IFILECITIKA MU CALO
Ukulanda pa Filonganino fya Mapepo
Ifilonganino fya mapepo e filingile ukulalenga abantu ukwikatana. Nomba ilingi line, e filenga abantu ukulalwishanya no kukanacetekelana.
Mwi Isonde Lyonse
Abantu abengi mwi sonde bekala mu fyalo umo cayafya ukupepa pa mulandu wa mafunde ya calo nelyo pa mulandu wa kuti abantu balacusha abanabo pa mulandu wa kupepa ukwapusanapusana. Mu myaka 5 iyapitapo, ifyalo umo bacusha abantu pa mulandu wako bapepa fyalifulilako.
TONTONKANYENI PALI ICI: Milandu nshi imo iyo abantu bamo bapatila ifilonganino fya mapepo?—Mateo 23:27, 28; Yohane 15:19.
England
Uwali Cilolo Mukalamba Tony Blair alembele mu nyunshipepala ya Observer ukuti icilenga kuleba sana ukunsansa kwa fipondo ni co abantu “balabomfya ifilonganino fya mapepo bubi bubi.” Alandile no kuti, “Muli ba 1900 inkondo shalebako pa mulandu wa kukanaumfwana kwa baba mu fikansa fya calo, lelo muli ino myaka mwena, ica kulalenga sana abantu ukulalwa inkondo kupusana intambi no ko bapepa.”
TONTONKANYENI PALI ICI: Mulandu nshi bantu balwishanishisha pa mulandu wa kuti bapepa ukwalekanalekana? —Marko 7:6-8.
Australia
Akabungwe ka Australian Bureau of Statistics kalandile ukuti pa bena Australia 5, umo taakwata uko apepa. Kalandile no kuti “abengi abatila balikwata uko bapepa tababikako sana amano.” Na kuba, bantu fye abanono sana pa bakwata uko bapepa abacincila mu fya mapepo.
TONTONKANYENI PALI ICI: Mafya nshi mwamona ayo ifilonganino fya mapepo fyaleta?—Mateo 7:15-20.