Ishibeni Ifishinka
Ubwafya Bubako
Ilingi line, ifyebo fya bufi e filenga tuleba na kapaatulula. Natulande pa fya kumwenako:
Abengisha amacito bamo baishiba ukuti abanakashi te kuti babombe imilimo iyakosa nelyo umwaba ifya sayansi.
Ilyo umwaka wa 1400 ushilafika, abaYuda abaleikala mu Europe balebabepesha ukuti balebika sumu mu fishima fya menshi no kutandanya amalwele. Pa numa ilyo ubuteko bwa baNazi bwatendeke ukuteka, batendeke ukubabepesha ukuti e balengele ubunonshi bwa calo ca German bubwelele pa nshi. Ici calilengele balebacusha sana kabili nangu fye ni ino nshita bamo balipata abaYuda pa mulandu ne fi balebabepesha.
Abantu abengi baishiba ukuti abantu abalemana balafulwa bwangu kabili baliba sana no bulanda.
Abantu abaishiba ubu ubufi kuti bapeela ne fya kumwenako pa kuti balange ukuti ifyo baishiba fya cine. Kabili bamona kwati abashaba na kapaatulula tabaishiba fye icishinka.
Ifyo Baibolo Ilanda
“Te cisuma umuntu ukuba umututu.”—AMAPINDA 19:2.
Bushe ili ilembo lyalola mwi? Nga tatwishibe ifishinka, tatupingula bwino pa fintu. Kabili nga ca kuti twaishiba ifya bufi pa bantu tukaba na kapaatulula.
Ifyo Ukwishiba Ifishinka Kutwafwa Ukukanaba na Kapaatulula
Nga twaishiba ifishinka pa bantu tatwakasumine ubufi ubo abantu babepa pali bena. Kabili nga twaishiba ukuti ifyo twaishibe pa bantu bamo fya bufi, tukaleka ukubamona ifyo twalebamona.
Ifyo Mwingacita
Mufwile ukulaibukisha ukuti ifyo mwaishiba pe bumba lya bantu limo, te fyo abantu bonse ababamo baba.
Muleibukisha ukuti tamwaishiba ifishinka fyonse pa bantu.
Mufwile ukulaumfwa fye amalyashi pa bantu ku bashingamubepa.