1 Ifyo Mwingacita Pa Kuti Mulebika Sana Amano Ku Kukosha Icupo Cenu

UKUBIKA AMANO KU KUKOSHA ICUPO

Abaupana ababika amano ku kukosha icupo cabo bamona ukuti icupo tacifwile ukupwa, kabili ici cilacingilila icupo cabo. Mu fyupo fya musango uyu, umulume no mukashi balacetekela ukuti bakatwalilila ukuba pamo nangu bakakwate amafya.

Abaupana bamo balatwalilila ukuba pamo pa mulandu wa kuti tabafwaya ukukalifya balupwa wabo nelyo ifibusa. Nomba cilawama sana nga ca kuti ukutemwa no mucinshi e fyalenga ukuti abaupana batwalilile ukuba mu cupo.

ILEMBO ILINGAMWAFWA: “Umulume tafwile ukufuma ku mukashi wakwe.”—1 Abena Korinti 7:11.

“Nga tulebika sana amano ku kukosha icupo cesu, tatwakulafulwa bwangu, lelo twakulayangufyanya ukweleela e lyo no kulomba ubwelelo. Na kabili tatwakulakusha ifilubo ica kuti fyalenga ne cupo capwa.”—E fyalandile ba Micah.

UMULANDU TULINGILE UKUBIKA AMANO KU KUKOSHA ICUPO

Nga ca kuti abaupana abashibika amano ku kukosha icupo cabo bakwata amafya, balitemwa ukulanda ukuti, ‘Tatwalingile ukuupana,’ kabili balafwaya ukupwisha ifyupo.

“Abantu abengi bopana ninshi baletontonkanya na pa kupwisha icupo nga ca kuti bakwata amafya. Abantu ba musango uyu balafilwa ukutwalilila ukuba mu cupo.”—E fyalandile ba Jean.

IFYO MWINGACITA

TONTONKANYENI PALI IFI

Nga ca kuti mwapusana . . .

• Bushe mulatontonkanya ukuti kanshi nga tamwaupene fye na bena mwenu?

• Bushe mulatontonkanya pa kuupana no muntu umbi?

• Bushe mwalitemwa ukulanda ukuti “Icupo calapwa” nelyo ukuti “Nkafwayako umbi uwingantemwa”?

Nga mwacasuka ukuti ee ku cipusho cimo nelyo ukucilapo, ninshi mulingile ukukosha icupo cenu pa kuti cikapwa.

LANSHANYENI NA BENA MWENU

• Bushe kuli ifilengele tulefwaya icupo cesu ukupwa? Nga e ko fili, ni finshi?

• Finshi tulingile ukucita pa kuti twilafwaya icupo cesu ukupwa?

IFINGAMWAFWA

• Inshita shimo mulelembelako abena mwenu amashiwi ya citemwiko

• Mulebika ifikope fya bena mwenu umo mubombela

• Muletumina abena mwenu foni cila bushiku ilyo muli ku ncito na lintu mushili nabo

ILEMBO ILINGAMWAFWA: “Ico Lesa alundenye, umuntu ecilekanya.”—Mateo 19:6.