Isambililo 35

Ifyebo Fyateululwa ku Kulinga Ubutumikishi bwa mwi Bala

1-3. Mulandu nshi cacindamino kusambililo kuteulule fyebo fyesu ku kulinga ubutumikishi bwa mwi bala?

¹ Ulubali lukalamba ulwa mulimo wesu pamo nga batumikishi ba Bwina Kristu ilelo lwabimbamo ukushimikila no kusambilishe Cebo ca kwa Lesa ku bantu abaishiba ifinono nga nshi pa lwa Baibolo. Bamo muli bene tabatala abaikwatanako; bambi baikwata fye pa shelufu. Ici cilepilibulo kuti, nga bali no kunonkelamo mu kukumanina mu fintu tubeba, tukabilo kuteulwila fyene ku mibele yabo. Tacilepilibula ukuti twalule ubukombe bwa iko, lelo tubombeshe mu kuibela ku kulumbulula bwene mu lulimi ulo bengomfwikisha. Mu cishinka, ukufwaikwa ukuteulula ifyebo fyesu muli iyi nshila kwaba bwesho bwa fintu twafyumfwikisha mu kukumanina fwe bene.

² Ukuteulula cipilibulo kwalula ku kulinga imibele ipya, ukutelula. Cipilibulo kuwikisha icintu cimo ku kwikushiwa kwa umo nelyo ukwa umbi. Ukulanguluka umulandu wa kuteulula ifyebo ku kulinga ubutumikishi bwa mwi bala kulingile ukukomaila pa kukabila kwa kupange mipeelele mu butumikishi bwa mwi bala nelyo ilyashi ilili lyonse limbi ilyaanguka kabili ilingomfwika kwi bumba limo no kucilisha ku bantu abapya balesekelela abo tukumanya mu butumikishi bwa mwi bala. Pa kubomba pali iyi mibele mu sukulu, kanshi, ulingile lyonse ukumone bumba lyobe pamo nge fyo wingamona abantu abo ukumanya ilyo ulecitilo bunte ku ŋanda ne ŋanda.

³ Ici tacilepilibulo kuti ilyashi lyobe lilingile ukuba mu musango wa mipeelele ya ku mwinshi no mwinshi ilintu ulebomba pali iyi mibele. Imipeelele ya malyashi yonse ikalaba nga fintu yatantikwa mu makambisho yobe aya nomba line aye sukulu. Lelo cilepilibulo kuti, ukwabulo kusakamana umusango wa mipeelele, ifyebo fya kushinina ifyo ulelundulula no lulimi luntu ulebomfya filingile fyaba mu musango untu wingabomfya ku bantu ukumanya mwi bala. Apo ubukulu bwa kulanda kwesu kucitwa mu butumikishi bwa mwi bala, ici cilingile ukukwafwilisho kuba uwaibukilo kukabila kwa kulanda mu kwanguka, pa cipimo ico ubwingi bwa bantu ukumanya mu mulimo wa mwi bala bengomfwikisha. Walikwete ukupekanya kumo kwa iyi mibele mwi Sambililo 21. Nomba ili no kubombwamo yeka pa mulandu wa kukabilwa kwa iko kwapulamo no kukatama.

4, 5. Londolola umulandu inumbwilo shesu shilingile ukube shaumfwika ku cintubwingi.

⁴ Inumbwilo shayangushiwako pa kuti icintubwingi bomfwe. Ukukabilwa kwa iyi mibele kwalangililwa ku numbwilo isho bamunyina bamo babomfya mu butumikishi bwa ku ŋanda ne ŋanda na pa masambililo ayapya. Ukumfwikisha kwesu kwa Malembo kwalitupeela ubutala bwa mashiwi ayashaishibikwa ku bengi. Tubomfya amashiwi pamo nga, “abashalapo,” “impaanga shimbi,” na yambi. Nga twashibomfya mu kulanda, inumbwilo sha musango yo ilingi tashikwata bupilibulo nangu pamo kuli abo bantu tukumanya mu mulimo wa mwi bala. Shifwile ukulengwo kumfwika pa kubomfya inumbwilo shimbi shapalanako ishalinga nelyo ukushilondolola pa kumfwika. Nangu fye kuloshako kuli “Armagedone” no “kwimikwa kwa Bufumu” kukwata ubupilibulo bwacepa ukwabulo bulondoloshi pa lwa bupilibulo bwa fiko.

⁵ Mu kulanguluka ulu lubali, kafunda obe akalaipusho mwine eka ati, Bushe umuntu uushabeleshanya ne cine ca Baibolo kuti aumfwe co cishinka nelyo inumbwilo? Takakufuupule nge fyo, ku kubomfya amashiwi ya musango yo aya buteokrasi. Yaba lubali lwa butala bwesu ubwa mashiwi kabili tufwaya abantu balesekelela abapya ukubeleshanya na yene. Lelo nga wabomfya ilili lyonse ishi numbwilo, akamona nga ca kuti nashilondololwa.

6-8. Pa kupekanya amalyashi yesu, mulandu nshi tufwile ukusakamanino kusoobola ifishinka fyalinga?

⁶ Ifishinka fyalinga fyasoobolwa. Ukusoobola kobe kwa mfundo sha kupeela mu mulimo wa mwi bala kukalekana pamo fye nga fintu inumbwilo ubomfya shalekana, ukushintilila ku mitantikile. Ici ni pa mulandu wa kuti ilingi kwalibako ifintu fimo ifyo tushingasala ukulanshanya no muntu mupya uulesekelela. Mu mibele ya musango yo ukusala kwa fyebo ciba fye kuli iwe weka. Lelo lintu wapeelwo lubali mwi sukulu, ifyebo uli no kulandapo fyalisoobwelwa kabela. Ukasala fye ukufuma pa fili mu lubali lupeelwe. Cinshi ico wingacita?

⁷ Ica kubalilapo, apo uli uwapelebela mu fishinka wingabomfya, ulingile ukupingulapo imitantikile ya lyashi lyobe iingakusuminisho kusoobola kwakulisha ukwa fishinka fyalinga. Kafunda obe akasekelela mu fishinka ukasoobola na fintu filelinga mu mibele ili mu lyashi lyobe. Ico cili pa mulandu wa kuti ulelangilila, muli iyi mibele ilelangulukwa, ukuti imbali shapusana isha mulimo wa mwi bala shifwaya imisango yapusana iya fyebo. Ku ca kumwenako, te kuti ubomfye ifyebo fimo fine mu kulaaliko muntu mupya uulesekelela ku kulongana nge fyo wingabomfya mu mipeelele ya ku mwinshi no mwinshi. E co, nampo nga ulubali upeelwe lulefwaya ukulanshanya na mwine ŋanda nelyo lyashi lya lyonse ilya pa cisebele, pendelako ibumba ulelandako ukupitila mu fintu ifyo ulesosa na ku fishinka ifyo usoobwele ukufuma mu fyebo fipeelwe.

⁸ Pa kwishiba nampo nge fishinka fili ifyalinga nelyo iyo, kafunda obe akalanguluka ubuyo bwa lyashi lyobe. Mu kutandala kwa ku ŋanda ne ŋanda imifwaile yobe ilingi line iba kusambilisha no kubimbula mwine ŋanda ku kusambilila ifyalundwapo. Pa cipempu ca kubwelelamo ubuyo bobe kulundululo buseko kabili, nga cingacitika, ukutendeke sambililo lya Baibolo ilya mu ŋanda. Nga ili mipeelele ya kukonka pe sambililo, lyene kukwata mwine ŋanda ukusangwa ku kulongana nelyo ukuibimba mu mulimo wa mwi bala, na fimbipo.

9, 10. Ni shani fintu twingeshiba nge fishinka tusoobwele fili ifyalinga?

⁹ Kwena, nelyo mwingaba ni mu lubali lumo lwine ulwa mulimo, ukusoobola kobe ukwa fishinka pambi kuti kwalekanalekana pa mulandu we bumba lyobe. E co ici cilingile ukulangulukwapo na co cine. Ifishinka fili mu fyebo upeelwe ifishili ifyalinga ku mifwaile yobe tafilingile kuletwamo mu lyashi.

¹⁰ Mu cilolwa ca ifi fya kusangwilako imitantikile ifwile ukusoobolwe ntanshi ilyashi talilapekanishiwa. Ipushe auti: Cinshi ico ndefwayo kupwilikisha? Fishinka nshi filekabilwa mu kuti mpwishishishe iyi mifwaile, kabili ni shani ifyo ifi fishinka fingalulwa mu kuti filinge ku mibele iyo ilyashi lilepeelelwamo? Nga wapingulapo pali iyi milandu, ifishinka fyalinga kuti fyasoobolwa ukwabulo bwafya no kupeelwa mu musango wa kuteulwila ifyebo ku kulinga ubutumikishi bwa mwi bala.

11-13. Mulandu nshi cabele cacindama ukulondolola ukukatama kubomba ukwa fyebo ifyo tupeele?

¹¹ Ukukatama kubomba ukwa fyebo kwaebekeshiwa. Ukwebekesha ukukatama kubomba ukwa fyebo cipilibulo kulangisha mwine ŋanda mu kumfwika na mu kubulo kuluba ukuti nafimukuma, ukuti fintu ifyo wene akabila nelyo fintu engabomfya. Ukutula ku kutendeka kwine kwa lyashi mwine ŋanda afwile ukwishibo kuti “ici nacinkuma.” Ici cilafwaikwa pa kunonka ukusakamana kwe bumba. Lelo, pa kwikatilila uko kusakamana, calibe cafwaikwa ukutwalilila ukulanga ifyo ifyebo fingambukila umo na umo pa lwakwe ukupulinkana ilyashi lyonse.

¹² Ici cibimbamo kucila fye pa kumone bumba no kwafwilishe bumba lyobe ukupelulula. Nomba ufwile ukutantalilako kabili mu cituntulu no kumone fyo mwine ŋanda engabomfya ifyo fyebo. Imifwaile yesu mu butumikishi bwa mwi bala kusambilisha abantu icine ca Cebo ca kwa Lesa no kubafwilisho kusambilile nshila ya kwi pusukilo. E co, mu kuba no kucenjela no kulangulukilako, ufwile ukulanga mwine ŋanda ubunonshi bwa kukutika no kubomba pa cintu ulesosa.

¹³ Nelyo cingati ulu lubali lwa mibele lwalumbulwa mu kulekelesha, tacili ni pa kuti lwalicepa mu kukatama. Lwaba cishinka cikalamba kabili talufwile ukusuulwako. Lubombelepo, pantu lwabo lwacindama mu butumikishi bwa mwi bala. Te lingi wingekatililo kusakamana kwa kwa mwine ŋanda pa butali bwa nshita ubuli bonse kano nga aba na maka ya kumona bwino bwino ukuti ifyo ulesosa fya mutengo ku bumi bwakwe bwine.