ICIPANDE ICIKALAMBA | IFYO MWINGALUKA MU FYO MWATEMWA UKUCITA
1 Mulingile Ukutekanya
Nalimo kuti mwafwaisha ukwalula ifyo mwatemwa ukucita pa muku umo. Kuti mwalati, ‘Uno mulungu nalaleka ukupeepa fwaka, ukutukana, ukulakokola ukuya mu kulaala, nalatendeka ukutukusha umubili, ukulalya ifya kulya ifishinganjinisha kabili nakulatuminako bamama na bashikulu amafoni.’ Na lyo line, ukwesha ukwalula ifyo mwatemwa ukucita pa muku umo kuti kwalenga mwafilwa ukwalula fyonse ifyo mwatemwa ukucita.
ILEMBO ILANGAMWAFWA: “Abafuuka e ba mano.”—Amapinda 11:2.
Umuntu uwafuuka alatekanya. Aleshiba ukuti kwaliba ifyo engacita ne fyo engafilwa ukucita. Kanshi mu nshita ya kufwaya ukwalula imisango yakwe pa muku umo, alaya alealuka panono panono.
Ukwesha ukwalula imisango yenu pa muku umo kuti kwalenga mwafilwa ukwalula imisango yenu yonse!
IFYO MWINGACITA
Muleyalula imisango yenu panono panono. Ukukonka ifi twalalandapo kuti kwamwafwa:
Lembeni ifintu ifisuma ifyo mulefwaya ukulacita e lyo ne misango yabipa iyo mulefwaya ukuleka. Mwilemba ifinono, lelo mulembe fye fyonse ifyo mulefwaya ukulacita ne fyo mulefwaya ukuleka ukucita.
Mubalilepo ukulemba ifintu ifyo mulemona ukuti e ficindeme sana.
Lyena kuti mwatendeka ukubombela pali cimbi nelyo fibili.
Pa kuti muleke bwangu imisango yabipa, esheni ukuipyanikishapo ne fintu ifisuma. Ku ca kumwenako, nga ca kuti mulapoosa sana inshita ukutamba TV e lyo pa nshita imo ine mulafwaya ukulalanshanya sana na balupwa wenu ne fibusa, ninshi kuti mwacita ifi: ‘Nga ca kuti mwainuka ku ncito, tamulingile ukwasha TV ilyo line fye mwafika, lelo kuti cawama ukulanshanya na lupwa wenu nelyo cibusa pa foni.’