Amepusho Ukufuma ku Babelenga

Bushe Umwina Kristu kuti apeela umubomfi wa buteko indalama nelyo ubupe pa kuti amucitile fimo, nelyo bushe kuti twatila nga acite co ninshi mafisakanwa?

Abena Kristu konse fye uko bekala, bakabila ukucenjela ku ficitika mu calo, pantu balishiba ukuti fimo ifimoneka fye bwino mu calo cimo, ifyo ne funde lya buteko lyasuminisha, mu fyalo fimbi fimonwa ukuti fibi sana kabili fyalibindwa no kubindwa. (Amapinda 2:6-9) Kwena, Umwina Kristu afwile lyonse ukulaibukisha ukuti onse uufwaya ‘ukulebela mwi hema’ lya kwa Yehova, tafwile ukucita amafisakanwa.—Amalumbo 15:1, 5; Amapinda 17:23.

Bushe amafisakanwa e cinshi? Icitabo ca The World Book Encyclopedia, citila “amafisakanwa kupeela ubupe ku . . . muntu uwakwata icifulo, na o apula mwi funde pa kuti ciwamine uumupeele.” E ico kanshi, konse fye uko umuntu ekala, ukupeela shimafumu ubupe nelyo indalama pa kuti afufunkanye milandu nelyo ukupeela kapokola ubupe pa kuti cibe kwati tamwene ukuti umuntu napula mwi funde, mafisakanwa. E cimo cine no kupeela umuntu ubupe pa kuti ucilile abanobe mu mulongo nelyo ukuti bakucitile fimo bwangu bwangu ilyo bambi bashala balelolela. Ukucite ca musango yo ku munobe, cilanga fye ukuti tawamutemwa.—Mateo 7:12; 22:39.

Lelo bushe kuti twatila mafisakanwa ukupeela umubomfi wa buteko indalama nelyo ubupe, pa kuti akucitile fimo ifishipusene ne funde, nelyo ukuti e kufyenga? Ica kumwenako fye, mu fyalo fimo, abakalamba ba masukulu tabengisha abana be sukulu, kano umwine wa mwana abapeelako kamo. Aba ku cipatala na bo, kano wabapako kamo e lyo bengakupoosako amano. Ababombela pa mupaka wa calo na bo pa kuti fye bakusainine amapepala kano wabapako kamo. Umuntu nga tabapeele, balashingashinga ukumupeela icitupa nelyo amapepala yamo aya buteko.

Ifyo abantu bamona ifi fya bupe no musango bapeelelamo, fyalipusana ukulingana ne calo bekalamo. Mu fyalo umo ukupeela ifya bupe fya musango yu waba mwata, kabili umo ababomfi ba buteko benekela ukupeelwa ubupe, Abena Kristu bamo kuti batila cili fye bwino pantu tabalepula mu mafunde ya mu Baibolo na ya buteko. Mu fyalo fimbi na mo, abantu bamona no kuti ubupe bwa musango yo busuma pantu bulalenga indalama ya mubomfi wa buteko yabako eyefilyako pantu abengi bafola indalama ishinono. Icishinka cili pano ca kuti ukupeela umuntu ubupe pa kuti akucitile fimo ifishipusene ne funde, nakupusana no kupeela umuntu ubupe pa kuti apule mwi funde no kucita fimo ifyalakuwamina.

Na kabili, ilyo baNte bamo balefwaya ababomfi ba buteko ukubacitila fimo, nangula mu calo bekala caliseeka ukupeela ubupe bwa musango yo, bena balakaana ukupeela bakapokola ubupe, nangu ukupeela ababombela pa mupaka wa calo, na babomfi bambi aba buteko. Pa mulandu wa kuti baNte balishibikwa ukuti tabapeela ubupe bwa musango yo kabili tabacita amafisakanwa, ababomfi ba buteko balabacitila ifintu ukwabula ukwenekela ubupe nga filya benekela ku bashili baNte.—Amapinda 10:9; Mateo 5:16.

Kanshi nga kusupula kuti twatila, umubomfi wa kwa Yehova umo umo afwile ukuipingwila nga kuti apeela ubupe pa kuti bamucitile fimo ifishipusene ne funde nelyo pa kuti tafyengelwe. Ne cacindama sana muli fyonse, afwile apingula bwino ica kucita pa kuti tashele alecula na kampingu, taletele no museebanya pe shina lya kwa Yehova, kabili tacitile icingapunwisha bambi.—Mateo 6:9; 1 Abena Korinti 10:31-33; 2 Abena Korinti 6:3; 1 Timote 1:5.