Bushe Ifya Kupangapanga Filenga Mwalaumfwana Shani Na Bena Mwenu?
Nga ca kuti abaupana balebomfya bwino ifya kupangapanga icupo cabo kuti cilekoselako. Ku ca kumwenako, nga ca kuti abaupana tabali ku ncende imo, kuti cabangukila ukulalanshanya.
Lelo abaupana bamo tababomfya bwino ifya kupangapanga kabili cilalenga bakwata amafya pamo nga . . .
ukukanakwata inshita ya kuba pamo.
ukulabomba incito pa nshita balingile ukuba na bena mwabo.
ukuleka ukuba aba cishinka ku bena mwabo.
IFYO MUFWILE UKWISHIBA
UKUKANAKWATA INSHITA YA KUBA PAMO
Ba Michael batile: “Inshita shimo nga ndi no mwina mwandi ciba kwati ndi fye neka pantu tambikako amano. Ilingi umwina mwandi aba fye pa foni kabili alanda ukuti nshileko pa Intaneti ukutula apo bucelele.” Ba Jonathan nabo batile, nga ca kuti umulume nelyo umukashi abikile fye amano pali foni, nangu ca kuti bali pamo kuti baleumfwa kwati bali ku ncende ishapusana.”
TONTONKANYENI PALI ICI: Bushe mulapoosa sana inshita ukutumishanya na bantu bambi amafoni nelyo ama meseji ilyo muli na bena mwenu? —ABENA EFESE 5:33.
UKULABOMBA INCITO
Bamo balabomba incito isha kuti nangu bushiku kuti babatumina amafoni nelyo ukubalembela amameseji. Lelo nangu bantu abashibomba incito sha musango uyu balasanga ukuti balabomba incito nangu bali ku ng’anda. Ba Lee batile, “cilankosela ukukanalanda pa foni nelyo ukubelenga amameseji ya ku ncito nga ca kuti pali iyo nshita ndi no mwina mwandi.” Ba Joy batile: “Imombela ku ng’anda kanshi taca-anguka ukuleka ukubomba no kucitako ifintu fimbi.”
TONTONKANYENI PALI ICI: Bushe mulabikako amano ukukutika nga ca kuti abena mwenu balelanshanya na imwe?—LUKA 8:18.
UKUKANABA NE CISHINKA
Abantu abengi basanga ukuti abaupana balapusana pa mulandu wa kuti umo tatemenwe ifyo umwina mwakwe abikile pa Intaneti. Pabo baipwishe bamo balisumine ukuti balebika ifintu pa Intaneti ukwabula abena mwabo ukwishiba.
Pa Intaneti kuti paba ifyabipa ifingi ifingalenga umuntu uwaupa nelyo ukupwa acita ubucende. Te kuti tupape ifi ba loya balanda ukuti ukukanabomfya bwino Intaneti kwalilenga abantu abengi ifyupo ukupwa.
TONTONKANYENI PALI ICI: Bushe kwaliba ifyebo fimo ifyo mulanda no mwaume nelyo umwanakashi ifyo mushifwaya abena mwenu ukwishiba?—AMAPINDA 4:23.
IFYO MWINGACITA
IFYO MULINGILE UKUBIKAKO SANA AMANO
Nga ca kuti umuntu tabikako amano ku kulya taba no bumi ubutuntulu. Ifi fine e fyo ciba na ku muntu uushikwata inshita ya kuba pamo no mwina mwakwe, mu cupo cabo kuti mwaba amafya ayengi.—Abena Efese 5:28, 29.
IFYO BAIBOLO ILANDA: “Mwishibe bwino bwino ifyacilapo ukucindama.”—ABENA FILIPI 1:10.
Lanshanyeni na bena mwenu pa kuti mumone fimo ifyo mwingabomfya pa fili pe samba nelyo lembeni ifyo mulemona ukuti e fingamwafwa ukukanaleka ifya kupangapanga fyaonaula icupo cenu.
Muleliilako pamo ifya kulya nangu fye umuku umo cila bushiku
Lanshanyeni pa nshita ilyo mufwile ukuleka ukubomfya amafoni nelyo amatabuleti
Tantikeni ubushiku mwingaya mu kulya nelyo ukwangalila pamo na bena mwenu ninshi muli fye babili
Tulingile ukulashimya amafoni ubushiku nelyo ukulayabika apatali na po tulaala
Tulingile ukulakwatako inshita ya kulanda fye ilyashi nalimo pa mamineti 15 cila bushiku ukwabula ukuba na mafoni
Mulekwata inshita ya kulekelapo ukubomfya Intaneti