Noa Apanga Icibwato

NOA alikwete umukashi na bana abaume batatu. Amashina ya bana bakwe ni Shemu, Hamu na Yafete. Kabili aba bana cila muntu alikwete umukashi. Kanshi ulupwa lwa kwa Noa bonse bali 8.

Lesa aebele Noa ukucita ico ashatalile acitapo. Amwebele ukupanga icibwato. Ici cibwato cali icikulu sana, kabili calemoneka kwati cibokoshi icitali kabili icikulu. Lesa atile, ‘Upange ica ntunti shitatu, kabili ubikemo ne miputule mu kati.’ Muli iyi miputule mwali no kwikala Noa no lupwa lwakwe, inama, kabili e mo bali no kubika ifya kulya.

Lesa aebele Noa no kubika amanenekela ku cibwato pa kutila amenshi yelaingila mu kati. Lesa atile: ‘Nalaleta ilyeshi pe sonde pa kuti ngonaule ifya mweo fyonse. Umuntu onse ne nama ifishakabe mu cibwato fikafwa.’

Noa na bana bakwe baumfwilile Yehova kabili batendeke ukupanga icibwato. Lelo abantu balebaseka kabili balikonkenyepo ukucita ifyabipa. Tapali nangu umo uwacetekele Noa ilyo alebeba ifyo Lesa ali no kucita.

Palipitile inshita iikalamba pa kuti bapwishe ukupanga icibwato pantu cali cikulu sana. Pa numa ya myaka iingi, basukile bapwisha ukucipanga. Nomba Lesa aebele Noa ukwingisha inama mu cibwato. Lesa amwebele ukulashingisha shibili shibili ukulingana no musango wa shiko, ishilume ne shikota. Lelo inama shimbi shena, Lesa aebele Noa ukwingisha imisango ya shiko 7, iilume ne ikota. Lesa aebele Noa no kwingisha imisango yonse iya fyuni. Noa acitile filya fine fye Lesa amwebele.

Pa numa, Noa no lupwa lwakwe nabo balingile mu cibwato. E lyo Lesa aiseleko iciibi. Mulya mu kati, Noa no lupwa lwakwe balelolela fye. Elenganya ukuti uli mu cibwato pamo na Noa no lupwa lwakwe, mulelolela. E lyo muleipusha ati, bushe ca cine ilyeshi likabako nge fyo Lesa alandile?