Yehova Talabile Yosefe

Ilyo Yosefe ali mu cifungo, Farao imfumu ya Egupti yalilotele ifiloto ifyo abantu bonse bafililwe ukulondolola umo fyalolele. Umo pa babomfi ba kwa Farao amwebele ukuti Yosefe kuti alondolola umo ifiloto fyalolele. Ilyo line fye Farao atumine uwakuyaita Yosefe.

Farao aipwishe Yosefe ati: ‘Bushe kuti wanjebako umo ifiloto fyandi filolele?’ Yosefe amwaswike ati: ‘Mu Egupti mukaba ifya kulya ifingi pa myaka 7, e lyo imyaka 7 iikakonkapo tamwakabe ifya kulya. Saleni umuntu uwaba na mano uukasunga ifya kulya pa kuti abantu benu bekafwa ne nsala.’ Farao aebele Yosefe ati: ‘Nasala iwe! Walaba uwa bubili kuli ine!’ Bushe Yosefe aishibe shani umo ifiloto fya kwa Farao fyalolele? Yehova e waebele Yosefe umo ifiloto fyalolele.

Pa myaka 7 iyakonkelepo, Yosefe alisungile ifya kulya. Lyena mu calo conse tamwali ifya kulya nga filya fine Yosefe alandile. Abantu balefuma ku ncende ishalekanalekana, baleya mu kushita ifya kulya kuli Yosefe. Yakobo wishi wa kwa Yosefe alyumfwile ukuti ku Egupti kwali ifya kulya, e ico atumine abana bakwe abaume 10 ku Egupti ku kushita ifya kulya.

Ilyo abana ba kwa Yakobo bafikile fye ku Egupti, Yosefe alibeshibe. Lelo bandume nankwe bena tabamwishibe. Balimufukamine nga filya fine alotele ilyo ali umwaice. Yosefe alefwaya eshibe nga ca kuti na pali iyi ine nshita bandume nankwe balimupatile. E ico Yosefe abebele ati: ‘Muli nengu. Mulefwaya ukwishiba ifyo icalo cesu caba pa kuti mukese twipaya.’ Bamwebele abati: ‘Awe! Twafyalwa abaume 12 kabili tufumine ku Kanaani. Umo alifwa, kabili umwaice pali ifwe bonse alishala na batata.’ Lyena Yosefe abebele ati: ‘Nshasumine ifyo mwalanda mpaka muyesenda umwaice wenu.’ E ico balibwelelemo ku mwabo.

Ilyo ifya kulya bashitile ku Egupti fyapwile, Yakobo alitumine abana bakwe abaume ukuya na kabili ku Egupti. Uno muku balisendele na Benjamini. Nomba pa kuti Yosefe eshibe nga bandume nankwe balyalwike, abikile kapu ya silfere mu cola ca fya kulya ica kwa Benjamini e lyo aeba bandume nankwe ukuti nabeba kapu. Ilyo ababomfi ba kwa Yosefe basangile kapu mu cola ca kwa Benjamini, bandume nankwe balipapile sana. Bapaapeete Yosefe ukuti babe abasha bakwe ukucila ukuti Benjamini abe umusha wakwe.

Yosefe alimwene ukuti bandume nankwe balyalwike. Yosefe alililile kabili abebele ati: ‘Nine Yosefe umwaice wenu. Bushe batata e po baba?’ Bandume nankwe balipapile. Abebele ati: ‘Mwiumfwa ububi pa fyo mwancitile. Lesa e wantumine kuno pa kuti nkamupusushe. Nomba kabiyeni bwangu ku ng’anda pa kuti muyesenda batata.’

E ico baliile ku ng’anda ku mwabo, bayaeba na bawishi fyonse ifyacitike e lyo babasenda ku Egupti. Pa numa ya myaka iingi, Yosefe alimonene na bawishi na kabili.