“Inshila Iipya iya Kusambilishishamo”

BA SOO-JEONG abafunda pe sukulu ilyaba mu South Korea balabomfya amavidio ayaba pa webusaiti ya jw.org ilyo balefunda. Batile: “Abana be sukulu balitemwa sana vidio itila, What’s a Real Friend? Nga batamba iyi vidio, balitemwa ukulanda abati: ‘Tatwaishibe ukuti ifi e fyo cibusa wa cine afwile ukuba. Iyi ni nshila iisuma iya kusambilishishamo.’ Bamo balandile no kuti lyonse ilyo balefwaya ukusalapo ifya kucita, bakulaya pali iyi webusaiti.” Ba Soo-jeong balandile no kuti: “Nalyebako na bakafundisha banandi ukuti balebomfyako iyi vidio kabili balatemwa sana ukubomfya vidio yawama ifi pa kusambilisha.”

Vidio imbi iyo abana be sukulu aba ku South Korea batemwa sana ya tukadoli twa kulenga iitila, Ifyo Wingacimfya Uulekucusha Ukwabula no Kulwa Nankwe. Kafundisha uubomba ku kabungwe ka Juvenile Violence Prevention Foundation alitambishe iyi vidio ku bana be sukulu. Atile: “Abana be sukulu abengi balatemwa sana ukutamba iyi vidio pantu ifikope filamoneka bwino. Na kabili muli iyi vidio mwaliba ifyebo ifyafwa abana ukwishiba ifya kucita nga balebacusha e lyo ne fya kucita pa kuti belabacusha.” Aba muli aka akabungwe balipokele ulusa pa kuti baletambisha iyi vidio ilyo balesambilisha kabili balibasuminishe. Nangu fye ni bakapokola balabomfya amavidio ayaba pa jw.org.

Nga tamwayapo pali iyi webusaiti, kuti cawama nga mwalilepo. Iyi webusaiti yalyanguka ukubomfya kabili kuti mwakopolola amavidio, impapulo isho babelenga, Baibolo ne mpapulo shimbi ukwabula ukulipila.