Ukulanda Kwati Mulelanshanya

ABANTU ilingi line balangukilwa ilyo balelanshanya na banabo. Balanda fye mu cifyalilwa. Abantu bamo balicincimuka; bambi balitalalila. Lelo, imilandile nga ili ya cifyalilwa, cilawama.

Lelo, ilyo mulelanshanya na untu mushaishiba, tacalinga ukulanda kwati mwalimwishiba kale. Na kuba, mu ntambi shimo pa kutampa ukulanshanya na untu mushaishiba, umo afwile ukutampa mucinshi mucinshi. Pa numa ya kulanshanya mu mucinshi, e lyo mwingabomfya ukushilimuka no kumona nga mwingalanda nga baishibana kale kabili kwati mulelanshanya.

Ilyo mulelanda pa cisebele na po, mufwile ukusakamana ifyo mulelanda. Nga mulelanda kwati mwalibelesha sana abali mwi bumba, ukulongana kwa Bwina Kristu teti kucindikwe kabili abantu kuti bayangusha ico mulesosa. Mu ndimi shimo, kwaba amashiwi ayo babomfya pa kulanda na bakalamba, bakafundisha, abalashi, nelyo abafyashi. (Moneni amashiwi yaba pa Imilimo 7:2 na 13:17.) Kulaba amashiwi yambi aya kubomfya pa kulanda no mulume atemwa umukashi nelyo kuli cibusa mwabeleshanya na o. Nangu ca kuti imilandile yesu pa cisebele tailingile ukucishamo ukukatama, ifwile ukuba iya mucinshi.

Lelo, kwaba fimo ifingalenga imilandile ya muntu ukumfwikamo amashiwi yamo yene nelyo ukumfwika ukuti nacilamo ukupoosako amano. Cimo ni nshila ya kupangilamo amasentensi nelyo umusango mulekonkanishishamo insoso. Ubwafya bwisa nga ca kuti kalanda alefwaya ukulanda amashiwi yalya yene amwene mu lupapulo. Ifyo tulemba ilingi line filapusana ne fyo tulanda. Ca cine ukuti pa kupekanya ilyashi, tusapika mu fyalembwa. Napamo namukwata autulaini wapulintwa apa kufumya ilyashi. Lelo nga mwalanda ifyebo filya fine fye fyapulintwa nelyo ukufibelenga fye mu kulungatika pa kulanda ilyashi, imilandile yenu tayakomfwike kwati kulanshanya. Pa kuti imilandile ileumfwika kwati kulanshanya, landeni ifyebo mu mashiwi yenu kabili mwilabomfya amasentensi yapikana.

Cimbi caba kwalulaalula umusenselo. Imilandile ya kubomfya amashiwi yamo yene kabili iya kuti kalanda nacilamo ukupoosako amano ilingi line isanshamo ukulanda amashiwi ayalekonkana fye pa musenselo umo wine. Mu milandile ya lyonse, tulalulaalula umusenselo no kupemwina mu nshita mu nshita.

Kwena, pa kulanda kwi bumba likalamba, mulingile ukulanda kwati mulelanshanya lelo ukwikatishako ishiwi, ukubikako amaka, no kucincimuka pa kuti bapooseko amano.

Nga mulefwaya imilandile ya kulanshanya iyalinga mu butumikishi, mufwile ukubelesha ukulanda bwino cila bushiku. Te kutila mufwile ukuba abasoma sana. Lelo cisuma ukubelesha imilandile ingalenga bambi ukukutika no mucinshi ku fyo mulesosa. Apo twaishibe fi, moneni nga mulingile ukubombela pa fyakonkapo mu milandile yenu iya cila bushiku.

1. Ukulingana no kufunda kwaba pa Abena Kolose 3:8, te kwesha ukubomfya imilandile ya musaalula nelyo iya nsele. Lelo, imilandile ya munsaunte tayabipa. Imilandile ya munsaunte, nelyo amashiwi tubomfya cila bushiku, yaba ayapepuka, lelo ayalingana ne milandile yaishibikwa ukuti yaba fye bwino.

2. Fwayeniko amashiwi yambi ayaletunga fye mu co mulesosa nga mu keela.

3. Pa kusengauke fyo, intanshi ishibeni bwino ico mulefwaya ukulanda; e pa kutampa ukulanda.

4. Pa kulanda icishinka ico mulefwaya abantu baleibukisha, belesheni ukulanda muli sentensi yayanguka.