Ulupwa Lwa Kwa Yakobo Lwakuukila Ku Egupti

YOSEFE alifilwa ukushipikisha. E ico aebele ababomfi bakwe bonse ukufuma mu muputule. Ilyo ashele fye na bamunyina, Yosefe atendeke ukulila. Bamunyina bafwile balipapile sana pantu tabaishibe ico alelila. Asukile abeba ukuti: ‘Nine Yosefe. Bushe batata bacili aba mweo?’

Bamunyina balipapile sana ica kuti balifililwe ukulanda icili conse. Balitiinine icine cine, lelo Yosefe abebele ati: ‘Iseni mupepi.’ Ilyo baile mupepi, atile, ‘Nine Yosefe, munyinenwe uo mwashitishe mu Egupti.’

Yosefe atwalilile ukulanda mu cikuuku ati: ‘Mwiumfwa ububi ukuti mwalinshitishe kuno. Ni Lesa wantumine kuno ku kupususha abantu. Farao alimbika ukuba kateka wa calo conse. E ico, bwelelenimo bwangu bwangu no kuyaeba batata ukuti bese mu kwikala kuno.’

Lyena Yosefe akumbatile bamunyina bonse fye no kubatomona. Ilyo Farao aumfwile ukuti bamunyina Yosefe nabesa, aebele Yosefe ati: ‘Bapeele impunda bayesenda shibo ne ndupwa shabo no kubwelela kuno. Nkesabapeela impanga iisuma sana mu Egupti apa kwikala.’

Ifi fine e fyo bacitile. Nga fintu ulemona pa cikope, Yosefe amonana na wishi ilyo wishi no lupwa lonse baile ku Egupti.

Apa, ulupwa lwa kwa Yakobo ninshi nalukula sana. Ilyo bakuukile ku Egupti, Yakobo na bana bakwe na beshikulu, bonse pamo bali 70. Abakashi babo, nalimo na babomfi abengi nabo balikonkele. Aba bonse baileikala mu Egupti kabili baleitwa ati, abena Israele pantu Lesa apeele Yakobo ishina lya kuti Israele. Abena Israele bali bantu ba kwa Lesa nga fintu uli no kumona ku ntanshi.