Yakobo Alipokele Ubupyani

Isaki ali ne myaka 40 ilyo aupile Rebeka. Isaki alitemenwe sana Rebeka. Mu kuya kwa nshita balikwete bampundu abaume.

Umukalamba ali ni Esau e lyo umwaice ali ni Yakobo. Esau alitemenwe ukuya mu mpanga kabili alishibe sana ifya kwipaya inama. Lelo Yakobo ena alitemenwe ukuba pa ng’anda.

Kale, umwana umwaume uwaleba umukalamba pali bonse, balemupeela impanga iikulu ne ndalama bawishi nga bafwa. Ifi balemupeela e fyo baleita ukuti ubupyani. Mu lupwa lwa kwa Isaki, mu bupyani ubo umwana umukalamba ali no kupyana mwali no mulapo uo Yehova alapile kuli Abrahamu. Esau tabikileko sana amano ku fintu ifyo Lesa alaile, lelo Yakobo ena alishibe ukuti ifyo Yehova alaile fyalicindeme sana.

Bushiku bumo Esau abwelele pa ng’anda ninshi nanaka icine cine, pantu aile mu kulunga akasuba konse. Aumfwile ifya kulya Yakobo aleipika fyanunkila e lyo amweba ati: ‘Ala nimfwa insala! Mpeelako ilanda!’ Yakobo amwaswike ati: ‘Nalakupeela nga walapa ukuti nine nkapoka ubupyani.’ Esau ayaswike ati: ‘Ubupyani tabwakwata incito kuli ine! Nakupeela. Ine ndefwaya fye ukulya.’ Bushe ulemona ukuti ifyo Esau acitile fyali fye bwino? Awe tafyali bwino. Esau apeele Yakobo icintu icacindama sana, pa kuti fye alye ilanda.

Ilyo Isaki akotele sana, alefwaya ukupaala umwana wakwe umukalamba. Lelo Rebeka alyafwile Yakobo uwalipo umwaice ukuti e o Isaki apaale. Ilyo Esau aishibe ifyacitike, alifulilwe icine cine kabili apangile ukwipaya mpundu munankwe Yakobo. Isaki na Rebeka balefwaya ukucingilila Yakobo, e ico bamwebele abati: ‘Kabiye kuli Labani, nokolume, e ko uleikala mpaka Esau akabweshemo umutima.’ Yakobo alicitile ifyo abafyashi bakwe bamwebele, alibutwike pa kuti bemwipaya.