Isambililo 10

Ifibelesho Ifyo Lesa Aapata

Ni shani fintu ulingile ukuyumfwa pa lwa fintu ifyo Lesa atila fyalibipa? (1)

Musango nshi uwa kwampana kwa bwamba uwalubana? (2)

Ni shani fintu Umwina Kristu alingile ukumona ukubepa? (3) ukuteye fyangalo fya cela mushuke? (3) ukwiba? (3) ulukaakala? (4) ukupupe mipashi? (5) bucakolwa? (6)

Ni shani fintu umuntu engaputukako kuli ifi fibelesho fyabipa? (7)

1. Ababomfi ba kwa Lesa balitemwa icawama. Lelo na kabili bafwile ukusambilila ukupata icabipa. (Ilumbo 97:10) Ico cilepilibula ukusengauka ifibelesho fimo ifyo Lesa apata. Fibelesho nshi fimo ifya ifi?

2. Ubulalelale: Ukwampana kwa bwamba pa ntanshi ya cupo, ubucende, ukulaala ne finama, ukulaalana kwa pa lupwa, no kulaalana kwa ba bwamba bumo bwine fyonse fyaba ni membu shabipisha kuli Lesa. (Ubwina Lebi 18:6; Abena Roma 1:26, 27; 1 Abena Korinti 6:9, 10) Nga ca kuti abantu babili tabaupana lelo baleikala capamo, bafwile ukupaatukana nangu nga te ifyo bafwile ukuupana ukulingana ne funde.—AbaHebere 13:4.

3. Ukubepa, Ukuteya Ifyangalo fya Cela Mushuke, Ukwiba: Yehova Lesa te kuti abepe. (Tito 1:2) Abantu abalefwaya ububile bwakwe bafwile ukusengauka ukubepa. (Amapinda 6:16-19; Abena Kolose 3:9, 10) Umusango uuli onse uwa fyangalo fya cela mushuke usanshamo ubufunushi. E co Abena Kristu tabaakana mu musango uuli onse uwa fyangalo fya cela mushuke, pamo nga lotari, ukushitikapo mu kucimfyanya kwa bakabalwe, no kuteye njuka. (Abena Efese 5:3-5) Kabili Abena Kristu tabeba. Tabashita icipe ca kwiba ilyo beshibe ukuti ca kwiba nelyo ukusenda ifintu ukwabula ukupoka ulusa.—Ukufuma 20:15; Abena Efese 4:28.

4. Icipyu, Ulukaakala: Ubukali bwacishamo kuti bwatungulula ku lukaakala. (Ukutendeka 4:5-8) Umuntu wa lukaakala te kuti abe cibusa wa kwa Lesa. (Ilumbo 11:5; Amapinda 22:24, 25) Calilubana ukulandula nelyo ukubweseshamo ububi pa fibi ifyo bambi pambi bengatucita.—Amapinda 24:29; Abena Roma 12:17-21.

5. Ubuloshi no Kupupe Mipashi: Abantu bamo balomba amaka ya mipashi ku kwesha ukundapa amalwele yabo. Bambi balalowa abalwani babo ukubalwalika nelyo fye ukubepaya. Amaka yashingamwa ifi fibelesho fyonse ni Satana. E co Abena Kristu tabafwile ukwakana muli ifi fyonse. (Amalango 18:9-13) Ukupalamina kuli Yehova e bucingo bwawamisha ukufuma ku manga ayo bambi bengatupandila.—Amapinda 18:10.

6. Bucakolwa: Tacabipa ukunwa umwangashi walinga, ubwalwa, nelyo ifya kunwa fimbi. (Ilumbo 104:15; 1 Timote 5:23) Lelo ukunwesha na bucakolwa fyalilubana mu menso ya kwa Lesa. (1 Abena Korinti 5:11-13; 1 Timote 3:8) Ukunwesha kuti kwaonaula ubutuntulu bobe ubwa bumi no kupasanganya ulupwa lobe. Na kabili kuti kwakulenga ukunakila mu kwanguka ku matunko yambi.—Amapinda 23:20, 21, 29-35.

7. Abantu abacita ifintu ifyo Lesa atila fyalibipa “tabakapyane ubufumu bwa kwa Lesa.” (Abena Galatia 5:19-21) Nga ca kuti walitemwa Lesa mu cine cine kabili ulefwaya ukumuteemuna, kuti walubukako kuli ifi fibelesho. (1 Yohane 5:3) Sambilila ukupata ico Lesa atila calibipa. (Abena Roma 12:9) Bishanya na bantu abakwata ifibelesho fya bukapepa. (Amapinda 13:20) Ifibusa fyakosoka ifya Bwina Kristu kuti fyashinina ukuba intulo ya kwaafwa. (Yakobo 5:14) Pali fyonse, shintilila pa kwaafwa kwa kwa Lesa ukupitila mwi pepo.—Abena Filipi 4:6, 7, 13.

[Ifikope pe bula 20, 21]

Lesa alipata bucakolwa, ukwiba, ukuteya ifyangalo fya cela mushuke, no lukaakala