Fundeni Abana Benu

Bushe Walikwata Ubufuba ngo Bwakwete Bamunyina ba kwa Yosefe?

NATULONDOLOLE umo calola ukuba no bufuba. Bushe calikukoselapo ukutemwa umuntu pa mulandu wa kuti abantu batila aliba bwino, alamoneka bwino, nelyo alafwala bwino?a— Ifyo e fyo cingaba nga ca kuti uli no bufuba.

Aba mu lupwa bamo balaba no bufuba nga ca kuti abafyashi batemwishapo umwana umo ukucila umubiye. Baibolo yalilandapo pa lupwa lumo umo ubufuba bwaletele ubwafya ubukalamba nga nshi. Natumone ubwafya ubufuba bwaletele ne fyo twingasambililako ku fyacitike.

Yosefe ali mwana mwaume walenga 11 uwa kwa Yakobo, lelo bamunyina balemufubila. Bushe Nawishiba icalengele?— Pantu Yakobo shibo atemenwe sana Yosefe. Alimupangiile ne ca kufwala icisuma ica mindoloshi. Icalengele Yakobo ukutemwa sana Yosefe ni co “ali mwana wa mu bukote bwakwe” kabili e wali ibeli mu mukashi wakwe umbi Rakele uo atemenwe sana.

Baibolo itila ‘ilyo bamunyina bamwene ukuti Yosefe e o shibo atemenwe ukucila bamunyina bonse, balimupatile.’ E lyo kabili bushiku bumo, Yosefe aebele bamunyina ukuti alibalotele balemukontamina bonse kumo na bawishi. Baibolo itila, “bamunyina balimufimbiile,” kabili na bawishi bene balimukalipile pali ifi alandile ifyali mu ciloto.—Ukutendeka 37:1-11.

Ilyo papitile inshita, ninshi Yosefe ali ne myaka 17, bamunyina baile mu mpanga ukutali mu kucema impaanga ne mbushi sha lupwa. Yakobo e pa kutuma Yosefe ukuti ayemona ifyo bamunyina bali. Bushe nawishiba ifyo bamunyina Yosefe abengi balefwaya ukucita ilyo bamumwene?— Balefwaya ukumwipaya! Nomba Rubene na Yuda bena tabalefwaya ukumwipaya.

Ilyo abamakwebo balepita ukuya ku Egupti, Yuda aebele bamunyina ati: “Natumushitishe.” Awe e fyo bamushitishe. Baipeye ne mbushi no kutumpika ilaya lya kwa Yosefe mu mulopa wa iko. Pa numa, bailelanga wishi ilaya lya kwa Yosefe, kabili wishi alililile ati: “Iciswango ca mu mpanga cifwile nacimulya!”—Ukutendeka 37:12-36.

Mu kupita kwa nshita, Farao kateka wa Egupti aishiletemwa sana Yosefe. Icalengele ni co ashimbwile ifiloto fya kwa Farao fibili pa mulandu wa kuti Lesa alimwafwile. Iciloto ca kubalilapo cali ca ng’ombe 7 ishaina e lyo na shimbi 7 ishalwala. Iciloto ca bubili cali ca mitwe ya ng’ano 7 iyalelema na imbi 7 iyafoota. Yosefe ashimbwile ifiloto fyonse fibili ukuti, mu myaka 7 kwali no kuba ubusomboshi ubusuma, e lyo mu myaka yali no kukonkapo imbi 7, kwali no kuba icipowe. Farao e pa kusala Yosefe ukuba umukalamba mu kututila ifya kulya mu myaka fyafulile, pa kuti baipekanishishe ku cipowe ca ku ntanshi.

Ilyo icipowe caponene, ba lupwa lwa kwa Yosefe abaleikala ukutali balefwaya ifya kulya. E ico Yakobo atumine bamunyina ba kwa Yosefe 10 ku Egupti mu kushitako ifya kulya. Bailemonana na Yosefe lelo tabamwishibe. Yosefe na o taisokolwele kuli bamunyina lelo alibeseshe, kabili aishilemona ukuti balilapiile pa fyo bamucitile. E lyo Yosefe aisokolwele kuli bena. Bonse balitemenwe nga nshi kabili balikumbatene!—Ukutendeka, ifipandwa 40 ukufika ku 45.

Cinshi wingasambililako kuli ili lyashi lya mu Baibolo pa bufuba?— Ubufuba kuti bwaleta amafya ayakalamba, kuti bwalenga no muntu ukufwaya ukucena munyina! Natubelenge Imilimo 5:17, 18 na Imilimo 7:54-59 tumone ifyo ubufuba bwalengele abantu ukucita ku basambi ba kwa Yesu.— Bushe mu fyo twabelenga, naumona umulandu tushilingile ukukwatila ubufuba?—

Yosefe aikele imyaka 110 pa calo. Alifyele abana, abamufyalile abeshikulu, aishilekwata ne fishikulula. Yosefe afwile alefunda abana bakwe ukutemwana no kukanakwata ubufuba—Ukutendeka 50:22, 23, 26.

[Futunoti]

Amepusho:

○ Calola mwi ukuba no bufuba?

○ Bushe ubufuba bwalengele bamunyina Yosefe ukumucita shani?

○ Cinshi Yosefe abelele bamunyina uluse?

○ Cinshi twingasambililako kuli ili lyashi?