Bampundu Abali Abapusana

ABA bakalume bali pa cikope balemoneka abapusana sana, bushe te ifyo? Bushe naubeshiba amashina? Uwaleipaya inama ni Esau, e lyo uwalecema impaanga ali ni Yakobo.

Esau na Yakobo bali bana ba kwa Isaki na Rebeka kabili bali ni bampundu. Isaki, wishi atemenwe sana Esau, pantu aleipaya sana inama isho balelya pa ng’anda. Rebeka ena atemenwe sana Yakobo pantu ali uwatekanya kabili uwafuuka.

Pali iyi nshita, Abrahamu shikulwibo ninshi talafwa, kanshi Yakobo afwile aleumfwa bwino ukukutika ku fyo Abrahamu alelanda pali Yehova. Abrahamu ali ne myaka 175 ilyo afwile. Pali ilya nshita Esau na Yakobo bali ne myaka 15.

Ilyo Esau ali ne myaka 40, aupile abanakashi babili abena Kanaani. Isaki na Rebeka tabatemenwe pantu abanakashi Esau aupile tabalepepa Lesa wa cine, Yehova.

Bushiku bumo kwacitike icintu cimo icalengele Esau ukufulilwa sana Yakobo, mpundu munankwe. Inshita yalifikile iya kuti Isaki apaale Esau. Esau ale-enekela ukuti e o wishi alapaala pantu e wali umukalamba pali Yakobo. Lelo pa nshita imo Esau apeele Yakobo insambu sha kupokelela ilyo ipaalo. Na kuba, ilyo aba bampundu bafyelwe, Lesa atile Yakobo e wali no kupokelela ipaalo. Ifi fine e fyacitike. Isaki apaalile Yakobo.

Ilyo Esau aishibe icacitike, alifulilwe sana ica kuti alafwaya no kwipaya Yakobo. Ilyo Rebeka aumfwile ifyo Esau alefwaya ukucita, alisakamene sana. E ico aebele umwina mwakwe Isaki ati: ‘Cikabipa sana nga ca kuti Yakobo na o aupa umwanakashi umwina Kanaani.’

E lyo Isaki aitile Yakobo no kumweba ati: ‘Wikopa umwanakashi umwina Kanaani. Lelo, kabiye ku Harani, ku ng’anda ya kwa shikulu obe Betuele kabili kulya e ko ukope umwana mwanakashi wa kwa Labani.’

Yakobo alyumfwilile ifyo wishi amwebele kabili apo pene aimine ulwendo ulutali ukuya kuli balupwa lwakwe ku Harani.