Sambilileni Icebo ca kwa Lesa

Kuti Mwaishiba Shani Ukupepa kwa Cine?

Muli cino cipande muli ifipusho ifyo limbi mwaipushapo kale kabili cilemulanga uko mwingabelenga no kusanga ifyasuko muli Baibolo yenu. Inte sha kwa Yehova kuti batemwa ukulanshanya nenu ifyasuko.

1. Bushe kwaba fye icilonganino ca mapepo ica cine cimo?

Yesu asambilishe abakonshi bakwe icilonganino ca mapepo cimo fye ica cine. Caba ngo musebo uutungulula ku bumi. Pa kulanda pali uyu musebo Yesu atile: “Banono abausanga.” (Mateo 7:14) Lesa asumina fye icilonganino ca mapepo icikonka ifyalembwa mu Cebo cakwe ica cine. Bakapepa bonse aba cine balikatana mu citetekelo cimo.—Belengeni Yohane 4:23, 24; 14:6; Abena Efese 4:4, 5.

2. Cinshi calenga ukuti kube ifilonganino fya mapepo ifingi abayumfwa ukuti Bena Kristu?

Bakasesema wa bufi balyonaula ubuKristu kabili babusangula akaliilo. Nga fintu Yesu asobele bailenga ukumoneka kwati ni “mpaanga” lelo bacita ifintu kwati mimbulu ya nsala. (Mateo 7:13-15, 21, 23) UbuKristu bwa cimbepa bwatendeke sana sana pa numa ya mfwa ya batumwa ba kwa Yesu.—Belengeni Imilimo 20:29, 30.

3. Finshi twingeshibilako ukupepa kwa cine?

Bakapepa ba cine balicindika Baibolo ukuti Cebo ca kwa Lesa. Balesha ukukonka ifyo ilanda. Kanshi icilonganino ca cine tacaba nge filonganino ifikonka amafunde ya bantu. (Mateo 15:7-9) Bakapepa ba cine tabeba abantu ukulacita ifyo bena bashilecita.—Belengeni Yohane 17:17; 2 Timote 3:16, 17.

Icilonganino ca cine cilacindika ishina lya kwa Lesa ilya kuti Yehova. Yesu alengele ishina lya kwa Lesa ukwishibikwa. Ayafwile abantu ukwishiba Lesa kabili abasambilishe ukulapepa ukuti ishina lya kwa Lesa licindikwe. (Mateo 6:9) Bushe uko mwikala cilonganino nshi icikoselesha abantu ukulabomfya ishina lya kwa Lesa?—Belengeni Yohane 17:26; Abena Roma 10:13, 14.

4. Kuti mwabeshiba shani bakapepa ba cine?

Abena Kristu ba cine balabila pa Bufumu bwa kwa Lesa. Lesa atumine Yesu ukwisa mu kubila pa Bufumu. Ubufumu bwa kwa Lesa e bukalubula fye abantu. Yesu alelanda pa Bufumu mpaka fye no bushiku afwile. (Luka 4:43; 8:1; 23:42, 43) Aebele abakonshi bakwe ukulabila pa Bufumu bwa kwa Lesa. Bushe umuntu nga aisa kuli imwe mu kumweba pa Bufumu Ubwa kwa Lesa, kuti mwatila aba ku cilonganino nshi?—Belengeni Mateo 10:7; 24:14.

Abakonshi ba kwa Yesu tabaikumika ku calo cabipa. Tabaitumpa mu fikansa fya calo nangu mu kukansana kwa mu bwikashi. (Yohane 17:16) E lyo kabili, tabakonkelela abantu aba misango yabipa aba muli ici calo.—Belengeni Yakobo 1:27; 4:4.

5. Cishibilo nshi icikalamba ica Bena Kristu ba cine?

Abena Kristu ba cine balitemwana nga nshi. Balisambilila mu Cebo ca kwa Lesa ukuti bafwile ukucindika abantu ba mitundu yonse. Aba mu filonganino fya mapepo ifya bufi balalwako inkondo, lelo bakapepa ba cine bena tabalwako. (Mika 4:1-4) Bena babomfya fye inshita yabo ne fyo bakwata ku kwafwa abantu no kubakoselesha.—Belengeni Yohane 13:34, 35; 1 Yohane 4:20, 21.

Cilonganino nshi icisambilisha fyonse ifyaba mu Cebo ca kwa Lesa, icicindika ishina lya kwa Lesa no kubila ukuti Ubufumu bwa kwa Lesa e bukalubula fye abantu? Cilonganino nshi icilanga ukutemwa kabili icishilwako inkondo? Ifishinka filangilila ukutila ni Nte sha kwa Yehova fye.—1 Yohane 3:10-12.

Nga mulefwaya ukwishibilapo na fimbi moneni icipandwa 15 mu citabo citila Bushe Cinshi Baibolo Isambilisha?, icasabankanishiwa ne Nte sha kwa Yehova.

[Icikope pe bula 16]

“Basosa abati balishiba Lesa, lelo ku fyo bacita balamukaana.”—Tito 1:16.