Icibwato ca kwa Noa

Mu kupita kwa nshita abantu balifulile mu calo. Nomba abantu abengi balecita ifyabipa. Nangu fye ni bamalaika bamo ku muulu balitendeke ukucita ifyabipa. Balifumine ku muulu no kwisa pano calo. Bushe walishiba ico baishile pano calo? Ni co balefwaya ukusanguka abantu pa kuti bope abanakashi.

Ilyo bamalaika baupile abanakashi balikwete abana abaume. Aba abana bali aba maka sana kabili balecusha abantu. Baleuma abantu. Yehova talekele ifyabipa ifyo abantu balecita fyatwalilila. E ico asalilepo ukuleta ilyeshi pa kuti onaule abantu abalecita ifyabipa.

Lelo kwali umwaume uushalecitako ifyabipa. Ena alitemenwe Yehova. Ishina lyakwe ni Noa. Alikwete umukashi na bana batatu, Shemu, Hamu na Yafete, kabili abana bakwe nabo balyupile. Yehova aebele Noa ukupanga icibwato pa kuti ena no lupwa lwakwe bakapusuke ilyo Lesa akaleta Ilyeshi. Icibwato cali kwati cibokoshi icale-elela pa menshi. Na kabili Yehova aebele Noa ukwingisha inama ishingi mu cibwato pa kuti nasho shikapusuke.

Ilyo line fye Noa alitendeke ukupanga icibwato. Palipitile imyaka nalimo 50 pa kuti Noa no lupwa lwakwe bapwishe ukupanga icibwato. Bacipangile filya fine fye Yehova abebele ukucipanga. Ilyo Noa alepanga icibwato, alesoka na bantu pa Lyeshi ilyali no kwisa. Lelo abantu tabaleumfwa ifyo alebasoka.

Ilyo bapwishishe ukupanga icibwato balingiile mu cibwato. Natumone ifyacitike.