IFINGAFWA ULUPWA | ICUPO
Ukubelela Abena Mwenu Uluse
UBWAFYA UBUBAPO
Lyonse nga mwapusana na bena mwenu, mulatendeka ukulanda pa filubo bacitile kale ifyo mwali no kupwisha ilyo line fyacitike. Cinshi cilenga mukwate ubwafya bwa musango uyu? Ninshi umo pali imwe nelyo bonse babili tamwaishiba ifya kubelelana uluse.
Kuti mwasambilila ifya kubelela abena mwenu uluse. Lelo, intanshi moneni ifilenga umulume no mukashi ukulafilwa ukubelelana uluse.
UMULANDU KUBELA UBU BWAFYA
Ukufwaya ukukwata amaka pa bena mwabo. Abalume na bakashi bamo balafilwa ukwelela abena mwabo pa kuti nga bapusana balebomfya ico cilubo nga ubwembya ubwa kulopwelako abena mwabo.
Ukusunga icikonko ku mukoshi. Ifyo abantu bakalifya abena mwabo kuti filebakalipa fye pa nshita ntali. Umuntu kuti aeba umwina mwakwe ati ‘Nakwelela’ uku ninshi nashala ale-enda fye ne cikonko ku mukoshi pa mulandu ne fyacitike, kabili limo kuti alafwaisha no kulandula.
Ifyo bale-enekela nga taficitike. Ilyo abantu bamo baleupana, batontonkanya ukuti bakulaumfwana fye umo shacela nga filya ciba mu fyupo fya mu mafilimu. Kanshi nga bapusana, cilabaponya sana pa musao ukusanga ukuti tabatontonkanya fimo fine no muntu uo balemona ukuti balilingana mu fintu fyonse. Nga umuntu aletontonkanya ukuti akulaumfwana no mwina mwakwe mu fintu fyonse, kuti aisa mu kulamona sana ifilubo mu mwina mwakwe no kulafilwa ukumubelela uluse.
Ukukanaishiba umwalola ukwelela. Abaupana abengi balafilwa ukubelela abena mwabo uluse pantu tabaishiba umwalola ukubelela uluse. Ku ca kumwenako, kuti balatontonkanya abati:
Nga namwelela, ninshi calaba kwati icilubo apangile cinono.
Nga namwelela, ninshi mfwile no kulabako ku cilubo acitile.
Nga namwelela, ninshi akabwekeshapo ukucita cimo cine.
Umuntu nga atontonkanya ifi twalandapo ninshi taishiba umwalola ukubelela uluse. Kwena, ukwelela umuntu limo kulafya maka maka ku baupana.
IFYO MWINGACITA
Ishibeni umwalola ukwelela. Mu Baibolo inshita shimo ishiwi lya kuti “ukulekelela” lipilibula “ukulekelako.” Kanshi ukulekelela takupilibula ukuti umuntu alalabililako ku fyacitike nelyo ukulenga cilemoneka kwati icilubo umwina mwakwe apangile cinono. Inshita shimo ukwelela kupilibula ukulekelako, e kutila ukusuulako fye ku fyacitike, pa kuti umutima wenu ube bwino na pa kuti mu cupo cenu mube insansa.
Ishibeni ububi bwaba mu kukanabelela uluse. Abasambilila pa fyupo bamo batila nga mule-enda ne cikonko ku mukoshi kuti mwalwala pa mulandu wa kuba sana no bulanda e lyo kuti mwalwala no bulwele bwa mulopa ukubutukisha (BP), e lyo ne cupo cenu naco kuti caonaika. Kanshi Baibolo yalilungika ilyo itila: “Mubelane icikuuku, mube aba mitima ya nkumbu, abaitemenwa ukubelelana uluse.”—Abena Efese 4:32.
Ishibeni ubusuma bwaba mu kubelela uluse. Ukuba no mutima wa kufwaisha ukulekelela kuti kwalenga mwalatontonkanya ukuti abena mwenu bafwile tabaciminina pa kumukalifya, kabili tamwakatwalilile fye ukwibukisha ifilubo bacitile akale. Nga muli no mutima wa musango uyu, te kuti mule-enda ne cikonko ku mukoshi kabili ici kuti calenga icitemwiko cenu ukulakulilako.—Ilembo Ilingamwafwa: Abena Kolose 3:13.
Mwilaenekela fye ifisuma. Cilanguka ukwelela abena mwenu nga ca kuti mwaishiba bwino bwino ifyo baba, kumo ne fyo bashicita bwino. Icitabo ca Fighting for Your Marriage citila, “Nga mwaikalila fye ukulatontonkanya pa fyo abena mwenu bafilwa ukucita, kuti mwalafilwa no kumona ifisuma ifyo bacita. Bushe finshi mulefwaya ukulatontonkanyapo sana?” Muleibukisha ukuti takwaba umuntu uushilufyanya, na imwe bene mulalufyanya.—Ilembo Ilingamwafwa: Yakobo 3:2.
Mwilakusha imilandu. Abena mwenu nga bacita nelyo ukulanda fimo ifyamukalifya, muleipusha amuti: Bushe ico bacita nacibipa sana? Bushe mfwile ukukosapo fye ukuti mpaka balombe ubwelelo nelyo kuti nasuulako fye?’—Ilembo Ilingamwafwa: 1 Petro 4:8.
Nga te kuti musuuleko fye, lanshanyenipo. Londolweleni abena mwenu mu mutekatima icacimukalipa no mulandu cacimukalipila. Pa kulanda, mwilacita kwati mulebapeela umulandu kabili mwilapampamina fye pa kufwaya ukuti basumine ati e bacilufyanya, pantu ukucita ifi kuti kwalenga batendeka ukulaipokolola. Lelo, landeni fye pa fyo mwacumfwa pa fyo abena mwenu bacicita.
[Icikope pe bula 7]
[Icikope pe bula 7]
[Akabokoshi pe bula 8]
AMALEMBO AYENGAMWAFWA SANA
“Muleshipikishanya no kubelelana uluse nga umo ali ne ca kuilishanya ku munankwe.” —Abena Kolose 3:13.
“Ifwe bonse tulaipununa imiku iingi.”—Yakobo 3:2.
“Ukutemwa kufimba pa membu ishingi.”—1 Petro 4:8.
[Akabokoshi pe bula 8]
ILYO MUFWILE KULOMBA UBWELELO
Nga mwasanga ukuti namukalifya abena mwenu, mulelomba ubwelelo ukufuma pa nshi ya mutima. E lyo nangu mulemona ukuti tapali ifyo mwacilufyanya, kuti mwalomba ubwelelo pa mulandu wa kuti ifyo mwacicita fyacilenga abena mwenu ukumfwa ububi. Nga mwabombesha ukukanabwekeshapo ukucita icikalifye abena mwenu, bakacetekela ukuti ubwelelo mwalomba bwa cine.