Bushe Uli cinakabupalu ca Mpatila?

CINSHI cilenga ulukaakala lwa mishobo, akapaatulula ka nkanda, umusoobololo, umuncishanya, no kulofya umushobo? Fyonse ifi filengwa no kukongama kwaanana mu bantu bonse ukwa mpatila!

Impatila cinshi? Encyclopedia umo alondolola yene nge “mimwene iibako ukwabula ukupoosako inshita ya kupingula bwino bwino nelyo ukwangwako.” Pamo nga abantunse bashapwililika, twakongamina ku kuba ne mpatila ukufika ku cipimo cimo. Napamo kuti waibukishako utushita lintu wapingwilepo ukwabula ukukwata ifishinka fyonse. Baibolo ilacilanya uko kukongamina ku mpatila ne nshila Yehova Lesa apingwilamo. Isoso kuti: “Yehova tamona ifyo umuntunse amona; pantu umuntunse amona pa menso, lelo Yehova amona mu mutima.”—1 Samwele 16:7.

Impatila Kuti Yacena

Ukwabulo kutwishika uuli onse alilangwapo impatila kuli umo pa nshita imo. (Linganyako Lukala Milandu 7:21, 22.) Mu cinkumbawile, ifwe bonse tuli finakabupalu fya mpatila. Nangu cibe fyo, tacimoneka ifyo amatontonkanyo yabamo impatila kuti yalenga ukucena nga ca kuti yashimaishiwa mu kwangufyanya. Caba kuluulutila amatontonkanyo ya musango yo e kwingafumamo ukucena. Kuti kwatukopeka ukusumina ubufi. Ku ca kumwenako, pa mulandu wa mpatila, abantu bamo mu cine cine basumina ukuti umuntu kuti aba umufunushi, umunaŋani, uwatumpa, nelyo uwa filumba pa mulandu fye wa kuti aba ku mipepele imo, ukuba mu mushobo umo, nelyo ibumba lya nko.

Ilingi line impatila ya musango yo itungulula ku kusunga bamo mu nshila yabulamo mulinganya, iya culukusu, nelyo fye iya lukaakala. Amamilioni ya bantu balilufya imyeo yabo mu kwipayaulula, ukulofya kwa mishobo, ukwipaulula imikowa, ne misango imbi iya mpatila yacishamo.

Ukushinguluke sonde lyonse, amabuteko yalilwisha impatila ukupitila mu kwebekesha mwi funde ukuti kubeko insambu sha mayendele, umutelelwe, no mulinganya. Nga ca kuti wabelenga konsticushoni nelyo umutande uwa mafunde ya calo cobe, ukwabulo kutwishika uli no kusangamo iciputulwa nelyo fye ica kuteulula icapangilwa ku kucingilila insambu sha bekashi bonse, te mulandu no mushobo wabo, nampo nga baume nelyo banakashi, nelyo kuntu bapepa. Nalyo line, impatila no musoobololo fyaba fye mpanga yonse ukushinguluke calo.

Bushe uli cinakabupalu ca mpatila? Bushe waishibikwa ngo mufunushi, umunaŋani, uwatumpa, nelyo uwa filumba pa mulandu fye wa mushobo obe, umushinku, pa kuba umwaume nelyo umwanakashi, uluko, nelyo ifisumino fyobe ifya mipepele? Bushe balakutana amashuko ya masomo yalinga, incito, amayanda, no kumwenamo kwa mu bwikashi pa mulandu wa mpatila? Nga ni fyo, ni shani fintu wingabomba ne mpatila mu kutunguluka?

[Icikope pe bula 3]

Ukuluulutila impatila kuletako ubulwani bwa mishobo

[Abatusuminishe]

Nina Berman/Sipa Press