Ukwangwa Abantu Mulelandako

PA KWEBAKO bambi icine ca mu Baibolo, te kulanda fye fimo. Tufwile ukubafika pa mitima. Inshila imo iya kucitilamo ici kulanga ukuti natwangwa icine cine kuli bakomfwa wesu. Kwaba inshila ishingi twingalangilamo ukuti natwangwako.

Tontonkanyeniko Ifyo Bakomfwa Wenu Baletontonkanya Pali fyo Fintu. Umutumwa Paulo pa kulanda aletontonkanya na pa fikulilo ne mitontonkanishishe ya bakomfwa wakwe. Alondolwele ati: “Ku baYuda naishileba ngo muYuda, ukuti ngwikishe abaYuda; ku bena Malango naishileba ngo mwina Malango, ukuti ngwikishe abena Malango, nelyo nshili mwina Malango ne mwine; ku bashaba na Malango naishileba ngo ushaba na Malango, ukuti ngwikishe abashaba na Malango, nelyo nshili uwabulwa Amalango ya kwa Lesa, lelo wa mu malango ya kwa Kristu; ku banaka naishileba uwanaka, ukuti ngwikishe abanaka. Nimba fyonse kuli bonse, ukuti mu misango yonse mpusushishemo bamo. Awe, ifintu fyonse ncitile mbila nsuma, ukuti mbe uwa kukumako.” (1 Kor. 9:20-23) Bushe ilelo kuti twaba shani “fyonse kuli bonse”?

Nga mwakwata akashita ka kubebeta bambi, nangu ni panono fye, ilyo mushilalanda nabo, kuti mwamona ifyo batemwa ne fyo bashingwana na fyo. Bushe kuti mwaishiba umulimo babomba? Bushe kuli ifilelangilila uko bapepa? Bushe kuli ifilelangilila ifyo ulupwa lwabo lwaba? Ukulingana ne fyo mwamona, bushe kuti mwayalula ifya kulanda pa kuti abo bantu bakutike?

Pa kuti abantu bakutike ifyo mulelanda, icifwaikwa kutontonkanishisha kabela ifya kubinga aba mu cifulo mushimikilamo. Mu ncende shimo, mwaba na bafuma ku fyalo fimbi. Nga ca kuti mu cifulo mushimikila mwaba aba musango yo, bushe mwalisanga inshila ingabomba pa kubashimikila? Apo Lesa afwaya “abantu bonse ukupusuka no kufika ku kwishibe Cine,” pampamineni pa kushimikila ubukombe bwa Bufumu mu nshila ingalenga abo mulelandako ukubutemwa.—1 Tim. 2:4.

Kutikisheni. Nangula Yehova kuti aishiba fyonse, alakutika kuli bambi. Kasesema Mikaya amwene Yehova mu cimonwa aleeba bamalaika ukulanda ifyo baletontonkanya pa fyo bengabombela pa mulandu umo. Lyene Lesa aebele malaika umo ukucita ifyo uyu malaika umwine atubulwile. (1 Isha. 22:19-22) Ilyo Abrahamu asakamikwe pa lwa bupingushi bwali no kwishila Sodomu, Yehova mu kutekanya alimulekele afumya ifili ku mukoshi. (Ukute. 18:23-33) Ilyo tuli mu butumikishi, kuti twapashanya shani Yehova mu kukutika?

Koselesheni abantu ukulanda ifili ku mukoshi. Bepusheni icipusho calinga, kabili pembeleni basuke. Kutikisheni. Ukukutika kwenu no kulangulukilako kukalenga bakakakuke ukuisosela. Nga ca kuti ifyasuko fyabo filesokolola ifyo batemwa, ipusheni na fimbi mu mucenjelo. Te kutila mufwile ukubepusha kwati ni mu cilye, lelo ipusheni mu mucenjelo pa kuti mubeshibe bwino. Nga kuti mwabatasha mu bufumacumi pa fyo balelanda, batasheni. Na lintu tamulesuminisha ifyo baletontonkanya, langeni mu cikuuku ukuti namumfwa ifyo basosele.—Kol. 4:6.

Lelo, tufwile ukucenjela pa kuti ukwangwa abantu takucishishemo. Ukwangwa bambi takutupeela nsambu sha kufwailisha pa mikalile ya pa lwabo. (1 Pet. 4:15) Tufwile ukucenjela pa kuti umwaume tulelandako atemwa umwanakashi emona kwati ukwangwako kwesu kuli wene kulolele mumbi. Apo ukwangwa abantu ukwalinga kulapusanapusana mu fyalo no kulingana no muntu umo umo, tufwile ukuba abashilimuka pa kulanga ukwangwako kwesu.—Luka 6:31.

Ukupekanya e kwafwa sana nga mulefwaya ukukutikisha. Nga ca kuti natwishiba bwino sana ubukombe bwesu, cilatwafwa ukuba abakakuka no kwangwa bambi natuteka no mutima. Ici cibalenga ukwangukilwa kabili kuti bafwaisha ukulanshanya na ifwe.

Nga tulekutika ilyo bambi balelanda ninshi tulebalanga umucinshi. (Rom. 12:10) Cilanga ukuti twalicindika ifyo batontonkanya ne fyo bayumfwa. Pambi kuti calenga bapooseshako na mano ku fintu tulesosa. E mulandu wine kanshi Icebo ca kwa Lesa citwebela ukuba ‘abayanguka ku kuumfwa, abakokola ku kulanda.’—Yako. 1:19.

Afweni Bambi Ukulunduluka. Ukwangwa abantu bambi kukalenga tuletontonkanya pa balefwaya ukwishiba icine no kubwelelako ku kubashimikila icine ca mu Baibolo icingabafwa mu fyo bakabila. Ilyo muletontonkanya pa kubwelelako, tontonkanyeni ifyo mwaishibe pali bene pa muku wa kubalilapo mwabatandalile. Pekanyeni ifyebo ifibakumine. Komaileni pa bucindami bwa ifyo fyebo, ukubafwa ukumona ifyo benganonkelamo mu fintu balesambilila.—Esa. 48:17.

Nga ca kuti komfwa wenu asokolola cimo icimucusha, moneni ici nge shuko lyenu ilya kumushimikilako imbila nsuma. Konkeni ifyo Yesu acitile, lyonse ali uwaiteyanya ukusansamusha abalecucutika. (Marko 6:31-34) Mwiesha ukupanda amano yengapikulula ubwafya pa kashita fye kanono nelyo pa muulu fye. Ici kuti calenga uyo muntu ukutontonkanya ati tamwangilweko sana. Lelo, mulangulukileniko. (1 Pet. 3:8) Lyene sapikeni mu mpapulo shilanda pa fya mu Baibolo no kwebako uyo muntu ifyebo fya kukoselesha ifingamwafwa ukulingana ne fyo alepitamo. Kwena, pa kwangwa uyo muntu mu citemwishi tamwakasokolole ica nkama ico bamushimikilako kano nga pali umulandu wa kusokolwela.—Amapi. 25:9.

Abo tufwile ukwangwako maka maka ni balya tutungululako amasambililo ya Baibolo. Tontonkanyeni no kupepelapo pa fyo umusambi umo umo alekabila, kabili pa kupekanya isambililo muleibukisha ifyo alekabila. Ipusheni amuti, ‘Cinshi afwile ukukonkeshapo pa kuti atwalilile ukulunduluka mu fya ku mupashi?’ Itemenweni ukwafwa umusambi ukutesekesha ifyo Baibolo ne mpapulo sha “musha wa cishinka kabili uwashilimuka” shilanda pali uyo mulandu. (Mat. 24:45) Inshita shimo, ukulondolola fye te kuti kwafwe. Icingafwaikwa kulanga umusambi ifyo engabomfya icishinte ca mu Baibolo, kuti mwabombela pamo icintu cimo icilelanga ifyo ico cishinte cingabomba.—Yoh. 13:1-15.

Pa kwafwa bambi ukwaluka pa kuti imikalile yabo ilingane ne fipimo fya kwa Yehova, cifwaikwa ukulinga no kulingulula. Abantu balipusanapusana ifyo bakula ne fyo bengacita, kabili ukulunduluka kwabo kulapusanapusana. Mwilaenekela ifyacilamo. (Fil. 4:5) Mwibapatikisha ukwaluka mu mikalile yabo. Lekeni Icebo ca kwa Lesa no mupashi wakwe fibakunte ku mitima. Yehova afwaya abantu ukumubombela mu kuitemenwa, te mu kupatikishiwa iyo. (Amalu. 110:3) Nga kuli imilandu iyo bafwile ukuimwena abene ifyo bengacita, mwiesha ukubeba ifyo muletontonkanya, kabili nga bamwipusha ukulandapo, te kwesha ukubapingwilako ifya kucita.—Gal. 6:5.

Bacitileniko Ifingabafwa. Nangu ca kuti Yesu ayangilwe sana ukuti bakomfwa wakwe cibawamine lwa ku mupashi, ali uwaibukila na kuli fimbi balekabila. (Mat. 15:32) Nangu ca kuti twakwata fye utunono, kwaba inshila ishingi twingafwilamo bambi.

Ukwangwa bambi kukatucincisha ukubalangulukilako. Ku ca kumwenako, nga ca kuti uo mulelandako taleumfwa bwino pa mulandu wa miceele, seleleni kumbi, nelyo ukumfwana ukuti mukakonkanyepo ukulanshanya inshita imbi. Nga ca kuti mwafika pa nshita ishiweme, mwebeni ukuti muli no kubwelelako limbi. Nga ca kuti umwina mupalamano atemwa umbi uulefwaya ukwishibe cine nalwala nelyo ali mu cipatala, langeni ukuti namwangwako ukupita mu kumutuminako kardi nelyo ukulemba kalata umwipi atemwa ukuyamupempula. Nga nacilinga, kuti mwapekanya utwa kulya nelyo ukumucitilako fye fimbi ifya nkumbu.

Ilyo abasambi ba Baibolo balelunduluka, kuti baumfwa kwati balebulisha fimo pantu nomba tabaleangala na banabo ba kale. Beni ifibusa fyabo. Pooseniko inshita ukwambaula na bo pa numa ye sambililo lya Baibolo na pa nshita shimbi. Bakoselesheni ukufwaya ifibusa fisuma. (Amapi. 13:20) Bafweni ukuti balesangwa ku kulongana kwa Bwina Kristu. Ikaleni na bo pa kulongana, no kubaafwa ukusakamana abana pa kuti bonse balenonkelamo sana mu kulongana.

Ukwangwako Kwenu Kufwile Ukufuma ku Mutima. Ukwangwa abantu te cintu ca kusambilila fye, lelo cintu icifuma ku mutima. Fingi fingalanga ukuti natwangwa abantu bambi. Kuti kwamonekela mu fyo tukutika ne fyo tusosa. Kumonekela mu cikuuku no kulangulukilako bambi. Nangu tatucitile nelyo ukusosa icili conse, kuti kwamonekela mu mibele yesu na pa menso. Nga cine cine tulangwa bambi, bakeshiba ukwabula no bwafya.

Umulandu wacindamisha uo twangilwa bambi wa kuti nga tulecite fyo, tupashanya ukutemwa ne nkumbu sha kwa Shifwe wa ku muulu. Ici cilenga bakomfwa wesu ukupalama kuli Yehova no kutemwa ubukombe atupeela ukusabankanya. Kanshi, ilyo muleshimikila imbila nsuma, esheni na maka ukukanaba abalolekesha “ifya imwe bene, lelo abalolekesha ne fya banenu.”—Fil. 2:4.