Inshila Babomfya pa Kumushimikilako

ABENA Kristu baebwa ‘ukulenga aba nko shonse ukuba abasambi,’ lelo ici tacilepilibula ukuti bafwile ukubapatikisha nelyo ukubaalula ku maka. Umulimo Yesu apeelwe wa “kubile mbila nsuma ku balanda,” “ukukakililako abafunaike misana,” “ukusansamusha bonse abaloosha.” (Mateo 28:19; Esaya 61:1, 2; Luka 4:18, 19) Inte sha kwa Yehova bacite ci ukupitila mu kubilisha imbila nsuma ya mu Baibolo. Ukupala kasesema wa ku kale Esekiele, Inte sha kwa Yehova lelo shesha ukufwaya “abateta no kulila pa fya muselu fyonse ifilecitwa.”—Esekiele 9:4.

Inshila yaishibikwa bwino iyo bafwailamo abalengwa ubulanda pa filecitika lelo ya kuya ku ng’anda ne ng’anda. Muli iyi nshila balabombesha pa kuti bengashimikila kuli bonse, kwati ni fintu fye na Yesu acitile ilyo ‘aleendauka mu mishi ikalamba ne mishi inono, ukushimikila no kubile mbila nsuma ya bufumu bwa kwa Lesa.’ Na basambi bakwe aba kubalilapo e fyo bacitile. (Luka 8:1; 9:1-6; 10:1-9) Pali lelo, uko ifintu fyabako bwino, Inte sha kwa Yehova balatukuta ukutandalila ing’anda imo imo imiku iingi mu mwaka, ukufwaya ukulanshanya nabo ifibakumine nelyo pa filecitika mu calo nangu mwi sonde pa maminiti fye. Ilembo limo nangu yabili yalabelengwa no kulandwapo, kabili nga ca kuti abene ba ng’anda batemwa, Nte kuti apangana nabo ukwisapitako na kabili pa nshita ingabawamina pa kuti batwalilile ukulanshanya. AmaBaibolo ne mpapulo shilondolola Baibolo filashalikwa, kabili nga ca kuti abene ba ng’anda balefwaya, isambililo lya Baibolo ilya mu ng’anda ilyabula ukulipilisha lilatendeka. Mwi sonde fye lyonse, imintapendwa ya aya masambililo ya Baibolo aya kunonsha yaletungululwa lyonse ku bantu ne ndupwa.

Inshila na imbi iyo “imbila nsuma ya bufumu” ibililwamo ku bantu yaba kupitila mu kulongana kubela pa Mayanda ya Bufumu. Apa epo Inte shilonganina cila mulungu. Ukulongana kumo kwaba kulongana kwa lyashi lya ku cintubwingi ililanda pa filecitika ndakai, ukukonkwapo ne sambililo lifuma muli magazini wa Ulupungu lwa kwa Kalinda ilingalanda pali cimo ica mu Baibolo nelyo pa kusesema. Ukulongana na kumbi kulongana kwe sukulu ukukansha Inte pa kuti babe bakashimikila bafikapo aba mbila nsuma, ukukonkwapo no kulongana umuba ukulanshanya sana pa mulimo wa kushimikila ubombwa mu cifulo ca kubombelamo ica uko kwine. Na kabili, Inte sha kwa Yehova shilakumana umuku umo mu mulumgu mu mayanda, mu tumabumba mabumba, ku kusambilila Baibolo.

Uuli onse kuti asangwako kuli uku kulongana. Tabapishamo akabale ka mituulo. Uku kulongana kulanonsha bonse. Baibolo itila: “Tufwile ukumona ifyo ifwe umo umo twingacishapo ukucincimusha bambi ku kutemwa na ku busuma, ukukanaleka ukusangwa ku kulongana kwesu, filya bamo bacita, lelo tulekoseleshanya, pali bufi apo mulemona Ubushiku bulya bulepalamina.” Isambililo lya pa lwesu no kusapika filafwaikwa, lelo ukulongana capamo na bambi kulacincimusha: “Filya icela cinone cela, e fyo no muntu anona ukushilimuka kwa mubiye.”—AbaHebere 10:24, 25; Amapinda 27:17, The New English Bible.

Ilyo balekumana na bantu cila bushiku, Inte balashukila inshita iili yonse iyamoneka ku kushimikilamo imbila nsuma. Kuti kwaba kulanshanya fye ukwipi no mwina mupalamano nelyo ku mulendo ali muli basi nelyo mu ndeke, napamo ukulanshanya kwatantalila na cibusa nelyo lupwa, nelyo ukulanshanya no mubomfi munabo pa nshita ya kutuusha. Ukushimikila ukwingi uko Yesu aleshimikila lintu ali pano isonde kwali kwa muli iyi ine nshila—ilyo aleenda mu lulamba lwa bemba, ilyo aikele pa lupili, ilyo alelya ica kulya mu ng’anda ya umo, ilyo asangilwe ku bwinga, nelyo lintu aleenda mu bwato bwa balondo pali bemba wa Galili, aleshimikila. Asambilishe mu masunagoge na pe tempele mu Yerusalemu. Ukuli konse uko ali, alesangako inshita ya kulanda pa lwa Bufumu bwa kwa Lesa. Inte sha kwa Yehova balatukuta ukukonka mu makasa yakwe mu mishimikile.—1 Petro 2:21.

UKUSHIMIKILILA KU MICITILE

Tapali inshila iili yonse pali shi babomfya ku kushimikila imbila nsuma ingawama nga ca kuti uyo wine aleshimikila kuli imwe tabomfya ifyo ashimikilapo. Ukusosa cimo no kucita cimbi e bumbimunda, kabili ubumbimunda bwa mu mipepele bwalenga abantu abengi ukusuula Baibolo. Kwena Baibolo baifyenga fye pa kuipeela umulandu. Bakalemba na baFarise balikwete Amalembo ya ciHebere, lelo Yesu alibasenwike no kubeta ati ba bumbimunda. Alandile pa lwa fintu balebelenga mu Malango ya kwa Mose, no kweba abasambi bakwe ukuti: “Fyonse ifyo bamweba, citeni no kubaka; lelo mwicita umwabele milimo yabo. Pantu balasosa, lelo tabacita.” (Mateo 23:3) Abantu balashininwapo bwangu nga ca kuti Umwina Kristu aleikala imikalile yalungama ukucila na fintu bengashininwa pa nshita ikalamba engapoosa mu kubashimikila. Abena Kristu abaupilwe ku balume abashasumine baebelwe ukuti: “Bakolopekwe ukwabule cebo pa mulandu wa mibele ya bakashi babo, pa kuloleshe mibele yenu ya kaele.”—1 Petro 3:1, 2.

E co, Inte sha kwa Yehova balesha ukulenga imbila nsuma ukupokelelwa kuli bambi na muli iyi ine nshila: pa kwikala imikalile ya Bwina Kristu iyo bebako bambi ukuti e mikalile isuma. Besha ‘ukucita kuli bambi ifyo nabo bengafwaya ukucitilwa.’ (Mateo 7:12) Tabesha fye ukucita ifi kuli ba Nte banabo, ku banabo, ku fibusa, ku bena mupalamano, nelyo kuli balupwa fye, lelo ku bantu fye bonse. Apo tabapwililika, te lyonse kwena bacita bwino bwino. Lelo imitima yabo ifwaisha ukucita icisuma ku bantu bonse te mu kubashimikila fye imbila nsuma ya Bufumu lelo na mu kufungululo kuboko apo cakabilwa.—Yakobo 2:14-17.

[Icikope pe bula 19]

Hawaii

[Icikope pe bula 19]

Venezuela

[Icikope pe bula 19]

Yugoslavia

[Ifikope pe bula 20]

Amayanda ya Bufumu, ayapangilwa fye, ku kulanshanishishamo Baibolo

[Ifikope pe bula 21]

Mu mikalile ya ndupwa shabo na lintu balekumanya abantu bambi, ba Nte balesha mu bufumacumi ukucita fintu bashimikila kuli bambi