekansana. Mukeshe ukucita ifi twalalandapo na bena mwenu ninshi bonse babili tamufulilwe.
1. Buleni amapepala yabili kabili cila muntu alembe icalengele ukuti mupusane umuku wafumineko. Ku ca kumwenako umulume kuti alemba ukuti, “Akasuba konse mwali fye na banenu ukwabula no kuti muntumine foni pa kuti njishibe uko mwali.” Umukashi na o kuti alemba ati, “Mwalifulilwe pa mulandu wa kuti naile ku banandi.”
2. Mu bufumacumi lanshanyeni pali ifi fyebo: Bushe pali umulandu uukalamba uwa kupusaninapo? Bushe nga twalisuulileko fye? Limo pa mulandu wa kuti mulefwaya pabe umutende, kuti cawama ukusumina ukuti ifyo mulemona ifintu nafipusana kabili labeniko ku bwafya pa mulandu wa kutemwa.—Amashiwi ya mu Baibolo ayatutungulula: Amapinda 17:9.
Nga mwasanga ukuti tapali no mulandu wine wine uwa kupusaninapo, bonse babili lombeni ubwelelo ku bena mwenu kabili labeniko no kulabako.—Amashiwi ya mu Baibolo ayatutungulula: Abena Kolose 3:13, 14.
Nga umo nelyo bonse babili mulemona kwati ubwafya bukalamba ninshi citeni ifyakonkapo.
3. Lembeni ifyo mwaleumfwa ilyo mwalekansana kabili ebeni abena mwenu nabo balembe ifyo baleumfwa. Ku ca kumwenako, abalume kuti balemba ati: “Naleumfwa kwati umfwa bwino ukuba na banobe ukucila ukuba na ine.” Abakashi na bo kuti nalimo balemba ati, “Naleumfwa kwati mumbona kwati ndi mwana umunono uufwile ukulaeba bawishi konse uko ali.”
4. Peleni abena mwenu ipepala lyenu nabo bamupele ipepala balembelepo, e lyo cila muntu abelenge ifyo umunankwe alembele. Cinshi abena mwenu basakamene sana ilyo mwalekansana? Lanshanyeni ifyo cila muntu aali no kucita pa kuti mupwishe ubwafya ukwabula ukukansana.—Amashiwi ya mu Baibolo ayatutungulula: Amapinda 29:11.
5. Lanshanyeni ifyo mwasambilila muli ifi fyonse twalandapo. Kuti mwabomfya shani ifyo mwasambilila pa kuti mwikakansana umuku uukakonkapo?
[Futunoti]
a Te mashina yabo aya cine.
[Akabokoshi pe bula 5]
AMALEMBO AYACINDEME SANA
“Uufimba pa filubo afwaya ukutemwikwa.”—Amapinda 17:9.
“Muleshipikishanya no kubelelana uluse.”—Abena Kolose 3:13.
“Uwatumpa afumya icipyu cakwe conse, nomba uwa mano alacikaanya.”—Amapinda 29:11.
[Akabokoshi pe bula 5]
NGA MWAKANSANA . . .
Fwailisheni: Bushe ilyo mwalekansana finshi cila muntu alefwaya ku munankwe? Ishibeni imilandu iikalamba iyalengele.
Tontonkanyeni pa fyacitike: Mu nshita ya kuti mulekansana, finshi cila muntu aali no kucita pa kuti mupwishe ubwafya?
[Amashiwi pe bula 5]
Nga mwasanga ukuti tapali no mulandu wine wine uwa kupusaninapo, bonse babili lombeni ubwelelo kabili labeniko no kulabako