Isambililo 13

Ni Shani Fintu Wingasanga Ukupepa kwa Cine?

Bushe imipepele yonse ilateemuna Lesa, nelyo bushe kwabako fye imo? (1)

Mulandu nshi kwabelako imipepele iingi nga nshi iitunga ukuba iya Bwina Kristu? (2)

Ni shani fintu wingeshiba Abena Kristu ba cine? (3-7)

1. Yesu atendeke ukupepa kwa cine ukwa Bwina Kristu kumo. E ico ilelo kufwile ukubako fye ibumba limo, ilya bakapepa ba cine aba kwa Yehova Lesa. (Yohane 4:23, 24; Abena Efese 4:4, 5) Baibolo isambilisha ukuti bantu fye abanono e baba pa nshila ya kamfyemfye iitwala ku mweo.—Mateo 7:13, 14.

2. Baibolo yasobele ukuti pa numa ya mfwa ya batumwa, ifisambilisho fyalubana ne fibelesho fishili fya Bwina Kristu fyali no kusokelela mu cilonganino ca Bwina Kristu panono panono. Abantu baali no kongola abasumina pa kuti babakonke mu cifulo ca kukonka Kristu. (Mateo 7:15, 21-23; Imilimo 20:29, 30) E mulandu wine tumwena imipepele yapusanapusana iingi iyo iitunga ukuba iya Bwina Kristu. Ni shani fintu twingeshiba Abena Kristu ba cine?

3. Ica kwishibikilwako capulamo ica Bena Kristu ba cine ca kuti balitemwana mu cine cine. (Yohane 13:34, 35) Tabasambilishiwa ukuimona nga bacila abantu ba mishobo imbi nelyo abapusanako inkanda. Kabili tabasambilishiwa ukupata abantu ba mu fyalo fimbi. (Imilimo 10:34, 35) E co tabalwako mu nkondo. Abena Kristu ba cine baimona nga bamunyina na bankashi.—1 Yohane 4:20, 21.

4. Ica kwishibikilwako na cimbi ica kupepa kwa cine ca kuti ifilundwa fyabamo balicindika Baibolo mu kushika. Bapokelela yene nge Cebo ca kwa Lesa kabili balitetekela cintu isosa. (Yohane 17:17; 2 Timote 3:16, 17) Bamona Icebo ca kwa Lesa nge cacindama ukucila imfundo sha buntunse nelyo imyata. (Mateo 15:1-3, 7-9) Balesha ukwikalila ku fyo Baibolo isosa mu bumi bwabo ubwa cila bushiku. E co tabashimikila icintu cimo kabili lyene ukucita icapusanako.—Tito 1:15, 16.

5. Ukupepa kwa cine na kabili kufwile ukucindika ishina lya kwa Lesa. (Mateo 6:9) Yesu alengele ishina lya kwa Lesa, Yehova, ukwishibikwa kuli bambi. Abena Kristu ba cine bafwile ukucita cimo cine. (Yohane 17:6, 26; Abena Roma 10:13, 14) Bantu nshi mu cifulo wikala abebako bambi pa lwe shina lya kwa Lesa?

6. Abena Kristu ba cine bafwile ukushimikila pa lwa Bufumu bwa kwa Lesa. Yesu e fyo acitile. Lyonse alandile pa lwa Bufumu. (Luka 8:1) Akambishe abasambi bakwe ukushimikila ubu bukombe bumo bwine mwi sonde lyonse. (Mateo 24:14; 28:19, 20) Abena Kristu ba cine basumina ukuti Bufumu bwa kwa Lesa bweka e bukaleta umutende wa cine no mutelelwe kuli lino isonde.—Ilumbo 146:3-5.

7. Abasambi ba kwa Yesu tabafwile ukuba ulubali lwa lino isonde lyabipa. (Yohane 17:16) Tabaibimba mu milandu ya calo iya bupolitiki ne fikansa fya mu bwikashi. Balasengauka imyendele yabamo ubusanso, ifibelesho, ne mibele ya mutima ifyo fyaba ifyaseeka mu calo. (Yakobo 1:27; 4:4) Bushe kuti waishibako ibumba lya mapepo mu cifulo wikala ilyakwata ifi fya kwishibikilwako fya Bwina Kristu bwa cine?

[Ifikope pe bula 26, 27]

Abena Kristu ba cine balitemwana, balicindika Baibolo, kabili balashimikila pa lwa Bufumu bwa kwa Lesa