Icipandwa 15

“Ni Ani Uwawamino Kufungululo Mufungilo?”

1. Cinshi cacitika nomba mu cimonwa ca kwa Yohane?

CAKUPUUTAMO MWENSO! CASUMBUKA! E fili cimonwa ca cipuna ca bufumu ca kwa Yehova mu kwimikwa kwa ciko mu kati ka nyali sha mulilo, bakerubi, abakalamba 24, na bemba wa cilola. Lelo Yohane, cinshi ulemona mu kukonkapo? Yohane atonta pa kati na nkati pene ka ici ica kumoneka ca mu mulu, atweba ati: “Kabili namwene, pa lupi lwa ku kulyo lwa waikala pa cipuna ca bufumu, umufungilo uwalembwapo mu kati na mu numa, naukakatikwa ku fikakatikilo cinelubali. Namwene na malaika uwakosa alebile shiwi likalamba, aleti, Ni ani uwawamino kufungululo mufungilo, ukukakatule fikakatikilo fya uko?’ Kabili takwali nangu umo mu mulu, nangu ni mu calo, nangu ni pa nshi ya calo, uwawamine ukufungululo mufungilo, nangu kumonapo. E lyo ine nalile cibi, ico tasangilwe nangu umo uwawamine ukufungululo mufungilo, nangu kumonapo.”—Ukusokolola 5:1-4.

2, 3. (a) Mulandu nshi Yohane apamfiwilwe ukuti umo asangwe uwa kwisula umufungilo, lelo cinshi cilemoneka ukube cilolelo ca ico? (b) Cinshi ico abantu ba kwa Lesa basubwa bapembelela mu kupamfiwa mu nshita yesu?

² Yehova umwine wine, Shikulu Mulopwe wa kubumbwa konse, natambika uyo mufungilo. Walingile ukwisulamo ifyebo fikaankala, pantu wakwata ifilembo ku ntanshi na ku numa. Ukufwailisha kwesu kwabimbulwa. Finshi umufungilo ukwete? Tuleibukisha ubwite bwa kwa Yehova kuli Yohane ubwa kuti: “Nina wise kuno, ndekulanga ifili no kwisabako.” (Ukusokolola 4:1) Mu kuba no kwenekela kwa kucilimusha, tulelolesha ku ntanshi ku kusambilila ulwa ifyo fintu. Lelo moneni, umufungilo uli uwalambatikwa, icakakatikwa ku fikakatikilo cinelubali!

³ Bushe malaika wakosa alesanga umo uwawaminwa ukwisula umufungilo? Ukulingana na Kingdom Interlinear, umufungilo uli mu “kuboko kwa kulyo” kwa kwa Yehova. Ici citubululo kuti autambika pa lupi lwakwe ulwafungululwa. Lelo cilemoneko kuti takuli nangu umo mu mulu nelyo pe sonde uwawaminwa ukupokelela no kwisula uyo mufungilo. Nelyo ni pe samba lye sonde, pa kati ka babomfi ba citetekelo aba kwa Lesa abafwa, nangu umo ali uwafikapo pali uyu mucinshi wasumbuka. Te kupapa e co Yohane amoneko kubo wafulwishiwa! Pambi tali na kwishiba “ifili no kwisabako” pa numa ya fyonse. Mu kasuba kesu, namo, abantu ba kwa Lesa abasubwa balipembela mu kusakamikwa ukuti Yehova atume ulubuuto lwakwe ne cine pa Ukusokolola. Ici akacita mu kulundulukilako pa nshita yasontwa ku kufikilishiwa kwa busesemo, mu kutungulula abantu bakwe mu nshila ye “pusukilo [likalamba, NW].”—Ilumbo 43:3, 5.

Uwawaminwa

4. (a) Nani asangwa uwawaminwa ukwisula umufungilo ne fikakatikilo fya uko? (b) Ni mu cilambu nshi ne shuko umo ibumba lya buYohane na banabo nomba bakana?

⁴ Ee, e ko ali umo uuli na maka ya kwisula umufungilo! Yohane ashimika ati: “Kabili umo wa mu bakalamba atile kuli ine, Wilila; mona, Inkalamo ya mukowa wa kwa Yuda, Umushila wa kwa Davidi, acimfishe ku kufungululo mufungilo, no kukakatule fikakatikilo fya uko.” (Ukusokolola 5:5) E co Yohane, afuute filamba! Ibumba lya buYohane na banabo bacishinka ilelo balishipikisha pa myaka amakumi ayengi amesho yakulisha lintu bapembelela mu kutekanya ukusanikilwa. Mwandi cilambu ca kusansamusha ico nomba twakwata mu kumfwikishe cimonwa, kabili ifyo lyaba iishuko ukwakana mu kufikilishiwa kwa ciko mu kubilisha ubukombe bwa ciko kuli bambi!

5. (a) Busesemo nshi bwalandilwe ukukuma kuli Yuda, kabili ni kwi intuntuko sha kwa Yuda batekele? (b) Shilo nani?

⁵ Aha, “Inkalamo ya mukowa wa kwa Yuda”! Yohane ali uwabeleshanya no busesemo ubo Yakobo, icikolwe ca luko lwa ciYuda, abilishe ukukuma ku mwana wakwe walenga bane, Yuda ati: “Yuda cituputupu ca nkalamo! Nufuma ku ca kutaakanya cobe, nunina, we mwana wandi! Nabandama, nayolola, nge nkalamo, kabili nga nankalamo; nani uwingamwimya? Umulumbu tawakafume kuli Yuda, nangu ni nkonto ya bumushika mu ceni cakwe, akasuke [Shilo, NW] esa, kuli wene e kukabe cumfwila ca nko sha bantu.” (Ukutendeka 49:9, 10) Umutande wa cifumu wa bantu ba kwa Lesa watuntwike muli Yuda. Ukutampa na Davidi, ishamfumu shonse ishatekele mu Yerusalemu ukufikila Babiloni aonawile ulya musumba shali intuntuko sha kwa Yuda. Lelo tapali nangu umo uwabo uwali Shilo wasesemwe kuli Yakobo. Shilo lipilibula “Uo [Insambu] Shakwe.” Ukulingana no busesemo, ili shina lyasontele kuli Yesu, umo kuli uyo Ubufumu bwa cina Davidi nomba bwali bwakwe mu kubelelela.—Esekiele 21:25-27; Luka 1:32, 33; Ukusokolola 19:16.

6. Ni mu nshila nshi Yesu abele “umukonso” wa kwa Yese na kabili “umushila wa kwa Davidi”?

⁶ Yohane mu kwangufyanya aishiba ukulosha ku “mushila wa kwa Davidi.” Mesia walailwe ukulingana no busesemo etwa na kabili “umukonso ku cishiki ca kwa Yese [wishi wa Mfumu Davidi] . . . umusambo” no “umushila wa kwa Yese ukeminina ku kube [cishibilo, NW] ku bantu.” (Esaya 11:1, 10) Yesu aali umukonso wa kwa Yese, pa kufyalwa mu mutande wa cifumu wa kwa Davidi, mwana Yese. Ukulundapo, ngo mushila wa kwa Yese, aali e Umo uwalengele umutande wa cina Davidi ukupuuka na kabili, ukuupeelo bumi no kutungililwa kuli pe na pe.—2 Samwele 7:16.

7. Cinshi cipanga Yesu ukubo wawaminwo kubuulo mufungilo ukufuma mu kuboko kwa Waikala pa cipuna ca bufumu?

⁷ Yesu mu kupulamo e umo, pamo ngo muntu wapwililika, uwabombele Yehova muli bumpomfu na pe samba lya mesho yatapata. Apeele ubwasuko bwapwililika ku kusonsomba kwa kwa Satana. (Amapinda 27:11) Muli fyo, kuti asosa nga fintu acitile pa bushiku bwa pa ntanshi ya mfwa yakwe iya bulilambo ati, ‘Nincimfya icalo.’ (Yohane 16:33) Pali uyu mulandu, Yehova aseekeshe kuli Yesu wabuushiwe “amaka yonse mu mulu na pano isonde.” Wene eka mu babomfi bonse aba kwa Lesa ewalingile ukufika pa kupokelelo mufungilo, mu cilolwa ca kulengo kwishibikwa ubukombe bwa uko bwacindama.—Mateo 28:18.

8. (a) Mu kulosha ku Bufumu, cinshi cilangisha ukuwaminwa kwa kwa Yesu? (b) Mulandu nshi cabele calinga ukuti umo uwa bakalamba 24 asokolole kuli Yohane umuntu uwawaminwa ukwisula umufungilo?

⁸ Cili icalinganako, icine cine, ukuti Yesu engesula umufungilo. Ukutula 1914 alibikwa pa cipuna ca bufumu pamo nge Mfumu ya Bufumu bwa kwa Lesa ubwa buMesia, kabili ulya mufungilo usokolola ifyafula ukukuma ku Bufumu na fintu bukapwilikisha. Yesu acitileko ubunte mu kuba ne citetekelo ku cine ca Bufumu lintu ali pano isonde. (Yohane 18:36, 37) Afundile abasambi bakwe ukulapepelo kwisa kwa Bufumu. (Mateo 6:9, 10) Atampile ukushimikila kwa mbila nsuma ya Bufumu ku kutendeka kwa nshita ya Bwina Kristu no kusesema ukupwilikishiwa kwa ulya mulimo wa kushimikila mu kati ka nshita ya mpela. (Mateo 4:23; Marko 13:10) Cili icalinga mu kupalako ukuti umo uwa bakalamba 24 asokolole kuli Yohane ukuti Yesu e uli no kwisula ifikakatikilo. Mulandu nshi? Pantu aba abakalamba bekala pa fipuna fya bufumu no kufwala ifilongwe, ukuba impyani mbiye na Kristu mu Bufumu bwakwe.—Abena Roma 8:17; Ukusokolola 4:4.

‘Umwana wa Mpaanga Uwaipaiwe’

9. Mu cifulo ca nkalamo, cinshi Yohane amona cileiminina “mu kati ka cipuna ca bufumu,” kabili ni shani acilondolwele?

⁹ Yohane alolesha ukumona iyi “Nkalamo ya mukowa wa kwa Yuda.” Lelo fintu asunguka! Icipasho ca kulangilila icapusanako camoneka: “E lyo namwene mu kati ka cipuna ca bufumu ne fya mweo fine, na mu kati ka bakalamba, Umwana wa mpaanga naiminina; aba ngo waipaiwe, ali ne nsengo cinelubali, na menso cinelubali (e [mipashi] cinelubali ya kwa Lesa iyatumwa ku kuya mu calo monse).”—Ukusokolola 5:6.

10. “Umwana wa mpaanga” nani uo Yohane amwene, kabili mulandu nshi iyo numbwilo yalingila?

¹⁰ Pa kati na nkati pene, pa mbali ya cipuna ca bufumu, mu kuba no kushingulukwako ne fya mweo fine na bakalamba 24, palipo umwana wa mpaanga! Ukwabulo kutwishika Yohane mu kwangufyanya alinganya uyu mwana wa mpaanga ku “Nkalamo ya mukowa wa kwa Yuda” no “mushila wa kwa Davidi.” Aishibo kuti, ukucila pa myaka 60 mu kubangilila, Yohane Kabatisha aishibishe Yesu ku baYuda baletamba pamo nga “Umwana wa mpaanga wa kwa Lesa uulesendo lubembu [lwa calo, NW]!” (Yohane 1:29) Monse mu kati ka bumi bwakwe bwa pano isonde, Yesu atwalilile uwabulo kukoweshiwa ne calo—ukupala umwana wa mpaanga wabula akalema—ica kuti apeela umweo wakwe uwatambalala pamo nge lambo lya mutundu wa muntu.—1 Abena Korinti 5:7; AbaHebere 7:26.

11. Mulandu nshi cishabela musaalula ukulangisha Yesu wakatamikwa pamo ngo ‘mwana wa mpaanga; abo ngo waipaiwe”?

¹¹ Bushe cintu cabamo ukucenda nelyo umusaalula ukulangisha Yesu wakatamikwa pamo nga ‘umwana wa mpaanga; abo ngo waipaiwe’? Nakalya! Icishinka ca kuti Yesu atwalililo wa citetekelo ukufika na ku mfwa cali e kucimfiwa kukalamba kwa kwa Satana no kucimfya kukalamba kwa kwa Yehova Lesa. Ukulangisha Yesu muli iyi nshila mu kumonekesha cishibisha ukucimfya kwakwe pa calo ca kwa Satana kabili ca kwibukisha ukutemwa kwashika uko Yehova na Yesu bakwatilo mutundu wa muntu. (Yohane 3:16; 15:13; linganyako Abena Kolose 2:15.) Muli fyo Yesu asontwako pamo ngo Lubuto lwalailwe, uwapulamo ukulinga ukufika pa kwisula umufungilo.—Ukutendeka 3:15.

12. Cinshi ico insengo cinelubali isha Mwana wa mpaanga shicitilako icikope?

¹² Cinshi cimbi cilunda ku kutesekesha kwesu ukwa uyu “mwana wa mpaanga”? Akwete insengo cinelubali. Mu Baibolo insengo ilingi line shilangilila amaka nelyo ubulashi, kabili cinelubali kuti alangilila ukupwililika. (Linganyako 1 Samwele 2:1, 10; Ilumbo 112:9; 148:14.) E co, insengo cinelubali sha Mwana wa mpaanga shimininako ukukumanina kwa maka yantu Yehova asekeshe kuli Yesu. Wene aba “pa mulu wa [kamfulumende iili yonse no bulashi, NW] na Maka, na Bumulopwe, ne Shina lyonse ililumbulwa, te mu bwikashi buno fye iyo, lelo na muli ubo ubukesa.” (Abena Efese 1:20-23; 1 Petro 3:22) No kucila Yesu abomfya amaka, amaka ya kamfulumende, ukutula 1914 lintu Yehova amutekele pa cipuna ca bufumu pamo nge Mfumu ya mu mulu.—Ilumbo 2:6.

13. (a) Cinshi ico amenso cinelubali aya Mwana wa mpaanga yacitilako icikope? (b) Cinshi ico Umwana wa mpaanga aya ku kucita?

¹³ Ukulundapo, Yesu aisushiwa mu kupwililika no mupashi wa mushilo, nge fyo cacitwe cikope ku menso cinelubali ya Mwana wa mpaanga, ayapilibule “[mipashi] cinelubali ya kwa Lesa.” Yesu e pitilo muli uyo umwisulo wa maka yabomba ya kwa Yehova yakonkolokela ku babomfi Bakwe aba pe sonde. (Tito 3:6) Mu kushininkisha, ni kuli uyu mupashi umo wine e ko amwena ukufuma mu mulu ifilecitika pano isonde. Ukupala Wishi, Yesu akwata ukwiluka kwapwililika. Takwaba cifyuka ukumona kwakwe. (Linganyako Ilumbo 11:4; Sekaria 4:10.) Mu kumfwika, uyu Mwana—kasunga wa bumpomfu uwacimfishe icalo; Inkalamo ya mukowa wa kwa Yuda; umushila wa kwa Davidi; umo uwapeele umweo wakwe pa mutundu wa muntu; umo uwakwata ubulashi bwapwililika, umwisulo wa mupashi wa mushilo, no kwiluka kwapwililika ukufuma kuli Yehova Lesa—ee, uyu umo mu kupulamo awaminwa ukubuulo mufungilo mu kuboko kwa kwa Yehova. Bushe aleshimunuko kupokelelo uku kutumwa kwa mulimo mu kuteyanya kwa kwa Yehova kwasumbukisha? Iyo! Ukucila, “aileko no kupokelelo mufungilo ku kwa kulyo kwa waikala ku cipuna ca bufumu.” (Ukusokolola 5:7) Mwandi ca kumwenako cawamisha ica kunakilako kwa kuitemenwa!

Inyimbo sha Kulumba

14. (a) Ni shani ifya mweo fine na bakalamba 24 bankulako ku kubuula kwa kwa Yesu mufungilo? (b) Ni shani ifyebo Yohane apokelela ukukuma ku bakalamba 24 fyebekesha ukwishibikwa kwabo ne cifulo?

¹⁴ Ni shani fintu abo bambi pa ntanshi ya cipuna ca kwa Yehova bankulako? “Kabili ilyo apokelele umufungilo, ifya mweo fine na bakalamba amakumi yabili na bane fyawile ku menso ya Mwana wa mpaanga, conse cili ne sese, ne nweno sha golde ishaisulamo ifyanunke cisuma (e mapepo ya ba mushilo).” (Ukusokolola 5:8) Ukupala ifya mweo fine ifya bukerubi pa ntanshi ya cipuna ca bufumu ica kwa Lesa, abakalamba 24 bakonteme kuli Yesu mu kusuminisho bulashi bwakwe. Lelo aba bakalamba bali beka mu kukwata amasese ne nweno sha ca cushi ce fungo.a Kabili ni beka nomba baleimba ulwimbo lupya. (Ukusokolola 5:9) Muli fyo bemininako ba 144,000 aba mushilo ba kwa “Israele wa kwa Lesa,” abo kabili basenda amasese no kwimba ulwimbo lupya. (Abena Galatia 6:16; Abena Kolose 1:12; Ukusokolola 7:3-8; 14:1-4) Ukulundapo, abakalamba 24 balangililwa ukufikilisha imibombele ya bushimapepo, bwa ku mulu, iyapashanishiwa ku ya bashimapepo muli Israele wa pa kale abaocele ifya cushi ce fungo kuli Yehova mwi hema—imibombele iyo yapwilikishiwe pe sonde lintu Lesa afumishe Ifunde lya kwa Mose mu nshila, ukulipampamina pa cimuti ca kucushiwilwapo ica kwa Yesu. (Abena Kolose 2:14) Kusondwelela nshi tufumya kuli conse ici? Ukuti pano bakacimfya basubwa bamonwa mu kupeelwa kwabo ukwa mulimo ukwa kupelekeshako pamo nga ‘bashimapepo ba kwa Lesa na ba kwa Kristu, ukuteka nge shamfumu na wene pa myake kana limo.’—Ukusokolola 20:6.

15. (a) Mu Israele, nani wakwete ishuko lya kwingila Umwashilisha mwe hema? (b) Mulandu nshi cabelele mulandu wa mweo nelyo imfwa kuli shimapepo mukalamba ukoca ica cushi ce fungo pa ntanshi ya kwingila Umwashilisha?

¹⁵ Muli Israele wa pa kale, ukwingila Umwashilisha pa ntanshi ya kubapo kwa kwa Yehova kwa cimpashanya kwapeleshiwe fye kuli shimapepo mukalamba. Kuli wene, ukusenda ulunweno lwa fya cushi ce fungo wali mulandu wa kubo wa mweo nelyo ukufwa. Ifunde lya kwa Yehova lyatile: “[Aarone] abuule ne cifutumwino icaisulamo imisolilo ya mulilo iyafuma pa cipailo ku cinso ca kwa Yehova, no mwisulo wa ndupi shakwe ica cushi ce fungo icashonaulwa no kucileta ku kati ka cipembe; abike ica cushi ce fungo pa mulilo ku cinso ca kwa Yehova, no kuleke ntumba ya cushi ce fungo ifimbe pa ca kukonsolwelapo ica pa cishimiko, ukuti efwa.” (Ubwina Lebi 16:12, 13) Caali icishingacitika kuli shimapepo mukalamba ukwingila mu kufumaluka Umwashilisha kano nga aoca ice fungo.

16. (a) Mu micitile ya fintu iya Bwina Kristu, ni bani bengila Umwashilisha mwalepashanishiwa? (b) Mulandu nshi Abena Kristu basubwa bali no ‘koca ica cushi ce fungo’?

¹⁶ Mu micitile ya fintu iya Bwina Kristu te Shimapepo Mukalamba wa cimpashanya eka fye, Yesu Kristu, lelo na kabili umo na umo uwa bashimapepo banono 144,000 mu kupelako akwato kwingila Umwashilisha mwapashanishiwe, icifulo ca kubapo kwa kwa Yehova mu mulu. (AbaHebere 10:19-23) Ukwingila Umwashilisha te kuti kucitike kuli aba bashimapepo, nge fyo baimininwako pano ku bakalamba 24, kano ‘baoca ica cushi ce fungo,’ uko e kuti, ukupeela amapepo lyonse no kupaapaata kuli Yehova.—AbaHebere 5:7; Yuda 20, 21; linganyako Ilumbo 141:2.

Ulwimbo Lupya

17. (a) Lwimbo nshi ulupya ulo abakalamba 24 bemba? (b) Ni shani inumbwilo ya “ulwimbo lupya” ilingi line ibomfiwa mu Baibolo?

¹⁷ Ulwimbo lwabamo impoma nomba lwaumfwika. Luleimbilwa ku Mwana wa mpaanga ku banankwe ba bushimapepo, abakalamba 24: “Kabili baleimbo lwimbo lupya, abati: Mwawamino kubuulo mufungilo, no kukakatule fikakatikilo fya uko; ico mwaipaiwe, kabili mwashitiile Lesa mu mulopa wenu aba mu mikowa yonse na ba ndimi, na bantu na bantu, na ba nko” (Ukusokolola 5:9) Inumbwilo ya “ulwimbo lupya” imoneka imiku yafulilako mu Baibolo kabili ilingi ilosha ku kulumba Yehova pa ncitilo imo iya bulamba iya kulubula. (Ilumbo 96:1; 98:1; 144:9) Muli fyo, ulwimbo luli ulupya pantu kemba nomba kuti abilishe milimo ya kupapusha yalundwako iya kwa Yehova no kulumbulula ukutasha kwakwe ukwapupuutulwa ukwe shina Lyakwe lyabamo ubukata.

18. Ni pali cinshi abakalamba 24 balumbila Yesu ku lwimbo lwabo lupya?

¹⁸ Pano, nangu ni fyo, abakalamba 24 baleimbo lwimbo lupya pa ntanshi ya kwa Yesu ukucila ukuba pa ntanshi ya kwa Yehova. Lelo icishinte cimo cine. Balelumba Yesu pa fintu fipya ifyo wene, pamo ngo Mwana wa kwa Lesa, acita ku busuma bwabo. Ku mulopa wakwe, akonsolwele icipingo cipya na muli ifyo ukucilengo kucitikako ukuletwako kwa luko lupya nge cikwatwa caibela ica kwa Yehova. (Abena Roma 2:28, 29; 1 Abena Korinti 11:25; AbaHebere 7:18-25) Ifilundwa fya ulu luko lupya ulwa ku mupashi fyafuma ku nko sha ku mubili ishingi, lelo Yesu alibekatanya mu cilonganino cimo ngo luko lumo.—Esaya 26:2; 1 Petro 2:9, 10.

19. Lipaalo nshi ilyo Israele wa ku mubili afililwe ukufiikilisha pa mulandu wa kubulwe citetekelo kwabo? (b) Lipaalo nshi ilyo uluko lupya lwa kwa Yehova lupokelela ukuipakisha?

¹⁹ Lintu Yehova apangile abena Israele ukubo luko ku numa mu nshiku sha kwa Mose, acitile icipingo na bene no kulayo kuti nga bengatwalilila aba citetekelo kuli ico cipingo, kuti baba ubufumu bwa bashimapepo pa ntanshi yakwe. (Ukufuma 19:5, 6) Abena Israele tabaali na kabili ne citetekelo kabili tababalile abakumanya ukufikilishiwa kwa ubo bulayo. Ku lubali lumbi, uluko lupya, ulwapangwa ku kuwaminwa kwa cipingo cipya cawikishiwa kuli Yesu, lwatwalilila ulwa citetekelo. Ifilundwa fya luko kanshi fiteka pe sonde pamo nge shamfumu na kabili ukubomba nga bashimapepo, ukwaafwilisha aba mitima yalungama mu kati ka mutundu wa muntu ukuwikishiwa kuli Yehova. (Abena Kolose 1:20) Cili fye kwati fintu ulwimbo lupya lucilumbulula: “Kabili mwabacita kuli Lesa wesu ukube shamfumu kabili bashimapepo, kabili bakaba no bufumu pe sonde.” (Ukusokolola 5:10) Mwandi buseko ubo abo abakalamba 24 bakwata mu kwimba ulu lwimbo lupya ulwa kulumba kuli Yesu wakatamikwa!

Korasi wa ku Mulu

20. Lwimbo nshi lwa kulumba ku Mwana wa mpaanga ulo nomba lumfwika?

²⁰ Ni shani fintu bambi aba kuteyanya kwa ku mulu kwakulisha ukwa kwa Yehova bankula kuli ulu lwimbo lupya? Yohane acincimuka mu kumona ukushinkana kwabo kwabikwako umutima: “Kabili naliloleshe, no kuumfwe shiwi lya bamalaika abengi ukushinguluke cipuna ca bufumu ne fya mweo na bakalamba, ne mpendwa yabo yali amakana ikumi ya makana ikumi na makana ya makana; balesose shiwi likalamba, abati, Umwana wa mpaanga uwaipaiwe awaminwo kupokelela amaka, no bucindami, na mano, no kukosa, no mucinshi, no bukata, ne paalo.” (Ukusokolola 5:11, 12) Mwandi lwimbo lwabamo ukwebekesha ulwa kulumba!

21. Bushe ukulumba Umwana wa mpaanga kulafumyapo bumulopwe bwa kwa Yehova nelyo icifulo? Londolola.

²¹ Bushe ici cipilibulo kuti mu nshila imo Yesu nomba napyana pali Yehova Lesa no kuti ububumbo bonse bwalukile ku kulumba wene ukucila Wishi? Ca kutali! Ukucila, ulu lwimbo lupya lwa kulumba luli mu kumfwana na cintu umutumwa Paulo alembele ukuti: “Lesa amusansabike [Yesu], no kumupeele shina ilyacila amashina yonse; ukuti kwi shina lya kwa Yesu ikufi lyonse likafukame, ilya mu mulu ne lya pano nse ne lya pa nshi ya calo, no lulimi lonse lukasose, ukuti, Yesu Kristu e Shikulu; kube ubukata kuli Lesa Shifwe.” (Abena Filipi 2:9-11) Yesu pano alelumbanishiwa pa mulandu wa lubali lwakwe mu kupwisha ifikansa fikalamba pa ntanshi ya kubumbwa konse—ukwebelwa kwa bumulopwe bwa kwa Yehova bwakwate nsambu. Mwandi bukata, icine cine, ici caleta kuli Wishi!

Ulwimbo lwa Kulumba Lwasumbana

22. Ni mu lwimbo nshi lwa kulumba umo amashiwi yafuma ku bufumu bwa pe sonde yailunda?

²² Mu ca kumoneka cilondolwelwe kuli Yohane, amabumba ya mu mulu yalepeela ukulumba kwabamo impoma kuli Yesu mu kusuminisha ukuba ne citetekelo kwakwe no bulashi bwakwe bwa mu mulu. Muli ici, balundwako na mashiwi yafuma ku bufumu bwa pe sonde ilyo aba nabo baakana mu kulumba bonse Wishi no Mwana. Pamo nge fyo ifya kupwishishisha fya mwana mwaume wa buntunse fingaleta umucinshi wakula ku bafyashi, e fyo inshila ya cishinka iya kwa Yesu ilundako mu kati ka bubumbo bonse “ubukata kuli Lesa Shifwe.” Muli fyo, Yohane atwalililo kucita lipoti ati: “Ne fibumbwa fyonse fya mu mulu na pe sonde na pa nshi ye sonde na pali bemba, na fyonse ifilimo, nafyumfwile fileti, Ku waikala pa cipuna ca bufumu na ku Mwana wa mpaanga, kube ipaalo, no bukata, no mucinshi, no kuteka, umuyayaya umuyayaya.”—Ukusokolola 5:13.

23, 24. (a) Cinshi cilangilila lintu ulwimbo lwa kulumba lwali no kutendeka mu mulu, kabili lilali pano isonde? (b) Ni shani ulwimbo lwa kulumba lusumbana mu ciunda ilyo imyaka ilepita?

²³ Ni lilali lintu ulu lwimbo lwa kulumba ulwawamisha lumfwika? Lwatendeke mu kubangilila kwa bushiku bwa kwa Shikulu. Pa numa Satana ne fibanda fyakwe bapooselwe ukufuma mu mulu, “ifibumbwa fyonse fya mu mulu” fyali na maka ya kwikatana muli ulu lwimbo lwa kulumba. Kabili, nge fyo icalembwa cilanga, ukutula 1919 ibumba likulilako pe sonde balikatanya amashiwi yabo mu kulumba Yehova, ukulundwako ukufuma ku makana yanono ukufika ku bacila pa mamilioni yatatu ku kupwa kwa ba 1980.b Pa numa imicitile ya kwa Satana pe sonde ibe nayonaulwa, ‘icibumbwa conse . . . pe sonde’ cikalaimba amalumbo kuli Yehova na ku Mwana wakwe. Mu nshita ya kwa Yehova umwine iyalinga, ukubuushiwa kwa minshipendwa ya mamilioni ya bafwa kukatendeka, kabili lyene ‘icibumbwa conse . . . pe samba lye sonde’ icaba mu cibukisho ca kwa Lesa cikakwate shuko lya mu nshita ilya kuilunda ku kwimba ulwimbo lwa kulumba.

²⁴ Kale kale, “ukutula pa mpela sha pano isonde . . . bemba . . . ne fishi,” amamilioni ya bantunse baleimba ulwimbo lupya mu kubishanya no kuteyanya kwa mu cibulungwa conse kwa kwa Yehova. (Esaya 42:10; Ilumbo 150:1-6) Uku kulumba kwabamo ukusekelela kukafika pa ukuwelesha ku kupwa kwa Myaka Ikana Limo, lintu umutundu wa muntu ukasumbulwa ukufika ku kupwililika. Ilya Nsoka ikote, katumpika mukalamba, Satana umwine wine, pa numa ya ico akonaulwa mu kufikilishiwa kwapwililika ukwa Ukutendeka 3:15, kabili mu kalume kabamo ukucimfya, ububumbo bwa mweo bonse, ubwa ku mupashi no bwa buntunse, bukemba mu kwikatana abuti: “Ku waikala pa cipuna ca bufumu na ku Mwana wa mpaanga, kube ipaalo, no bukata, no mucinshi, no kuteka, umuyayaya umuyayaya.” Takwakabe ishiwi lyapaasuka mu bubumbo bonse.

25. (a) Ukubelenga ukulondolola kwa kwa Yohane ukwa lwimbo lwa kulumba ulwa kubumbwa konse kutusesha ukucita cinshi? (b) Ca kumwenako nshi cawamisha icatwimikilwa ku fya mweo fine na bakalamba 24 lintu icimonwa capwa?

²⁵ Mwandi iyo ikaba ni nshita yabamo ukusekelela! Mu cine cine, ifyo Yohane alondolola muno filenga imitima yesu ukwisulamo insansa kabili citubimbula ukuilunda ku mabumba ya ku mulu mu kwimba amalumbo yabikwako umutima kuli Yehova Lesa na kuli Yesu Kristu. Bushe tatulecilapo ukuba aba mupampamina ukucila na pali kale ukushipikisha mu milimo yalungama? Nga twacite fyo, kuti twacetekelo kuti, mu kuba no kwaafwa kwa kwa Yehova, tukaba kulya ngo muntu umo umo pa kalume kabamo insansa, ukusansha amashiwi yesu kuli korasi wa mu kubumbwa konse uwa kulumba. Mu kushininkisha, ifya mweo fine ifya bukerubi na Bena Kristu basubwa ababuushiwa bali mu kushinkana kwakumanina, pantu icimonwa cipwisha na mashiwi ya kuti: “Ne fya mweo fine fyatile, Amene. Na bakalamba bawile no kupepa.”—Ukusokolola 5:14.

26. Ni muli cinshi tulingile ukubomfya icitetekelo, kabili cinshi Umwana wa mpaanga aipekenye ukucita?

²⁶ Shi iwe, kabelenga watemwikwa, naubeleshe icitetekelo mwi lambo lya Mwana wa mpaanga—‘uwawaminwa’—no kubo wapaalwa mu kubombesha kobe kwaicefya ukwa kupepa no kubombela Yehova—“Uwaikala pa cipuna ca bufumu.” Leka ibumba lya buYohane likwaafwe ilelo nga fintu lilepayanya “umulingo wa filyo fya [ku mupashi] mu nshita iiyene.” (Luka 12:42) Lelo lolesha! Umwana wa mpaanga alepekanya ukwisula ifikakatikilo cinelubali. Kufisulula nshi ukwa kucincimusha kutubakilwe?

[Amafutunoti]

[Icikope pe bula 86]