IFILECITIKA MU CALO
Mu Africa
Utubungwe utwingi e lyo na bantu bamo baleesha na maka ukuwamya ifintu mu Africa. Na lyo line, mucili mwaliba amafya ayakalamba nga nshi.
Ukulunga Bacipembele
Mu South Africa mu mwaka wa 2013, baipeye bacipembele 1,004, ukupusanako ne fyo cali mu 2007 umo baipeye fye 13. Nangu ca kuti ino nshita baleshitisha amasengo ya cipembele ayengi, abakushita aya masengo nabo balefulilako fye ica kuti baleyashitisha pa mutengo uukulu ukucila ne fyo bashitisha golde. Ulusengo fye lumo ulwa cipembele kuti balushitisha mupepi na madola ya ku America 500, 000.
TONTONKANYENI PALI ICI: Bushe amabuteko kuti yapwisha bumpulamafunde?—Yeremia 10:23.
Ubupuupu
Akabungwe ka Transparency International katile, mwaliba ubupuupu sana mu fyalo fyabela ku Kabanga ka Africa ukucila ifyalo fyonse pe sonde. Nangu cibe ifyo, abantu abengi abo bebila tabaya mu kulembesha ku kapokola. Uulandilako aka kabungwe mu calo ca Kenya atile: “Abekala calo tabacetekela amabuteko yabo ukutila kuti yacitapo cimo nangu balanda amafisakanwa ayacitika.”
IFYO BAIBOLO ILANDA: “Amafisakanwa yafiisha pa menso ya bamona bwino.”—Ukufuma 23:8.
Ifyo Abena Africa Babomfya Intaneti
Akabungwe ka International Telecommunication Union katile, pa kuti umwaka wa 2014 ukapwe pa bantu 100 mu Africa abantu 20 bakulabomfya intaneti. Abantu abaletendeka ukubomfya Intaneti ya pa foni mu Africa balefula sana ukucila mu fyalo fimbi.