IFYO BAIBOLO ISAMBILISHA

Ubumi

Bushe Lesa alabikako amano ku fyo tucita ku mibili yesu?

“Wiba pa banwensha umwangashi, na pa bafunukila inama.”—Amapinda 23:20.

MULANDU NSHI CACINDAMINA? Kwena Baibolo te citabo icilanda pa fya kuundapa amalwele e lyo kabili taitweba ifya kucita pa fintu fyonse fye. Na lyo line, ilatwafwa ukwishiba ifyo Lesa amona ubumi.

IFYO BAIBOLO ISAMBILISHA Amalembo ayengi yalatweba ifyo Lesa omfwa pa fyo tucita ku mibili yesu. Ku ca kumwenako, Baibolo yalilesha ukunwensha ubwalwa no kuliisha. (Amapinda 23:20) Amafunde ayo Lesa apeele abena Israele yalalanda ne fyo balekabila ukucita pa kuti baicingilile ku malwele ayambukila nelyo pa kuti belalwala amalwele yamo. Ifunde na kabili lyalilandile ne fyo bali no kucita pa kuti baicingilile ku masanso yamo. (Amalango 22:8) Ukwabula no kutwishika, Baibolo itukoselesha ukusunga bwino imibili yesu kabili ilatweba ne fyo tufwile ukucita pa kuti tube no bumi ubusuma.

Bushe Baibolo itila cinshi tulwalila?

“Ulubembu lwaingilile mu muntu umo pano calo ne mfwa yaingilile mu lubembu.”—Abena Roma 5:12.

IFYO ABANTU BALANDA Abantu abengi basumina ukuti ilyo abantu baalesanguka kwali fimo ifyalubene ifyalenga ukuti tulelwala. Bambi nabo bamona kwati kwaliba imipashi yabipa iilenga tulelwala.

IFYO BAIBOLO ISAMBILISHA Baibolo itila icilenga tulelwala ni co abafyashi besu abakubalilapo balibembukile Lesa. (Abena Roma 5:12) Ilyo Adamu na Efa bashilabembuka, bali abapwililika kabili tabalelwala. Balishibe ukuti bali no kufwa nga ca kutila bapondokela Lesa uwalebasakamana. (Ukutendeka 2:16, 17) Na lyo line, balyonawile bucibusa bwabo na Lesa ku mufulo fye kabili baishileba ababembu.aFilya abafyashi besu aba kubalilapo baishileba ababembu, fyalilenga ukuti na ifwe tube ababembu. Kanshi nangu abantu beshe shani ukupwisha amalwele, balafilwa, tutwalilila fye ukulalwala.

FINSHI MWINGACITA? Baibolo isambilisha ukuti nga mwatendeka ukumfwila amafunde ya kwa Lesa, mukaba cibusa wakwe kabili ku ntanshi mukekala mu paradaise pano pene pe sonde no kukwata ubumi ubusuma. (Esaya 33:24) Lesa alaya ukuti akafumyapo ukukalipwa, ukulwala e lyo ne mfwa.—Ukusokolola 21:3, 4.

Bushe Baibolo ilakaanya ukunwa umuti umuntu nga nalwala?

“Abatuntulu tabakabila kondapa, kano abalwele.”—Mateo 9:12.

IFYO ABANTU BALANDA Abantu bamo nga balwala tabanwa umuti, basumina ukuti nga ba bapepelela ninshi kuti bapola.

IFYO BAIBOLO ISAMBILISHA Ku kale, Lesa alisuminishe ukuti abantu baleundapa bambi. (Ukutendeka 38:28; Abena Kolose 4:14) Mu Baibolo tamwaba apalembwa ukuti Lesa alifulilwe ilyo abantu babomfeshe imiti ya mpanga, nelyo amafuta ku kundapilako bambi. Kabili tayalanda ukuti calibipa ukulya nelyo ukuleka ukulya fimo pa kuti umuntu ondapwe, nangu ukuti calibipa ukufwaya inshila shimbi isha kundapilwamo. Na kuba Yesu atile, “abatuntulu tabakabila kondapa, kano abalwele.”—Mateo 9:12.

Kwena Baibolo taisuminisha ukuti umuntu afwile ukubomfya umuti uuli onse fye nangu ukucita ifili fyonse pa kuti fye apole. Ku ca kumwenako, ino nshita kwaliba abantu abapepelela abalwele pa kuti bapole mu cisungusho, Baibolo taisuminisha ifya musango uyu. Na kabili Lesa tasuminisha ukubomfya imiti nelyo ukucita fimo ifya mipashi pa kuti umuntu apole. (Abena Galatia 5:19-21) Kanshi umuntu nga alwala, bwangu bwangu afwile ukuya uko bengamundapa cikulu fye inshila balemundapilamo tailepusana na mafunde ya kwa Lesa.

[Futunoti]