Ukusokwa ku Fyacitike Kale

Yehova takasuminishe ababipa ukonaula Paradise. Fibusa fyakwe fye e fikalailakamo. Cinshi cikacitika ku babipa? Pa kuti twishibe, natulande pa fyacitike mu nshiku sha kwa Noa. Noa aliko imyaka iingi sana iyapita. Ali muntu musuma uwaletukuta lyonse ukucita ukufwaya kwa kwa Yehova. Lelo abantu bambi pe sonde balecita ifyabipa. E co Yehova aebele Noa ukuti ali no kuleta ilyeshi no konaula balya bantu babipa bonse. Aebele Noa ukupanga icibwato pa kuti ekafwa no lupwa lwakwe lintu Ilyeshi lyaisa.—Ukutendeka 6:9-18.

Noa no lupwa lwakwe balipangile icibwato. Noa alisokele abantu ukuti Ilyeshi lyali no kwisa, lelo tabaumfwile fintu abasokele. Balitwalilile ukucita ifyabipa. Ilyo icibwato capangilwe, Noa apatamike ifinama mu cibwato, kabili na o alipateme no lupwa lwakwe. E lyo Yehova aloseshe mfula ya cipesha amano. Yalokele inshiku 40, akasuba no bushiku. Amenshi yaiswile pano isonde ponse.—Ukutendeka 7:7-12.

Ababipa balifwile, lelo Noa no lupwa lwakwe balipuswike. Yehova alibapuswishe ilyo aletele Ilyeshi no kubaleka bekale pe sonde apo afumishe ububifi. (Ukutendeka 7:22, 23) Baibolo na kabili isosa ukuti inshita ileisa ilyo Yehova akonaula abakaana ukucita icalungama. Abantu basuma tabakonaulwe. Bakekala mu Paradise ku ciyayaya.—2 Petro 2:5, 6, 9.

Abengi ilelo balacita ifyabipa. Amafya yali fye mpanga yonse mwi sonde. Yehova alatuma Inte shakwe libili libili ukuya mu kusoka abantu, lelo abengi tabafwaya kukutika ku mashiwi ya kwa Yehova. Tabafwaya ukwalula imibele yabo. Tabafwaya ukusumina fintu Yehova atila fyalibipa nelyo fyalilungama. Cinshi cikacitika kuli aba bantu? Bushe bakaluka bushiku bumo? Abengi tabakaluke. Ku ntanshi abantu babipa bali no konaulwa kabili tabakatale ababa no mweo na kabili.—Amalumbo 92:7.

Isonde talyakonaulwe; likalulwa ukuba paradise. Ababa ifibusa fya kwa Lesa bakekala muli Paradise wa pe sonde ku ciyayaya.—Amalumbo 37:29.